“Rokova na tamamu kei na tinamu, me dede kina na nomu bula ena vanua e solia vei iko o Jiova na nomu Kalou.”—Lako Yani 20:12, iVakadewa ni Vuravura Vou.

“Rokovi rau na tamamu kei na tinamu: me dede kina nomu bula ena vanua e solia vei iko na TURAGA na nomu Kalou.”—Lako Yani 20:12, King James Version.

E vakaroti ira na Isireli na Kalou mera rokovi ira nodra itubutubu. Dua tale na vuna e vinakata na Kalou meda muria na ivakaro qori, ni yalataka kina na ka eda na vakila nida muria nona ivakaro. Era sa sega ni vakarurugi na Isireli ena Lawa e soli vei Mosese, ia e dua tu ga na kena ivakatagedegede. Na Lawa qori e yavutaki ena ka dina e yaga tiko ga me yacova mai nikua.—Kolosa 3:20.

Ke ra gone se qase e dodonu mera rokovi ira nodra itubutubu, nira doka ira qai talairawarawa tale ga. (Vunau ni Soro 19:3; Vosa Vakaibalebale 1:8) Era na lomani ira tiko ga nodra itubutubu ke ra sa vakavuvale mada ga. Kena ivakaraitaki, era na raica mera qaravi vinaka, ra vakarautaka tale ga na ka vakailavo era vinakata.—Maciu 15:4-6; 1 Timoci 5:4, 8.

E dodonu vei ira na gone ni Isireli mera dokai tamadra kei tinadra, era na kila tale ga kina na itavi bibi nei tina ena vuvale. (Vosa Vakaibalebale 6:20; 19:26) E dodonu mera muria tale ga nikua na gone.

E tiko na ituvaki era na sega ni dokai ira nodra itubutubu na gone ni Isireli. Era na sega ni talairawarawa vei ira nodra itubutubu se dua tale, ke ra kila ni beci kina na Kalou. (Vakarua 13:6-8) O ira tale ga na lotu vakarisito nikua e dodonu mera “talairawarawa ga vua na Kalou ni iliuliu, sega vua na tamata.”—Cakacaka 5:29.

E yalataka na Kalou ena Lawa e soli vei ira na Isireli, ni o ira na gone era dokai ira nodra itubutubu era na ‘bula dede, ra qai tikovinaka ena vanua e solia vei ira na Kalou. (Vakarua 5:16) Era na sega ni totogitaki me vakai ira na gone era qase cake, nira vakalecalecava na Lawa ni Kalou qai talaidredre vei ira nodra itubutubu. (Vakarua 21:18-21) E sega vakadua ni veisau na ivakavuvuli ni lawa qori. (Efeso 6:1-3) Ke da qase se gone, eda na saumi taro vua na noda Dauveibuli. Me vaka ga na ka e yalataka, era na bula balavu o ira na gone era dokai koya kei ira nodra itubutubu. Era na nuitaka tale ga na inuinui ni bula tawamudu.—1 Timoci 4:8; 6:18, 19.

Na ivakaro ena Lako Yani 20:12 e tiko ena iVunau e Tini se Tini na Vosa. (Lako Yani 20:1-17) E tukuni ena ivakaro taumada na nodra itavi vua na Kalou, me vaka na nodra qaravi koya duadua ga. Sa qai vakamacalataka tarava na ka mera cakava vei ira eso tale, okati kina nodra yalodina vei ira na kedra isa, mera kua tale ga ni butako. Sa qai umani rau vata mai qori na ivakaro “rokova na tamamu kei na tinamu.”