“Me vakalagilagi na Kalou mai lomalagi, ia e vuravura, mera vakacegu o ira e vakadonuya na Kalou.”—Luke 2:14, Vakadewa ni Vuravura Vou.

 “Me vakalagilagi na Kalou mai lomalagi! Sautu e vuravura vei ira e vakadonuya na Kalou.”—Luke 2:14, Contemporary English Version.

 Qo na nodra vosa ni veivakacaucautaki na agilosi ena gauna e sucu kina o Jisu. E dusia ni o ira na vakabauti Jisu e rawa nira marautaka nona veivakadonui na Kalou, qai vakila na vakacegu.

 “Me vakalagilagi na Kalou mai lomalagi.” Era vakabibitaka na agilosi na matavosa qori ni dodonu me vakalagilagi duadua ga na Kalou. E dusia tale ga na nona sucu o Jisu, kei na nona cakacaka vakaitalatala e vakalagilagi kina na Kalou o Jiova. a Kena ivakaraitaki, o Jisu e dau vakavinavinakataka vua na Kalou na ka kece e vakavulica, e kaya: “E sega ni noqu na ka au vakavulica, e nei koya ga e talai au mai.” (Joni 7:16-18) Ni cakava mada ga eso na cakamana, era “vakalagilagia na Kalou” o ira na vakararai tu. (Luke 5:18, 24-26; Joni 5:19) Na nona mate mada ga e vakalagilagi kina na Kalou. E vakayacori kina na inaki ni Kalou, ya mera tawani vuravura na tamata yalododonu ra qai veiyaloni.—Vakatekivu 1:28.

 “E vuravura, mera vakacegu.” Na vakacegu qo e sega ni kena ibalebale ni na sega na ivalu. Ia e okati kina na vakacegu ni lomada, e rawati ga qori ena nona veivakadonui o Jiova. Ena vuku i Jisu ga e rawa nida veiyaloni kina kei na Kalou. (Jemesa 4:8) Ni Tui tale ga ni Matanitu ni Kalou, ena vakalesuya mai na vakacegu dina me tawamudu.—Same 37:11; Luke 1:32, 33.

 “O ira e vakadonuya na Kalou.” Na matavosa qori e dusi ira na vakabauta dina na Kalou, kei Jisu o koya a tala mai. E sega ni vakaibalebaletaka na nona lomani ira na tamata kece na Kalou se mani vakacava na nodra itovo, ivalavala, se na noda veilomani ga vakataki keda. Eso na vakadewa ni iVolatabu me vaka na King James Version, e vakadewataka na matavosa qori me “lomani ira na tamata kece.” Ia na ilavelave makawa vaKirisi e tautauvata kei na vakasama e vakadewataki kina ena Vakadewa ni Vuravura Vou kei na so tale na vakadewa ni gauna qo, ya na nodra veiyaloni o ira e vakadonuya na Kalou.—Raica “ Eso Tale na Vakadewa ni Luke 2:14.”

 E vakamacalataki ena Luke wase 2 na itekitekivu ni nona bula e vuravura o Jisu. Oti ga vakalailai na gauna e sucu kina, e rairai sara e dua na agilosi vei ratou na vakatawanisipi ratou “tu e tautuba ena bogi . . . eratou veisau yadra tiko ena vakatawai ni nodra qelenisipi.” b (Luke 2:4-8) E kaya na agilosi vei ratou na ‘itukutuku vinaka e marautaki.’ E tomana: “Sa sucu nikua na nomuni ivakabula o Karisito na Turaga, ena koro i Tevita.” (Luke 2:9-11) E tukuni vei ratou na vanua ratou na raici Jisu kina, ratou raica tale ga nodra vakalagilagia tiko na Kalou e milioni vakamilioni na agilosi. Ni ratou yaco yani i Peceliema, ratou raici Meri, Josefa kei Jisu ni se gonedramidrami. (Luke 2:12-16) Oti ratou lesu na ivakatawanisipi, ‘ratou vakalagilagia tale ga na Kalou ena vuku ni ka kece ratou rogoca qai raica.’—Luke 2:17-20.

 “Me nona na Kalou na lagilagi mai lomalagi, qai sautu e vuravura vei ira e vakadonuya.”—Luke 2:14, New International Version.

 “Me nona na Kalou na lagilagi mai lomalagi, qai sautu e vuravura vei ira e vakadonuya!”—Luke 2:14, Good News Translation.

 “Me vakalagilagi na Kalou cecere, qai sautu e vuravura vei ira e vakadonuya!”—Luke 2:14, English Standard Version.

 Sarava na ivakamacala lekaleka ni ivola na Luke.