“Kua vakadua ni lomaocaocataka na siga nimataka, ni siga nimataka e tu vata kei na kena lomaocaoca. Na siga kece sa dui tu ga na kena ca.”—Maciu 6:34, New World Translation.

“Kua ni leqataka na siga nimataka, na siga nimataka e tu vata kei na kena lomaocaoca. Na siga yadua e dui tu na kena ca.”—Maciu 6:34, New International Version.

E cavuta o Jisu na vosa qori qai vakadeitaka vei ira na rogoci koya mera kua ni lomaleqa, se kauaitaka vakasivia na leqa e se bera ni yaco. Ena yaga ga vei ira na vosa qori ke ra kauaitaka ga na siga yadua.

E sega ni kaya tiko o Jisu meda kua ni vakasamataka na veika nimataka, se lalawataka na veigauna se bera mai. (Vosa Vakaibalebale 21:5) E vukei keda ga meda kua ni lomaleqa, se kauaitaka vakasivia na ka ena rairai sega ni yaco nimataka. Qori ena rawa ni kauta tani noda marau, sega tale ga nida kauaitaka na ka meda cakava. Eda na sega ni rawa ni walia na leqa e se bera ni yaco. Eso na gauna e sega tale ga ni dau yaco na ka eda namaka, ia ke mani yaco na ka eda nanuma ena sega soti ni ca sara.

A cavuta o Jisu na Maciu wase 5-7 ena nona Vunau ena Ulunivanua. E vakamacalataka kina nida na sega ni marau, sega tale ga ni bula balavu ke da lomaocaoca. (Maciu 6:27) E kaya tale ga o Jisu ke da via vakaliuca na Kalou ena noda bula, e sega ni dodonu meda lomaocaocataka tiko na veika nimataka. Ke sa kauaitaki ira na manumanu kei na kau na Kalou, sa na wacava sara nona kauaitaki keda na qaravi koya.—Maciu 6:25, 26, 28-33.