“Sa tukuna oti vei iko, na tamata, na ka vinaka. Na cava tale e vinakata vei iko o Jiova? Mo lewadodonu ga, mo mareqeta na yalodina, mo yalomalumalumu tale ga ni o lako vata kei na nomu Kalou!—Maika 6:8, iVakadewa ni Vuravura Vou.

 “Sa vakaraitaka vei iko, na tamata, na ka vinaka. Na cava tale e vinakata vei iko na TURAGA? Mo caka dodonu ga, vinakata na yalololoma, mo yalomalumalumu tale ga ni drau lako vata kei na nomu Kalou.”—Maika 6:8, The Holy Bible—New International Version.

 E vakamacalataka na parofita o Maika, ni rawa nida vakamarautaka na Kalou o Jiova. a (1 Joni 5:3) E tukuni ena tikinivolatabu qori na ka e namaka vei keda na Kalou ena tolu na matavosa. Na imatai kei na ikarua ni matavosa, e baleta tiko na noda veimaliwai kei ira eso tale. Na ikatolu ni matavosa, e okati kina na noda veiwekani kei na Kalou.

 “Mo lewadodonu.” E vinakata na Kalou mera caka dodonu na nona dauveiqaravi. Qori e okati kina na ka era vakasamataka kei na ka era cakava, me salavata kei na ivakatagedegede ni Kalou ena ka e donu kei na ka e cala. (Vakarua 32:4) Kena ivakaraitaki, o ira era muria na ivakatagedegede ni Kalou, era na sega ni veivakaduiduitaki ra qai dau dina vei ira na tamata kece se mani vanua cava era cavutu mai kina, isususu se itutu.—Vunau ni Soro 19:15; Aisea 1:17; Iperiu 13:18.

 “Mareqeta na yalodina.” Na matavosa qo e rawa ni kena ibalebale tale ga “mo taleitaka na dei ni loloma.” (Maika 6:8, ivakamacala e ra) Na vosa taumada vakaIperiu ni “yalodina,” e sega ni kena ibalebale ga nomu yalodina vei nomu itokani. E vakaibalebaletaka tale ga nomu yalololoma qai kauaitaki koya, o na sega tale ga ni vakalaiva e dua na ka me tarova qori. E sega ni vinakata na Kalou vei ira na nona dauveiqaravi mera veikauaitaki ga qai yalololoma. Ia e vinakata sara ga mera mareqeta qai taleitaka na itovo qori. Kena ibalebale, mera marautaka nodra via vukei ira eso tale, vakabibi o ira era vakaleqai tu. Ni vakavu marau na soli ka.—Cakacaka 20:35.

 “Lako vata kei na nomu Kalou.” Ena iVolatabu na vosa “lako,” e rawa ni kena ibalebale nomu “muria e dua na ivakarau ni bula.” O koya e lako vata kei na Kalou ena muria na ivakarau ni bula e vakamarautaki koya. E ivakaraitaki vinaka kina o Noa. Ni yalododonu ena mata ni Kalou, e ‘lako vata kina kei na Kalou dina,’ qai “duatani vei ira na tabavata kei koya ni dodonu na nona ivalavala.” (Vakatekivu 6:9) Nikua, eda rawa ni ‘lako vata kei na Kalou’ nida bulataka na nona ivakavuvuli e tu ena nona Vosa na iVolatabu. Kena ibalebale, eda na yalomalumalumu ni vakaiyalayala ga na ka eda kila kei na ka eda rawa ni cakava, da qai vakararavitaka vua na Kalou na ka kece.—Joni 17:3; Cakacaka 17:28; Vakatakila 4:11.

 O Maika e dua na parofita e Isireli, qai bula donuya na ikawalu ni senitiuri B.G.V. Ena gauna qori, e levu era qaravi matakau, lawaki, ra qai dauveivakalolomataki. (Maika 1:7; 3:1-3, 9-11; 6:10-12) Levu gona na Isireli era talaidredre ena ivakaro ni Kalou e volai ena Lawa e soli vei Mosese. Levu tale ga era nanuma ni na vakadonui ira na Kalou ke ra cakava e dua na ivakarau ni sokalou, ra qai vakacaboisoro.—Vosa Vakaibalebale 21:3; Osea 6:6; Maika 6:6, 7.

 Oti e vica vata na senitiuri, e kaya tale o Jisu ni o Tamana e taleitaki ira na dauloloma, lewadodonu, ra qai yalololoma. Ia e cati ira na sokalou vakarairai. (Maciu 9:13; 22:37-39; 23:23) Na vosa qori i Jisu eda kila kina na ka e namaka na Kalou vei ira na qaravi koya ena gauna qo.

 Sarava na ivakamacala lekaleka ni vola i Maika.