“Sa yaco mai na gauna lokuci, sa voleka na Matanitu ni Kalou. Ni veivutuni, ni vakabauta na itukutuku vinaka.”—Marika 1:15, iVakadewa ni Vuravura Vou.

“Sa yaco mai na gauna, sa voleka tale ga na matanitu ni Kalou, ni veivutuni qai vakabauta na kosipeli.”—Marika 1:15, English Standard Version.

E kaya o Jisu Karisito vei ira na rogoci koya ni sa “voleka mai,” se “sa roro tiko mai” na Matanitu ni Kalou. a Ena Tui ni Matanitu qori o Jisu, e tiko tale ga kei ira ena gauna ya.

E sega ni vakaibalebaletaka tiko o Jisu ni sa tekivu veiliutaki na Matanitu ni Kalou. E tukuna ga vei ratou nona tisaipeli ni na qai basika ena gauna se bera mai. (Cakacaka 1:6, 7) E basika sara ga na Tui ni Matanitu ni Kalou ena yabaki e parofisaitaka tu na iVolatabu. b E kaya kina o Jisu: “Sa yaco mai na gauna lokuci”​—qori na gauna me tekivu kina nona cakacaka vakaitalatala me vunautaka na itukutuku vinaka ni Matanitu ni Kalou.—Luke 4:16-21, 43.

Me rawa ni yaga vei ira e levu na itukutuku vinaka ni Matanitu ni Kalou, ena vinakati mera veivutuni, oya nira rarawataka na veika ca era cakava ena gauna sa oti ra qai muria na ivakatagedegede ni Kalou. O ira na veivutuni era vakaraitaka nodra vakabauta na itukutuku vinaka ni Matanitu ni Kalou ena veiliutaki ena gauna se bera mai.

Ni tekivu nona cakacaka vakaitalatala o Jisu e Kalili, e kaya ena Maciu 4:17: “Me tekivu mai na gauna ya.” Kena ibalebale qori na gauna sa tekivu vunautaka kina o Jisu na Matanitu ni Kalou. E usutu ni nona cakacaka vakaitalatala na Matanitu ni Kalou. E cavuta mada ga vaka100 vakacaca na Matanitu ni Kalou ena va na Kosipeli. c Ni vakatauvatani kei na so tale na ulutaga, e vakamacalataka ga vakalevu o Jisu na veika me baleta na Matanitu ni Kalou.