IVAKAMACALA NI TIKINIVOLATABU
Maciu 6:33—“Vakaliuca Tiko ga na Matanitu ni Kalou”
“Dou vakaliuca tiko ga na Matanitu ni Kalou kei na nona yalododonu, ena qai vakaikuritaki vei kemudou na ka kece qo.”—Maciu 6:33, iVakadewa ni Vuravura Vou.
“Dou vakasaqara taumada na matanitu ni Kalou kei na nona yalododonu, ena qai soli me ikuri vei kemudou na ka kece ga qo.”—Maciu 6:33, New King James Version.
iBalebale ni Maciu 6:33
Na Matanitu ni Kalou e tiko mai lomalagi ena qai vakayacora na inaki ni Kalou e vuravura. (Maciu 6:9, 10) O koya e vakaliuca na Matanitu ni Kalou ena ka bibi duadua ena nona bula na matanitu qori. a Ena sega ni vulica wale ga na ka me baleta na Matanitu ni Kalou, ia ena tukuna tale ga vei ira eso tale na veika vinaka ena cakava. (Maciu 24:14) Ena masulaka tale ga me yaco mai na Matanitu ni Kalou.—Luke 11:2.
E okati ena yalododonu ni Kalou na nona ivakatagedegede ena veika e donu kei na ka e cala. (Same 119:172) O koya e vakaliuca na yalododonu ni Kalou ena muria na nona lawa savasava ni dau yaga tu ga.—Aisea 48:17.
Na matavosa ena qai vakaikuritaki vei kemudou e dusia nona yalataka na Kalou me vakarautaka na veika era gadreva o ira na vakaliuca nona Matanitu kei na nona ivakatagedegede.—Maciu 6:31, 32.
iKotokoto ni Maciu 6:33
Na veika e cavuta e ke o Jisu e okati ena Vunau ena Ulunivanua qai volai ena Maciu wase 5-7. Era dravudravua e levu era dau vakarogoci Jisu. De dua era nanuma mera vakaliuca na ka mera bula kina, qai lailai na gauna mera vakaliuca kina na Matanitu ni Kalou. Ia e uqeti ira o Jisu mera raica na sala e karona kina na Kalou na kau kei na manumanu e bulia. Ni yalataka me cakava tale ga qori vei ira era vakaliuca nona Matanitu.—Maciu 6:25-30.
Rai Cala me Baleta na Maciu 6:33
Rai cala: Ena vutuniyau o koya e vakaliuca na Matanitu ni Kalou.
Ka dina: E kaya o Jisu o ira na vakaliuca na Matanitu ni Kalou ena vakarautaki vei ira na ka era gadreva, me vaka na kakana kei na isulu. (Maciu 6:25, 31, 32) Ia e sega ni kaya nida na vutuniyau, se na levu ni yau eda taukena e vakaraitaka nona veivakalougatataki na Kalou. E kaya ga vei ira na vakarorogo mera qarauna na qarai ni iyau ni na vakadredretaka nodra vakaliuca na Matanitu ni Kalou. (Maciu 6:19, 20, 24) E cakacaka vakaukaua na yapositolo o Paula ena vuku ni Matanitu ni Kalou. Ia eso na gauna e lailai na ka vakayago e taukena. Me vakataki Jisu, e dau vakasalataki ira eso tale na rerevaki ni nodra saga mera vutuniyau.—Filipai 4:11, 12; 1 Timoci 6:6-10.
Rai cala: E sega ni vinakati vei ira na lotu vaKarisito mera cakacaka me rawa nira bula kina.
Ka dina: E kaya na iVolatabu ni vinakati vei ira na lotu vaKarisito mera cakacaka me rawa nira qaravi ira, kei na nodra vuvale. (1 Cesalonaika 4:11, 12; 2 Cesalonaika 3:10; 1 Timoci 5:8) E sega ni kaya o Jisu vei ira nona imuri mera vakaliuca duadua ga na Matanitu ni Kalou. E kaya ga mera vakaliuca na Matanitu ni Kalou.
O ira na vakaliuca na Matanitu ni Kalou ra qai cakacaka mera bula kina, e rawa nira vakararavi vua na Kalou me vakarautaka na veika era gadreva.—1 Timoci 6:17-19.
a Na ivakadewa ni vosa vaKirisi “Vakaliuca . . . tiko ga” e vakaibalebaletaka ni sega ni caka ga vakadua, e rawa ni vakadewataki tale ga me “vakasaqara tiko ga.” Koya gona, me bibi duadua na vakaliuci ni Matanitu ni Kalou, sega ni dodonu me caka ga vagauna se dua ga na gauna lekaleka.
Rawa ni o Wilika Tale ga
ESSENTIAL BIBLE TEACHINGS
Na Cava na Matanitu ni Kalou?
Ena cakacaka vakaitalatala i Jisu, e dau vakabibitaka na Matanitu ni Kalou. Sa balavu nodra masulaka tiko na nona imuri me yaco mai na Matanitu qori.
SAUMI NA TARO VAKAIVOLATABU
Na Cava ena Cakava na Matanitu ni Kalou?
Dikeva na ka meda namaka ni sa veiliutaki na Matanitu ni Kalou e vuravura.
VAKAMACALATAKI NA TIKINIVOLATABU
iVakamacala ni Filipai 4:6, 7—“Moni Kua ni Lomaocaocataka e Dua na Ka”
Na ivakarau ni masu cava ena vukei keda meda kua ni lomaleqa qai vakila na vakacegu?
SAUMI NA TARO VAKAIVOLATABU
Sala Meda Masu Kina—E Dodonu me Muri na Masu ni Turaga?
E vakadonuya ga na Kalou na Masu ni Turaga?
IVAKAVUVULI VAKAIVOLATABU
iVukevuke ni Vuli iVolatabu
Digia na iwalewale ena rawa ni vukei iko me yaga, qai marautaki nomu vulica na iVolatabu.
IVAKAVUVULI VAKAIVOLATABU
Tovolea na Vuli Qo
Na vuli iVolatabu qo ena sega ni saumi qai tiko e dua mo drau na veivosakitaka na iVolatabu.
