“Ni marau ena vuku ni nomuni inuinui. Ni vosota na veivakacacani. Ni gumatua ena masu.”—Roma 12:12, iVakadewa ni Vuravura Vou.

 “Dou reki ena inuinui, vosota na ka rarawa, ia tiko ga na masu.”—Roma 12:12, English Standard Version.

 E cavuta na yapositolo o Paula na tikinivolatabu qori, me vakayaloqaqataki ira na lotu vaKarisito e Roma mera cakava e tolu na ka me rawa nira yalodina nira vakacacani, se sotava na veika dredre.

 “Ni marau ena vuku ni nomuni inuinui.” Eso na lotu vaKarisito era na marautaka nodra inuinui ni bula tawamudu e lomalagi, e levu tale era na marautaka ena vuravura parataisi. (Same 37:29; Joni 3:16; Vakatakila 14:1-4; 21:3,4) E okati ena inuinui qori, nona vakaotia na Matanitu ni Kalou a na noda leqa kece na kawatamata. (Taniela 2:44; Maciu 6:10) Ke ra sotava mada ga na dauveiqaravi i Jiova na ituvaki dredre, e rawa nira marau tiko ga nira vakabauta ni na yaco dina na ka era nuitaka. Ena vakadonui ira tale ga na Kalou ke ra vosota tiko.—Maciu 5:11, 12; Roma 5:3-5.

 “Ni vosota na veivakacacani.” Ena iVolatabu, na vu vaKirisi ni “vosota” e dau vakaibalebaletaki nona “sega ni drovaka e dua na ituvaki e sotava, e vosota; yalodina tiko ga.” Era kila na imuri i Jisu nira na vakacacani nira “sega ni vakavuravura.” b Ena vinakati gona mera vosota. (Joni 15:18-20; 2 Timoci 3:12) Ke dua na lotu vaKarisito e vosota na veika dredre qai yalodina ni qaravi Jiova, ena vaqaqacotaki na nona inuinui. (Maciu 24:13) Na dei ni nona vakabauta ena vukei koya me vosota na veika dredre ena vosovoso kei na marau.—Kolosa 1:11.

 “Ni gumatua ena masu.” Ena vinakati vei ira na lotu vaKarisito mera masu tiko ga me rawa nira yalodina vua na Kalou. (Luke 11:9; 18:1) Era na nuitaki koya qai kerea nona veidusimaki ena ka kece era cakava. (Kolosa 4:2; 1 Cesalonaika 5:17) Nira muria nona ivakaro ra qai cakava na ka e vinakata, era nuidei ni na sauma na Kalou na nodra masu. (1 Joni 3:22; 5:14) Nodra gumatua tale ga ena masu, ena vukei ira na Kalou mera vosota qai yalodina tiko ga se mani vacava na dredre era sotava.—Filipai 4:13.

 A vola o Paula na ivola qori vei ira na lotu vaKarisito e Roma rauta na 56 G.V. Na wase 12 e vakasalataki ira kina o Paula na sala mera vakaraitaka na itovo vaKarisito, nodra veimaliwai kei ira na tacidra vakayalo kei ira eso tale, kei na nodra saga tiko ga na veiyaloni ke ra mani vakacacani. (Roma 12:9-21) A yaga dina vei ira na lotu vaKarisito na ivakasala qori, ni oti ga vakalailai era sotava na veivakacacani.

 Ena 64 G.V., a kama e levu na vanua ena siti o Roma. E levu era kaya ni vakavuna qori o empara Nero. E tukuna e dua na daunitukutuku makawa ni Roma o Tacitus, ni a beitaki ira na lotu vaKarisito o Nero nira vakavuna na ka e yaco qori me rawa ni taqomaki koya. Era lai tusaqati vakaukaua kina na lotu vaKarisito. Nona ivakasala gona o Paula vei ira na lotu vaKarisito ena ka mera cakava nira vakacacani, e vukei ira mera vosota qai yalodina tiko ga ena gauna dredre qori. (1 Cesalonaika 5:15; 1 Pita 3:9) Era ivakaraitaki vinaka dina vei keda na lotu vaKarisito ena gauna qo.

 Sarava na ivakamacala lekaleka ni ivola na Roma.