“E vakaraitaka na Kalou na nona lomani keda ni mai mate na Karisito ena vukuda nida se ivalavala ca tu.”—Roma 5:8, iVakadewa ni Vuravura Vou.

 “Na Kalou e vakatakila na nona loloma vei keda, ni sa mate na Karisito me keda isosomi nida sa tamata ca.”—Roma 5:8, New International Version.

 E vakaraitaka na Kalou o Jiova a na nona loloma levu ni tala mai na Luvena o Jisu Karisito, me mai mate ena vukuda na tamata ivalavala ca. (Joni 3:16) Nida ivalavala ca, e dau veisaqasaqa kei na ivakatagedegede savasava ni Kalou na noda rai, kei na ka eda cakava. (Kolosa 1:21, 22) Ia na Kalou e vakarautaka na sala meda veiyaloni kina kei koya, ya nona mai ‘mate o Luvena.’ (Roma 5:10) Qori e rawa kina meda veivolekati kei na Kalou ena gauna qo, qai nuitaka na bula tawamudu ena gauna se bera mai.—Roma 5:11; 1 Joni 4:9, 10.

 E vola na vosa qori na yapositolo o Paula vei ira na lotu vaKarisito e Roma. Ena wase 5 ni nona ivola vei ira mai Roma, e vakamacalataka o Paula na vuna mera marau kina na lotu vaKarisito, ra qai nuidei ena nodra inuinui. (Roma 5:1, 2) Na inuinui qori e “sega ni veivakamaduataki,” ni yavutaki ena nona loloma levu na Kalou ni soli Jisu me mai mate ena vukuda. (Roma 5:5, 6) O Jisu a talairawarawa tu ga vua na Kalou, qori na ka a sega ni cakava o Atama. (Roma 5:19) Nona talaidredre o Atama e vakavuna mera valavala ca, qai mate na nona kawa. (Roma 5:12) Ia na nona talairawarawa kei na nona mai mate vakaisoro o Jisu, e rawa kina vei ira na kawatamata talairawarawa mera nuitaka na bula tawamudu.—Roma 5:21.