IVAKAMACALA NI TIKINIVOLATABU
Roma 6:23—“Na iSau ni iValavala ca na Mate, ia na iLoloma ni Kalou na Bula Tawamudu”
“Na isau ni ivalavala ca na mate, ia na iloloma ni Kalou na bula tawamudu ena vuku i Karisito Jisu na noda Turaga.”—Roma 6:23, Vakadewa ni iVuravura Vou.
“Ni sa isau ni valavala ca na mate: ia e isolisoli ga ni Kalou na bula tawamudu, e na vuku i Jisu Karisito na noda Turaga.”—Roma 6:23, New International Version.
iBalebale ni Roma 6:23
E vakamacalataka na tikinivolatabu qo na yapositolo o Paula, nida mate na kawatamata ena vuku ni ivalavala ca. Ia e vakarautaka na Kalou vei ira na nona dauveiqaravi, na inuinui totoka ni bula tawamudu.
“Na isau ni ivalavala ca na mate.” Eda sucu ivalavala ca kece qai rawarawa na noda dau cala. a (Same 51:5; Dauvunau 7:20) Qori e vakavuna na noda qase qai mate.—Roma 5:12.
E vakatauvatana na yapositolo o Paula na ivalavala ca me vaka e dua na boso e saumi ira na tamata cakacaka. Me vaka ga na nodra namaka na veisaumi, eda namaka tale ga nida na mate ena vuku ni noda ivalavala ca.
Ia e vakamacalataka o Paula ni dua “sa mate sa bokoci na nona ivalavala ca.” (Roma 6:7) Kena ibalebale, ni dua e mate e sa sereki mai na nona ivalavala ca kece. Meda kua gona ni nanuma nira na lai vakararawataki na mate ena vuku ni nodra ivalavala ca. E vakamatatataka na iVolatabu ni o ira na mate era sega sara ni kila, se cakava e dua na ka.—Dauvunau 9:5.
“Ia na iloloma ni Kalou na bula tawamudu ena vuku i Karisito Jisu.” Me veibasai kei na “isau” ni ivalavala ca, e vakarautaka na Kalou na iloloma ni bula tawamudu. Na vosa taumada “loloma” e rawa tale ga ni vakadewataki me “iloloma soli wale,” se “iloloma talei.” E kena ibalebale ni soli na iloloma vua e dua e sega sara ga ni ganiti koya. E sega gona ni rawa ni dua e ivalavala ca e rawa ni vakabulai koya, se me rawata ga vakataki koya na bula tawamudu. (Same 49:7, 8) Ia na Kalou e vakarautaka na iloloma soli wale ni bula tawamudu vei ira na vakaraitaka nira vakabauti Jisu.—Joni 3:16; Roma 5:15, 18.
Tikina Wavolita na Roma 6:23
Ena 56 G.V, e vola na ivola qo o Paula vei ira na lotu vaKarisito e Roma. Rairai e so vei ira e cala na nodra rai me baleta na yalololoma ni Kalou. E vakacalai ira na vuku vaKirisi, rairai era nanuma kina na levu ga ni nodra valavala ca, ena vosoti ira tale ga vakalevu na Kalou. (Roma 6:1) Era na rairai kaya tale ga eso nira na sega ni totogitaki ena nodra cala, nira sa sega ni vakarurugi ena Lawa e soli vei Mosese. (Roma 6:15) E vakabibitaka ena nona ivola o Paula ni na sega ni yaga vei ira na lotu vaKarisito na nona loloma na Kalou, ke ra vakalaiva me lewai ira na ivalavala ca.—Roma 6:12-14, 16.
Na veika e tukuna qori o Paula, e vakadeitaka vei ira na dauveiqaravi ni Kalou nikua, ni tiko na nodra inuinui dina ga nira sucu ivalavala ca. Ke ra talairawarawa ina ivakatagedegede ni Kalou qai vorata na nodra gagadre ca, era na rawata na bula tawamudu.—Roma 6:22.
Sarava na ivakamacala lekaleka ni ivola na Roma.
a Ena iVolatabu, na vosa “ivalavala ca” e vakaibalebaletaki na ka e caka se itovo e sega ni salavata kei na ivakatagedegede ni Kalou. (1 Joni 3:4) Wilika na ulutaga “Na Cava na iValavala Ca?”
Rawa ni o Wilika Tale ga
NA VALE NI VAKATAWA
O Rawa ni Bula Tawamudu e Vuravura
E vakamacalataki ena iVolatabu na inaki ni Dauveibuli me baleta na kawatamata.
ESSENTIAL BIBLE TEACHINGS
Na Cava a Mate Kina o Jisu?
E raica vakabibi na iVolatabu na mate i Jisu. Vakacava, e tiko na inaki ni nona mate?
VAKAMACALATAKI NA TIKINIVOLATABU
iVakamacala ni Joni 3:16—“Na Levu ni Nona Lomani Vuravura na Kalou”
E vakaraitaka vakacava na Kalou ni lomani keda vakayadudua qai vinakata meda rawata na bula?
IVAKAVUVULI VAKAIVOLATABU
iVukevuke ni Vuli iVolatabu
Digia na iwalewale ena rawa ni vukei iko me yaga, qai marautaki nomu vulica na iVolatabu.
IVAKAVUVULI VAKAIVOLATABU
Tovolea na Vuli Qo
Na vuli iVolatabu qo ena sega ni saumi qai tiko e dua mo drau na veivosakitaka na iVolatabu.
