IVAKAMACALA NI TIKINIVOLATABU
Same 23:4—“Keu Lakova na Buca Butobuto Loaloa”
“Keu lakova na buca butobuto loaloa, au na sega ni rerevaka na ca, ni oni tiko vata kei au, e vakataudeitaki au na nomuni ititoko kei nomuni matanakilagi.”—Same 23:4, iVakadewa ni Vuravura Vou.
“Io, kevaka au sa lako e loma ni buca ni yaloyalo ni mate, au na sega ni rerevaka na ca, ni kemuni sa tiko vata kei au. Ena vakacegui au na nomuni ititoko kei na nomuni matanakilagi.“—Same 23:4, King James Version.
iBalebale ni Same 23:4 a
Na Kalou ena taqomaki ira na sokaloutaki koya ke mani dredre vacava na ituvaki era sotava. Na tikinivolatabu qo e vakatauvatana nona taqomaki ira nona dauveiqaravi o Jiova me vaka nona taqomaki ira nona sipi na kena ivakatawa. b Era na sega ni galili nira sotava na ituvaki dredre e vaka tiko na buca buto loaloa, se ituvaki rerevaki. Era na taqomaki ni tu e yasadra na Kalou.
Ena gauna vakaivolatabu, ena vakayagataka na ivakatawa ni sipi na ititoko me taqomaki ira na sipi vei ira na manumanu rerevaki. Ena vakayagataka nona ititoko balavu e takelo na muana me dusimaki ira na sipi mera kua ni vakaleqai. Na Kalou o Jiova e vaka tiko na iVakatawa dauloloma. E taqomaki ira qai dusimaki ira era sokaloutaki koya. Se mani vacava sara na dredre ni ituvaki era sotava, ena taqomaki ira tu ga o Jiova ena levu na sala.
E dusimaki ira, vakacegui ira tale ga ena nona Vosa na iVolatabu.—Roma 15:4.
E rogoca nodra masu, e solia tale ga vei ira na vakacegu ni vakasama kei na lomadra.—Filipai 4:6, 7.
E vakayagataki ira nona dauveiqaravi mera veivakayaloqaqataki.—Iperiu 10:24, 25.
Solia vei ira na inuinui totoka se bera mai, ena qai vakaotia kina na ituvaki dredre era sotava tiko qo.—Same 37:29; Vakatakila 21:3-5.
iKotokoto ni Same 23:4
E vola o Tevita na Same 23. E ivakatawa ni sipi ena gauna se cauravou kina, a tui tale ga ena matanitu o Isireli. (1 Samuela 17:34, 35; 2 Samuela 7:8) E vakamacalataka ena itekitekivu ni Same 23, ni o Jiova na iVakatawa e tuberi ira, vakani ira, qai vakabulabulataki ira nona dauveiqaravi. Me vaka ga e cakava na ivakatawa ni sipi vei ira nona sipi.—Same 23:1-3.
E vakabibitaka o Tevita ena Same 23:4 nona veitaqomaki na Kalou. E sega ni vakamacalataka tiko ga na Kalou, ia sa vosa sara tiko ga vua. Qori e vakaraitaka nodrau veivolekati o Tevita kei Jiova. E kila o Tevita ni kauaitaki koya na Kalou, e kila vinaka tale ga na ituvaki dredre e sotava. E sega gona ni dua na ka e rerevaka o Tevita.
Ena ika23 ni Same tikina 5 kei na 6, sa veisau na ivakatautauvata ni sipi kei na ivakatawanisipi ina vulagi kei koya e veisureti. O Jiova e vaka tiko na dauveisureti e lomasavu, e okati Tevita me vulagi dokai. E sega mada ga na kaukaua vei ira na meca mera tarova nona taqomaki Tevita na Kalou. Ena iotioti ni Same 23, e vakamacalataka o Tevita nona nuidei ni na vakaraitaka vua na Kalou na yalovinaka kei na loloma ena nona bula taucoko.
Na vosa vakatautauvata e cavuti ena Same 23, e vakamacalataka na Kalou ena lomani ira tu ga nona dauveiqaravi.—1 Pita 2:25.
a Eso na iVolatabu era okata na Same qo me Same 22. E 150 kece na Same, ia eso na iVolatabu era wasewasea nira vakayagataka na ilavelave ni iVolatabu vakaIperiu era lavetaka na Masorete. Eso tale era muria na ivakadewa vaKirisi na Septuagint, e vakadewataki ena vosa vakaIperiu qai vakacavari ena ikarua ni senitiuri B.G.V.
b Na Kalou na yacana o Jiova, e vakamacalataki ena iVolatabu me vaka na iVakatawa dauloloma. O ira nona dauveiqaravi era vaka na sipi ra qai nuitaka nona veitaqomaki kei na nona veitokoni.—Same 100:3; Aisea 40:10, 11; Jeremaia 31:10; Isikeli 34:11-16.
Rawa ni o Wilika Tale ga
VAKAMACALATAKI NA TIKINIVOLATABU
iVakamacala ni Filipai 4:6, 7—“Moni Kua ni Lomaocaocataka e Dua na Ka”
Na ivakarau ni masu cava ena vukei keda meda kua ni lomaleqa qai vakila na vakacegu?
NA VALE NI VAKATAWA
E Dau Rogoca na Kalou Noda Masu?
E tukuna vei keda na iVolatabu ni rogoca na Kalou na noda masu ena sala e vakadonuya.
ESSENTIAL BIBLE TEACHINGS
Na cava e Vakatara Tiko Kina na Kalou na Rarawa?
Levu era vakataroga na cava sa rui levu kina na veicati kei na rarawa. E tiko ena iVolatabu na kena isau veivakacegui.
NA VALE NI VAKATAWA
Yaga ni Nona Kauaitaki Iko na Kalou
Na iVolatabu ena vaqaqacotaka noda vakabauta na yalayala i Jiova me baleta na gauna se bera mai.
IVAKAVUVULI VAKAIVOLATABU
iVukevuke ni Vuli iVolatabu
Digia na iwalewale ena rawa ni vukei iko me yaga, qai marautaki nomu vulica na iVolatabu.
IVAKAVUVULI VAKAIVOLATABU
Tovolea na Vuli Qo
Na vuli iVolatabu qo ena sega ni saumi qai tiko e dua mo drau na veivosakitaka na iVolatabu.
