IVAKAMACALA NI TIKINIVOLATABU
Same 37:4—“Mo Rekitaka na TURAGA”
“Mo rekitaki Jiova, ena qai solia vei iko na veika e gadreva na lomamu.”—Same 37:4, Vakadewa ni Vuravura Vou.
“Mo rekitaka na TURAGA, ena qai solia vei iko na ka e gadreva na lomamu.”—Same 37:4, English Standard Version.
iBalebale ni Same 37:4
Na daunisame e uqeti ira na dauveiqaravi ni Kalou mera marautaka nodra veitokani voleka kei koya. Mera nuidei tale ga ni na vakarautaka na Kalou o Jiova a na ka era gadreva.
“Mo rekitaki Jiova.” Na vosa qo e rawa ni vakadewataki tale ga me “vakasaqara na nomu marau levu duadua vei Jiova,” “mo rekitaka nomu qarava na TURAGA,” se “mo marautaka na ka e yalataka vei iko na TURAGA.” E dodonu meda “vakasaqara na [noda] marau levu duadua” nida qarava na Kalou dina. (Same 37:4, ivakamacala e ra) Na vuna?
O ira na qaravi Jiova e tiko vei ira na nona rai e tukuni ena iVolatabu. Era sega wale ga ni kilai koya, ia era kila ni dodonu mera talairawarawa vua. Era saga gona me vinaka nodra lewaeloma, era sega tale ga ni sotava e levu na leqa. (Vosa Vakaibalebale 3:5, 6) Kena ivakaraitaki, era sega ni cudru se vuvu nira rawaka na daukocokoco se o ira na daulawaki. (Same 37:1, 7-9) Era marau ni sa voleka ni muduka na Kalou na veika tawadodonu kece, ra qai vakaicovitaki ena nodra itovo vinaka. (Same 37:34) Era marautaka tale ga nira kila ni vakadonui ira na Tamadra vakalomalagi.—Same 5:12; Vosa Vakaibalebale 27:11.
‘Ena solia vei iko na veika e gadreva na lomamu.’ Na vosa qori e rawa tale ga ni vakadewataki “ena sauma o koya na nomu masu,” se “ena solia vei iko na ka o vinakata.” O Jiova ena sega ni solia vei keda na ka ga eda vinakata. Me vaka e dua na itubutubu vinaka, e kila tu o koya na ka e vinaka duadua vei keda. Na ka tale ga eda kerea kei na noda ivakarau ni bula e dodonu me salavata kei na nona ivakatagedegede. (Vosa Vakaibalebale 28:9; Jemesa 4:3; 1 Joni 5:14) Ena rawa kina meda torovi koya na “Daurogo masu,” eda nuidei tale ga ni na rogoci keda.—Same 65:2; Maciu 21:22.
Tikina Wavolita na Same 37:4
O Tui Tevita e vola na Same 37. Era leleka ga na iyatuvosa, na ituvatuva tale ga e volai kina e vakatau ena matanivola e vakayagataki. b
E levu na veika tawadodonu e sotava o Tevita. E vakasasataki koya o Tui Saula, kei na so tale era via vakamatei koya. (2 Samuela 22:1) Ia e nuitaki Jiova tu ga o Tevita, e kila tale ga nira na totogitaki na tamata ca. (Same 37:10, 11) Ke ra rawaka mada ga me vaka na “na co vou e drokadroka,” era na vakarusai ga.—Same 37:2, 20, 35, 36.
Na Same 37 e vakamacalataka na ka ena yacovi ira na muria na ivakatagedegede ni Kalou, kei ira na sega ni muria. (Same 37:16, 17, 21, 22, 27, 28) Na same qo e vukei keda meda rawata na vuku, me vakadonui keda tale ga na Kalou.
Sarava na ivakamacala lekaleka ni ivola na Same.
a Jiova, qori na vakaviti ni va na matanivola vakaIperiu ni yaca ni Kalou. Mo kila na vuna era vakayagataka kina e levu na vakadewa ni iVolatabu na icavuti Turaga ra qai sega ni vakayagataka na yaca ni Kalou, wilika na ulutaga “O Cei o Jiova?”
b Dua na tikina ena dua na iwasewase e tekivutaki ena matanivola vakaIperiu, na iwasewase tarava ena ikarua ni matanivola, kei na so tale. De kena inaki meda nanuma kina.
Rawa ni o Wilika Tale ga
NA VALE NI VAKATAWA
E Dau Rogoca na Kalou Noda Masu?
E tukuna vei keda na iVolatabu ni rogoca na Kalou na noda masu ena sala e vakadonuya.
ESO TALE NA ULUTAGA
iNuinui Totoka ena Veigauna se Bera Mai
Cava e duidui kina na ka era yalataka na tamata, kei na ka e yalataka na iVolatabu me baleta na veigauna se bera mai?
IVAKAVUVULI YAGA VAKAIVOLATABU
Rawa Vakacava Nida Veitokani kei na Kalou?
Sa vica vata na senitiuri na nodra via kila e levu na Dauveibuli. E rawa ni vukei keda na iVolatabu meda veitokani kei na Kalou. E tekivu qori nida vulica na yacana.
VAKAMACALATAKI NA TIKINIVOLATABU
Vakamacalataki na Maciu 11:28-30—“Dou Lako Mai Vei Au, . . . Ka’u na Vakacegui Kemudou”
Vakacava e yalataka o Jisu ni na vakacegui ira mai na ituvaki dredre kece ena gauna sara ga ya?
IVAKAVUVULI VAKAIVOLATABU
iVukevuke ni Vuli iVolatabu
Digia na iwalewale ena rawa ni vukei iko me yaga, qai marautaki nomu vulica na iVolatabu.
IVAKAVUVULI VAKAIVOLATABU
Tovolea na Vuli Qo
Na vuli iVolatabu qo ena sega ni saumi qai tiko e dua mo drau na veivosakitaka na iVolatabu.
