“Moni soro qai kila ni o yau na Kalou. Au na vakacerecerei ena kedra maliwa na veimatanitu, au na vakacerecerei e vuravura.”—Same 46:10, iVakadewa ni Vuravura Vou.

 “Dou tiko lo, qai kila niu sa Kalou: Au na vakalevulevui ena veimatanitu, au na vakalevulevui e vuravura.”—Same 46:10, King James Version.

 E uqeti keda kece na Kalou meda sokaloutaki koya, qai doka na dodonu ni nona veiliutaki e vuravura. Ke da via bula tawamudu e dodonu meda kila qai vakavinavinakataka na nona kaukaua kei na nona lewa.—Vakatakila 4:11.

 “Moni soro qai kila ni o yau na Kalou.” Eso na iVolatabu e vakadewataka na imatai ni matavosa qori me “tiko lo.” Levu era nanuma cala kina nida vakaroti tiko meda veidokai se tiko lo e valenilotu. Ia na vakadewa vakaIperiu ni matavosa “moni soro qai kila ni o yau na Kalou,” e veivakaroti tiko kina na Kalou o Jiova a vei ira na veimatanitu e vuravura mera kua ni tusaqati koya tiko, mera kila tale ga ni o koya duadua ga me sokaloutaki.

 Qori e via tautauvata kei na ka e tukuni ena Same 2. E yalataka kina na Kalou ni na vakataulewataki ira na tusaqati koya tiko. Ia o ira na vakamalumalumu ena nona lewa era na vakararavi ena nona veidusimaki, kaukaua kei na nona vuku. Nira “lai vakaruru vua,” era na marau qai nuidei nira sotava na ituvaki dredre.—Same 2:9-12.

 “Au na vakacerecerei ena kedra maliwa na veimatanitu, au na vakacerecerei e vuravura.” Ena gauna makawa, e dau vakacerecerei na Kalou o Jiova ni vakayagataka nona kaukaua me taqomaki ira nona tamata. (Lako Yani 15:1-3) Ena veigauna se bera mai, ena vakacerecerei ena ivakatagedegede e levu sara, nira na sokaloutaki koya qai vakamalumalumu ina nona veiliutaki na lewe i vuravura taucoko.—Same 86:9, 10; Aisea 2:11.

 E kaya e dua na ivola me baleta na Same 46, qo “na sere e vakalagilagi kina na kaukaua ni Kalou ni dau vala ena vukudra nona tamata.” Nira lagata na dauveiqaravi ni Kalou na Same 46, era vakaraitaka kina nira nuitaka ni rawa ni taqomaki ira, qai vukei ira o Jiova. (Same 46:1, 2) Era na sega kina ni guilecava ni o Jiova ena tokoni ira tu ga.—Same 46:7, 11.

 Me rawa nira vaqaqacotaka nodra nuitaka na kaukaua ni nona veitaqomaki o Jiova, e kaya na daunisame mera dau vakasamataka nona cakacaka veivakurabuitaki. (Same 46:8) Dua ya, na nona rawa ni vakaotia na ivalu. (Same 46:9) E vaka ga nona vakaotia na ivalu ena gauna vakaivolatabu ni taqomaki ira nona tamata mai vei ira na kedra meca. Ia e yalataka na iVolatabu ni sa vakarau cakava qori na Kalou ena sala e uasivi sara, ni na vakaotia na veivaluvaluti e vuravura taucoko.—Aisea 2:4.

 Vakacava e se taqomaki ira tiko ga o Jiova na nona dauveiqaravi nikua? Io. E uqeti ira mada ga na lotu vaKarisito na yapositolo o Paula mera vakararavi vei Jiova nira vinakata na veivuke. (Same 13:6) Na veika e volai ena Same 46 e vaqaqacotaka noda nuitaka na nona veitaqomaki na Kalou. E uqeti keda meda okata na Kalou me “noda ivakaruru kei na kaukaua.”—Same 46:1.

 Sarava na ivakamacala lekaleka ni ivola na Same