IVAKAMACALA NI TIKINIVOLATABU
Tiko Voli Mai na Lekutu 6:24-26—“Me Vakalougatataki Iko na TURAGA Qai Maroroi Iko”
“Me vakalougatataki iko o Jiova qai maroroi iko. Me serau mada ga vei iko na mata i Jiova, me lomani iko tale ga. Me tacake mada ga vei iko na mata i Jiova, me solia tale ga vei iko na vakacegu.”—Tiko Voli Mai na Lekutu 6:24-26, Vakadewa ni Vuravura Vou.
“Me vakalougatataki iko na TURAGA qai maroroi iko; me cilavi iko na mata ni TURAGA qai yalololoma vei iko; me vakanamata vei iko na TURAGA qai solia vei iko na vakacegu.”—Tiko Voli Mai na Lekutu 6:24-26, New King James Version.
iBalebale ni Tiko Voli Mai na Lekutu 6:24-26
E kilai tu me nodra vosa ni veivakalougatataki na bete se o Eroni na imatai ni bete levu e Isireli. (Lako Yani 28:1) Na Kalou sara ga e cavuta na vosa ni veivakalougatataki qori. (Tiko Voli Mai na Lekutu 6:22, 23) E kaya na Kalou vei Mosese: “Tukuna vei Eroni kei rau na luvena, ‘Vosa vakalougatataki ira va qo na Isireli,’” oti e cavuta sara na ka e tukuni ena Tiko Voli Mai Lekutu 6:24-26. Era muria na bete yalodina na ivakaro vakalou qori, ra qai doka na yaca ni Kalou o Jiova. a E tukuni ena tikina e 27: “Mera [ira na bete] vakatoka na yacaqu vei ira na lewe i Isireli, meu vakalougatataki ira kina.”
“Me vakalougatataki iko o Jiova qai maroroi iko.” O Jiova e vakalougatataki ira nona dauveiqaravi ni taqomaki ira, dusimaki ira, mera marautaka tale ga na bula. (Vosa Vakaibalebale 10:22) E cavuti ena Tiko Voli Mai na Lekutu 6:24-26, na vosa “iko” e vakaibalebaletaka na le dua. E sega ni vinakata wale ga na Kalou me vakalougatataka na matanitu o Isireli, ia e via vakalougatataki ira yadua sara ga.
“Me serau mada ga vei iko na mata i Jiova, me lomani iko tale ga.” Nona kerea e dua ‘me serau na mata i Jiova vua,’ e vakaraitaka ni vinakata nona veivakadonui kei na nona loloma. b E rawa ni vakadewataki tale ga: “Me matadredredre vei iko na TURAGA.” (Tiko Voli Mai na Lekutu 6:25, New International Reader’s Version) O Jiova e vakadonui ira nona tamata ni yalololoma qai yalovinaka vei ira.—Aisea 30:18.
“Me tacake mada ga vei iko na mata i Jiova, c me solia tale ga vei iko na vakacegu.” E ‘tacake na matana’ vei ira nona dauveiqaravi ni kauaitaki ira vakayalololoma qai vakacegui ira. E vakamacalataki ena dua na ivola, “na vosa vakaIperiu ni vakacegu (shalom) e sega ni kena ibalebale ga na noda veiyaloni kei ira eso tale. Ia e vakaibalebaletaka tale ga noda bulabula vakayago qai vinaka noda veiwekani kei na Kalou.”
E vinakati mera talairawarawa na Isireli vei Jiova me rawa ni yaga vei ira na vosa ni veivakalougatataki ena tikinivolatabu qo. (Vunau ni Soro 26:3-6, 9) O Jiova ena vukei ira me vaka ga e yalataka. E vakadinadinataki qori ena gauna era veiliutaki kina eso na tui, me vakai Solomoni kei Esekaia.—1 Tui 4:20, 25; 2 Veigauna 31:9, 10.
E sega ni vinakati sara vei ira na lotu vaKarisito mera cavuta na vosa ni veivakalougatataki qo. Ia e rawa nira vakatotomuria na ka e cavuti kina nira masulaki ira eso tale, se vakayaloqaqataki ira na tacidra vakayalo. (1 Cesalonaika 5:11, 25) E sega ni veiveisau o Jiova ni vinakata me vakalougatataki ira nona dauveiqaravi yalodina, me taqomaki ira tale ga. E rawa gona nira vakila na vakacegu na lotu vaKarisito dina, ni serau vei ira na “mata” i Jiova qai vakadonui ira.
Tikina Wavolita na Tiko Voli Mai na Lekutu 6:24-26
E vakamacalataki ena imatai ni tini na wase ni Tiko Voli Mai na Lekutu, na ivakaro ni Kalou vei ira na Isireli nira keba tiko ena Ulunivanua o Saineai ena nodra ilakolako ena Vanua Yalataki. E rauta ni dua na yabaki nodra keba toka e kea. E tuvanaki ira kina o Jiova mera lewe ni dua na matanitu, e solia tale ga vei ira na ivakaro e kilai me Lawa ni veiyalayalati.
E tukuna tale ga o Jiova vei Mosese na sala me ratou vakalougatataki ira kina na Isireli o Eroni kei rau na luvena tagane, ratou digitaki me bete. (Tiko Voli Mai na Lekutu 6:22, 23) Oti qori sa qai vakayagataka o Eroni kei ira nona kawa na vosa e volai ena Tiko Voli Mai na Lekutu 6:24-26 me vakalougatataka na matanitu o Isireli. Toso na gauna, sa dau kena ivakarau vei ira na bete mera cavuta na vosa ni veivakalougatataki qori ni caka oti na iotioti ni vakacaboisoro ena valenisoro.
Sarava na ivakamacala lekaleka ni ivola na Tiko Voli Mai na Lekutu.
a Jiova, qori na vakaviti ni va na matanivola vakaIperiu ni yaca ni Kalou. Mo kila na vuna era vakayagataka kina e levu na vakadewa ni iVolatabu na icavuti Turaga ra qai sega ni vakayagataka na yaca ni Kalou, wilika na ulutaga “O Cei o Jiova?”
b Ia e kaya na iVolatabu ni o Jiova ena vunitaka na matana vei ira na Isireli ke ra cakava e dua na ka e sega ni vakadonuya.—Aisea 59:2; Maika 3:4.
c E kaya na NIV Study Bible na cavuti wasoma ni yaca ni Kalou, e dusia ni “vakabibitaki na vosa qori ena [tikina 27].” Ia era tukuna eso ni tokona na ivakavuvuli ni Letoluvakalou. E sega ni dina qori, e kaya e dua na ivakamacala ni iVolatabu na vakayagataki vakatolu ni yaca ni Kalou ena tikinivolatabu ya, “era sega ni nanuma kina na bete se o ira na vakarorogo ni vakaibalebaletaka na Letoluvakalou. Ia vei ira e kena ibalebale ga nira vinakata mera vakalougatataki vakalevu.” (The Pulpit Commentary, Volume 2, tabana e 52) Me ikuri ni ivakamacala, raica na ulutaga “E Vakaivolatabu na iVakavuvuli ni Letoluvakalou?”
Rawa ni o Wilika Tale ga
VAKAMACALATAKI NA TIKINIVOLATABU
iVakamacala ni Same 23:4—“Keu Lakova na Buca Butobuto Loaloa”
Era vakila vakacava na dauveiqaravi ni Kalou nona veitaqomaki nira sotava na ituvaki dredre?
ESSENTIAL BIBLE TEACHINGS
E Tiko na Yaca ni Kalou?
E levu na kena icavuti na Kalou me vaka, o koya e Kaukaua Duadua, Dauveibuli, kei na Turaga. Ia e volai na yaca ni Kalou ena sivia ni 7,000 na vanua ena iVolatabu.
VAKAMACALATAKI NA TIKINIVOLATABU
Vakamacalataki na Joni 14:27—“Au sa Laiva Vei Kemudou na Vakacegu”
Na vakacegu cava e solia o Jisu vei ratou nona yapositolo? Eda na rawata vakacava?
IVAKAVUVULI VAKAIVOLATABU
iVukevuke ni Vuli iVolatabu
Digia na iwalewale ena rawa ni vukei iko me yaga, qai marautaki nomu vulica na iVolatabu.
IVAKAVUVULI VAKAIVOLATABU
Tovolea na Vuli Qo
Na vuli iVolatabu qo ena sega ni saumi qai tiko e dua mo drau na veivosakitaka na iVolatabu.
