IVAKAMACALA NI TIKINIVOLATABU

Vakatekivu 1:1—“Ena iVakatekivu e Bulia na Lomalagi kei na Vuravura na Kalou”

SARAVA/ROGOCA

“Ena ivakatekivu e bulia na lomalagi kei na vuravura na Kalou.”—Vakatekivu 1:1, iVakadewa ni Vuravura Vou.

“Ena ivakatekivu e bulia na lomalagi kei na vuravura na Kalou.”—Vakatekivu 1:1, King James Version.

iBalebale ni Vakatekivu 1:1

Na vosa e cavuti taumada qori ena iVolatabu, e vakaraitaka e rua na ka dina. Kena imatai, e tiko na itekitekivu ni “lomalagi kei na vuravura,” se na vuravura eda tiko kina qo. Kena ikarua, e buli ira sara ga na Kalou.—Vakatakila 4:11.

E sega ni tukuni ena iVolatabu na balavu ni gauna e bulia kina na vuravura na Kalou, se na sala e bulia kina. E vakamacalataka ga ni bulia na vuravura ena nona “kaukaua levu kei na nona igu vakatubuqoroqoro.”—Aisea 40:26.

Na vosa “buli” e vakadewataki ena vosa vakaIperiu e dusia na ka duadua ga e cakava na Kalou. a Ena iVolatabu e vakatokai duadua ga o Jiova b me Dauveibuli.—Aisea 42:5; 45:18.

iKotokoto ni Vakatekivu 1:1

E vakamacalataki taumada ena Vakatekivu wase 1 kei na 2 na kena buli na vuravura. Ena Vakatekivu 1:1 me yaco ena 2:4, e vakamacalataka vakalekaleka na sala e bulia kina na vuravura na Kalou, kei na ka kece era bula kina, wili kina na imatai ni tagane kei na yalewa. Oti na ivakamacala qori, sa qai vakamacalataka vakamatailalai na iVolatabu nona buli na tagane kei na yalewa.—Vakatekivu 2:7-25.

E tukuni ena Vakatekivu ni bulibuli na Kalou ena loma ni ono na “siga.” Kena ibalebale, e taura toka e dua na gauna balavu na bulibuli qori, sega ni loma ga ni 24 na aua. Io, na vosa “siga” e rawa ni vakaibalebaletaka e dua na gauna balavu. Kena ivakaraitaki ena Vakatekivu 2:4, na vosa “siga” e tautauvata kei na “gauna.” Kena ibalebale, nona bulibuli na Kalou ena ono na siga e taura toka e dua na gauna balavu, sega ni ‘dua ga na siga.’

Rai Cala me Baleta na Vakatekivu 1:1

Rai cala: Na Kalou e bulia na vuravura ena vica na udolu na yabaki sa oti.

Ka dina: E sega ni tukuni ena iVolatabu na gauna e buli kina na vuravura. Na matavosa ena Vakatekivu 1:1, e veidonui vinaka kei na ka era nanuma saenitisi ni buli na vuravura ena vica vata na bilioni na yabaki sa oti. c

Rai cala: Na Vakatekivu 1:1 e dusia na Kalou e tiki ni Letoluvakalou, ni levu tu na ibalebale ni “Kalou” ena vosa vakaIperiu ni tikina qori.

Ka dina: Na icavuti “Kalou” e kena ibalebale vakaIperiu ’Elo·him,ʹ qori e dusia ni cecere se lagilagi, sega ga ni vakaibalebaletaka na iwiliwili ni tamata. E kaya na New Catholic Encyclopedia ena vosa ’Elo·himʹ e tiko ena Vakatekivu 1:1, “e sega ni kena ibalebale na naba, ia e dusia e dua na ka e cecere, qai vakaibalebaletaki vei ira na tui.”—Second Edition, Volume 6, tabana e 272.

Wilika na Vakatekivu wase 1, kena ivakamacala e ra kei na idusidusi ena iVolatabu.

a E kaya na HCSB Study Bible me baleta na vosa qori: “Na vu vakaIperiu ni bara’, e kena ibalebale ‘me buli,’ qai sega ni vakaitavi kina e dua na tamata. Koya gona na bara,’ e dusia na ka e cakava na Kalou.”— Tabana e 7.

b Na yaca ni Kalou o Jiova.—Same 83:18.

c E kaya na ivola The Expositor’s Bible Commentary na ibalebale ni vosa vakaIperiu “ena ivakatekivu”: “E sega ni vakamatatataka na balavu ni gauna ni bulibuli.”—Revised Edition, Volume I, tabana e 51.