IVAKAMACALA NI TIKINIVOLATABU

Vakatekivu 1:26—“Daru Cakava na Tamata me Ucui Kedaru”

SARAVA/ROGOCA

“E kaya na Kalou: Daru cakava na tamata me ucui kedaru, me vakataki kedaru, me qai lewa na ika ni wasawasa kei na manumanuvuka ni lomalagi kei na manumanu manoa, me lewai vuravura kece kei na manumanu dau qasi kece era veitosoyaki voli e vuravura.’”—Vakatekivu 1:26, iVakadewa ni Vuravura Vou.

“A sa kaya na Kalou, me datou bulia na tamata me itovo vata kei kedatou ka me ucui kedatou; ka mera lewa na ika ni veiwasawasa , kei na manumanu vuka, kei na manumanu e yavai va, kei vuravura taucoko, kei na ka kece ga sa qasi voli e delai vuravura.’”—Vakatekivu 1:26, King James Version.

iBalebale ni Vakatekivu 1:26

Eda buli meda ucuya na Kalou. Eda bucina qai vakaraitaka na itovo ni Kalou me vaka na loloma, veikauaitaki kei na lewadodonu. Sa rauta me tukuni nida rawa ni vakatotomuria na itovo ni Kalou.

“Kaya na Kalou: ‘Daru cakava na tamata me ucui kedaru.’” Na Kalou o Jiova a e bulia sara ga i liu e dua na agilosi kaukaua, e vakatokai me o Jisu. E qai vakaitavi o koya, “ena buli ni veika kece tale eso mai lomalagi kei vuravura.” (Kolosa 1:16) O Jisu e vakatotomuria na itovo i Jiova, ni “o koya na iyaloyalo ni Kalou tawaraici.” (Kolosa 1:15) Qori na vuna e tukuna kina na Kalou vei Jisu: “Daru cakava na tamata me ucui kedaru.”

‘Me lewa. . . na manumanu manoa kei na vuravura kece.’ Era sega ni buli na manumanu mera ucuya na Kalou. Era sega tale ga ni buli mera vakatotomuria na noda itovo me vaka na loloma, e sega tale ga na nodra lewaeloma. Ia e kauaitaki ira na Kalou. Qori na vuna e vakaroti keda kina na Kalou meda “lewa,” na manumanu, se rawa ni kena vakadewa tale ga meda “liutaki” ira. (New International Version) E lesi keda gona o Jiova meda qaravi ira na manumanu. (Same 8:6-8; Vosa Vakaibalebale 12:10) E namaka vei keda meda tawana qai qarava vinaka na vuravura, kei na veika bula kece.

Tikina Wavolita na Vakatekivu 1:26

E vakamacalataki ena imatai ni rua na wase ni Vakatekivu, na buli ni lomalagi, vuravura kei na kena veika bula. E totoka vakaoti na veika bula e bulia o Jiova, ia na nona ibulibuli uasivi duadua na tamata. Ni oti nona bulibuli, “e raica na ka kece e cakava, raica! sa bau totoka dina.”—Vakatekivu 1:31.

Sarava na ivakamacala lekaleka ni ibulibuli e cavuti ena ivola na Vakatekivu.

Dua na leqa, e sega ni laurai rawa na ka o vinakata.Download na Vidio Qo

Rai Cala me Baleta na Vakatekivu 1:26

Rai cala: O ira ga na tagane e rawa nira vakatotomuria na Kalou, sega ni o ira na yalewa.

Ka dina: Na vosa taumada vakaIperiu e vakadewataki mai kina na vosa “tamata,” e vakaibalebaletaki ruarua vei ira na tagane kei na yalewa. Koya gona, e rawa nira vakatotomuria na Kalou na tagane kei na yalewa. E rawa ni rau saga ruarua me vakadonui rau na Kalou, me rau rawata tale ga na bula tawamudu.—Joni 3:16.

Rai cala: Eda ucuya na irairai ni Kalou.

Ka dina: “E yalo na Kalou,” e vakaitikotiko mai lomalagi na vanua eda sega ni raica rawa. (Joni 4:24) Dina ni dau cavuti ena iVolatabu na mata se liga ni Kalou, ia qori na ivakatautauvata ga me rawa ni matata kina vei keda na veika me baleta na Kalou.—Lako Yani 15:6; 1 Pita 3:12.

Rai cala: E vakadinadinataki ena Vakatekivu 1:26 ni Kalou o Jisu.

Ka dina: E rau veivolekati na Kalou kei Jisu me vaka ga na veitamani, ia rau duidui. E kaya o Jisu ni uasivi koya na Kalou. (Joni 14:28) Mo kila eso tale na ka, sarava na vidio E Kalou o Jisu? se wilika na ulutaga, “Cava e Vakatokai Kina o Jisu me Luve ni Kalou?”