IVAKAMACALA NI TIKINIVOLATABU
Vosa Vakaibalebale 16:3—“Mo Laiva Vua na TURAGA na ka Kece o Cakava”
“Mo tataunaka vei Jiova na ka kece o cakava ena qai vakataudeitaki na nomu sasaga.”—Vosa Vakaibalebale 16:3, Vakadewa ni Vuravura Vou.
“Mo laiva vua na TURAGA na ka kece o cakava, ena qai vakadeitaka na nomu sasaga.”—Vosa Vakaibalebale 16:3, New International Version.
iBalebale ni Vosa Vakaibalebale 16:3
Na tikinivolatabu qori e vakadeitaka vei ira na qarava na Kalou dina, ni na yaco na nodra sasaga ke ra nuitaki koya nira qara qai muria nona veidusimaki.
“Mo tataunaka vei Jiova na ka kece o cakava.” O ira na dauveiqaravi i Jiova a era na qara na nona veidusimaki ni bera nira vakatulewa. (Jemesa 1:5) Na vuna? Era sega ni lewa rawa na ka ena yaco ena nodra bula. (Dauvunau 9:11; Jemesa 4:13-15) Ena rairai sega tale ga vei ira na vuku mera cakava kina na ka era vinakata. Qori na vuna e levu era tataunaka vua na Kalou na ka era via cakava. Era kerea nona veidusimaki ena masu, ra qai cakava na ka me salavata kei na loma ni Kalou me vaka e tukuni ena nona Vosa na iVolatabu.—Vosa Vakaibalebale 3:5, 6; 2 Timoci 3:16, 17.
Na matavosa, “laiva vua na TURAGA b na ka kece o cakava,” e kena ibalebale “mo vakalaiva vua na TURAGA na nomu cakacaka.” E vakamacalataki ena dua na ivola, na vosa qori e vakaibalebaletaka “noda solia na noda icolacola vua e dua e kaukaua cake, e rawa tale ga ni colata.” Era rawa ni nuidei gona na yalomalumalumu ni na vakaukauataki ira na Kalou, ena vukei ira tale ga.—Same 37:5; 55:22.
Na matavosa, “ka kece o cakava,” e sega ni kena ibalebale ni na vakadonuya se vakalougatataka na Kalou na ka kece eda saga. E vinakati me salavata na ka eda cakava kei na ivakatagedegede i Jiova se na nona inaki me rawa nida vakalougatataki. (Same 127:1; 1 Joni 5:14) Na Kalou ena sega ni vakalougatataki ira na talaidredre. Ia e ‘vakaseva na nodra lalawa na daucaka ca.’ (Same 146:9) Ena gauna vata qori, e tokoni ira ga na muria nona ivakatagedegede e volai ena iVolatabu.—Same 37:23.
“Ena qai vakataudeitaki na nomu sasaga.” Eso na vakadewa e vakadewataka na vosa qori “vakadeitaka na nomu sasaga.” Ena iVolatabu vakaIperiu, e kilai tale ga me Veiyalayalati Makawa na kena vakadewataki ena vosa vakavalagi na “vakadeitaka,” e kena ibalebale na biu ni dua na yavu, kei na vakataudeitaki na ibulibuli ni Kalou. (Vosa Vakaibalebale 3:19; Jeremaia 10:12) Na Kalou tale ga ena vakataudeitaka na nodra sasaga o ira na cakava na ka e donu e matana. Ena vukei ira mera dei, taqomaki ira, ra qai marautaka na bula.—Same 20:4; Vosa Vakaibalebale 12:3.
Tikina Wavolita na Vosa Vakaibalebale 16:3
Na tikinivolatabu qori e vola o Tui Solomoni, a vola tale ga e levu na ivola ena Vosa Vakaibalebale. E rawa ni tukuna e levu na vosa vakaibalebale ena vuku e solia vua na Kalou.—1 Tui 4:29, 32; 10:23, 24.
Ena itekitekivu ni wase 16 e vakavinavinakataka o Solomoni na vuku ni Kalou, e vakaraitaka tale ga na levu ni nona cati ira na dokadoka. (Vosa Vakaibalebale 16:1-5) E vakamacalataki tale ga ena wase qori e dua na ka dina e cavuti vakalevu, ya ena rawa ga nida vuku qai rawa vinaka noda sasaga, ke da yalomalumalumu ni vakalaiva me dusimaki keda na Kalou. (Vosa Vakaibalebale 16:3, 6-8, 18-23) Na ka dina qori e cavuti vakalevu ena iVolatabu.—Same 1:1-3; Aisea 26:3; Jeremaia 17:7, 8; 1 Joni 3:22.
Sarava na ivakamacala lekaleka ni ivola na Vosa Vakaibalebale.
a Na yaca ni Kalou o Jiova. (Same 83:18) Raica na ulutaga “O Cei o Jiova?”
b E kaya na ivakamacala taumada ni New International Version Study Bible, ni vakayagataka na NIV na vosa “TURAGA” (matanivola levu “TURAGA”) me isosomi ni yaca ni Kalou. Mo kila na vuna e rawa ni vakavu veilecayaki qori vei ira na dauwiliwili, raica na ulutaga “Aisea 42:8—‘O Yau na TURAGA.’”
Rawa ni o Wilika Tale ga
VAKAMACALATAKI NA TIKINIVOLATABU
iVakamacala ni Vosa Vakaibalebale 3:5, 6—“Kua ni Ravi ena Nomu Yalomatua”
Sala cava o na vakaraitaka kina ni o nuitaka na Kalou qai kua ni nuitaki iko ga?
NA VALE NI VAKATAWA
Yaga Tawamudu na iVakavuvuli ena iVolatabu
E sega ni madra na ivakavuvuli ena iVolatabu, ia e nuitaki qai yaga tawamudu.
SAUMI NA TARO VAKAIVOLATABU
Cava na Loma ni Kalou Vei Au?
E vinakati na cakamana se vosa mai na Kalou meu kila kina na lomana? Raica mada na kena isau vakaivolatabu.
VAKAMACALATAKI NA TIKINIVOLATABU
Jeremaia 29:11 iVakamacala—“Au Kila na ka au Nanuma Tiko me Baleti Iko”
E tiko na nona inakinaki na Kalou vei keda yadua?
IVAKAVUVULI VAKAIVOLATABU
iVukevuke ni Vuli iVolatabu
Digia na iwalewale ena rawa ni vukei iko me yaga, qai marautaki nomu vulica na iVolatabu.
IVAKAVUVULI VAKAIVOLATABU
Tovolea na Vuli Qo
Na vuli iVolatabu qo ena sega ni saumi qai tiko e dua mo drau na veivosakitaka na iVolatabu.
