Era dau nuitaki na itokani dina. Me vaka ga na veitacini, era dauveinanumi qai yalodina ena gauna dredre mada ga.

 “Na itokani dina e loloma ena veigauna.” Na vosa qori e rawa ni kena ibalebale “era vakaraitaka na loloma na itokani.” Na vosa vakaIperiu “loloma” e sega ni okati ga kina na ivakarau ni lomamu vua e dua, ia ena laurai sara ga na loloma qori ena ka o cakava. (1 Korinica 13:4-7) Ni yavutaki na veitokani ena loloma, era na veikabiti tiko ga ke mani yaco na dredre ena vuku ni rai cala se veivakatovolei. Era na veivosoti tale ga vakarawarawa. (Vosa Vakaibalebale 10:12) Era na sega tale ga ni vuvutaki nodra itokani ke rawata e dua na ka vinaka, ia era na marau vata ga.—Roma 12:15.

 “Na itokani dina . . . e tacida ena gauna ni rarawa.” Na vosa vakaibalebale qori e yavutaki ena vakasama ni rawa nira veivolekati na veitokani me vaka na veitacini. Nida solia noda vinaka taucoko meda vukei ira noda itokani ena gauna dredre, e vaka ga nida veitacini. Na veivolekati e vakaduavatataka na veitokani qai dei ena gauna dredre mada ga. Ia ena vaqaqacotaka na noda veilomani kei na veidokai.

 E tu ena ivola na Vosa Vakaibalebale e levu na ivakasala vuku lekaleka me rawa ni uqeta na noda vakasama. E vola o Tui Solomoni e dua na iwase levu ni ivola qori. Na ivakarau ni nona volavola e vakayagataka na serekali vakaIperiu. E sega ni vakayagataka na vosa e rogorogo vata, ia e vakayagataka ga na vakasama e tautauvata qai vakabibitaka na kena tautauvata kei na duidui ni ka e vakamacalataki. Na ikarua ni tikina ni serekali ena Vosa Vakaibalebale 17:17 e lai vakabibitaka na vakasama e tiko ena imatai ni tikina. Na Vosa Vakaibalebale 18:24 e vakaraitaka na veidutaitaki ni vakasama, e kaya: “E tiko na itokani era via veivakaleqai, ia e tiko na itokani eda veivolekati sara, e yawa na tacida dina.”

 De dua na gauna a vola tiko kina o Solomoni na Vosa Vakaibalebale 17:17, e vakasamataka tiko na nodrau veitokani voleka o Tevita na tamana, kei Jonacani na luvei Tui Saula. (1 Samuela 13:16; 18:1; 19:1-3; 20:30-34, 41, 42; 23:16-18) Erau sega ni veiwekani o Tevita kei Jonacani, ia na nodrau veivolekati e vaka ga rau veitacini. E bolemate mada ga o Jonacani ena vukui Tevita. a

 “Na itokani dina e loloma ena veigauna, e tacida ena gauna ni leqa.”—The Bible in Basic English.

 “Na itokani dina e loloma ena veigauna, e tacida ena gauna ni veivakatovolei.”—The Moffatt Translation of the Bible.

 “Na itokani dina e loloma ena veigauna kece, e dau basika o [koya] ena gauna ni leqa.”—The Complete Jewish Study Bible.

 Sarava na ivakamacala lekaleka ni ivola na Vosa Vakaibalebale.