Ni kunekunetaki e dua na gone, e tekivu ena dua na sela somidi e vakatokai na zygote, e sega ni raica rawa na matada. Oti e vica na vula sa na qai buli taucoko na yago ni gone. Koya gona, mai na dua ga na sela qori e buli kina e sivia ni 200 tale na veimataqali sela, e duidui na kedra ibulibuli, kedra levu kei na nodra itavi.

 Vakasamataka mada: Na sela na zygote ena tawase rua ia ena tautauvata tiko ga na kedrau DNA. Na sela kece era buli vou era na tawase tale ga va qori. Ni se qai tekivu, ena tautauvata kece na kedra irairai. Sa tiko ga ena nodra DNA na itukutuku kece e vinakati me buli kina na veimataqali sela.

 Oti e dua na macawa nona kunekunetaki na gone, sa na qai wase na sela me rua na kena mataqali. Eso e vakatokai me embryo ena buli kina na gone, eso tale me placenta e buli kina katonigone kei na veika e vukea nona tubu na gone.

 Ena ikatolu ni macawa, na sela ni embryo ena wase tolu. Na kena e sau ena buli kina na nave, mona, gusu, kuliniyago kei na so tale na sela. Na kena e lomadonu ena buli kina na sui, dra, ivi, masela kei na so tale na tikiniyago. Na kena sara e loma ena buli kina na gacagaca me vaka na yatevuso, kato ni mi kei na kena e vukea na qaqi ni kakana.

 Ni kunekunetaki tiko na gone, eso na sela era na veitokiyaki vakailawalawa se yadudua mai na embryo ina so tale na vanua. Eso na sela era na kumuni vata me buli kina na sela mamare, eso na sela e vaka na wa, eso tale era qaraqara tu. E rawati ga qori nira cakacaka vata na sela. Kena ivakaraitaki, na sela mamare era na takelo me vaka na tiuvu lalai (tube). E yaco vata kece tiko qori ena dua ga na gauna ena loma ni embryo. Sa na qai balavu tiko yani na tiuvu qori me buli kina na salanidra taucoko ni yago.

 Ni qai sucu mai e dua na gone bulabula, era sa tuvani vinaka kece tu na sivia na drau na bilioni na sela ena kedra irairai, ena vanua kei gauna donu.

 Cava o nanuma? E buli se bula vakaidewadewa na sala vakatubuqoroqoro era cakacaka vata kina na sela?