Albert Wright/iStock via Getty Images
BULA VAKAIDEWADEWA SE BULI?
Vanua e Maroroya Kina na Malleefowl Nona Yaloka
Na malleefowl e dua na manumanuvuka e tiko ena ceva kei Ositerelia. E vakatubuqoroqoro nona dau raica me veirauti tiko ga na katakata ni vanua e biuta kina nona yaloka, ya me tiko ga ena rauta na 34 na diqiri. E cakava vakacava qori ena siga kei na bogi ena loma ni yabaki taucoko?
Ni vulaililiwa, na malleefowl ena kelia na qara e rauta ni dua na mita na kena titobu qai tolu na mita na kena raba. Oti, na malleefowl tagane ena qai biuta kina na co kei na draunikau. Ni suasua na draunikau ena uca ni vulaililiwa, ena kelia e dua na qara ena lomadonu ni binibini draunikau me biu kina na yaloka. Oti, ena qai buluta kece vakadua ena qele nukunuku. Ni vuca na draunikau qai tekivu katakata mai, sa na vakarau sara tu ga me biu kina na yaloka.
Me rawa ni taqomaki na yaloka me yacova na gauna ena qai kavoro kina (A), e vakayagataka na malleefowl na katakata ni siga kei na draunikau vuca (B). Ena veiveisautaka na vavaku ni qele (C), me rawa ni tiko ga na katakata ni yaloka ena rauta ni 34 na diqiri me vica vata na vula. E cakava qori ni vakayagataka na yavana me kelia se buluta wasoma ena qele (D)
Gauna kece e vakarau vakalutu yaloka kina na malleefowl yalewa, ena kelia o tagane na qele nukunuku sa buluta tu me biuta o yalewa na yaloka ena kena vanua. Oti ena buluta tale o tagane. Mai na Seviteba ina Feperueri a e rawa ni vakalutuma o yalewa e rauta ni 35 na yaloka.
Na malleefowl tagane ena tokia tiko vakawasoma na qele nukunuku qori me kila na kena katakata. Oti ena qai cakava tiko eso na ka me dei na kena katakata ni veiveisau na draki. Kena ivakaraitaki:
Ena vulaitubutubu, ke sa sivia na katakata ni draunikau vuca, ena vakabatabatataka vakalailai o tagane. Qori ni kauta laivi eso na qele nukunuku qai buluta yani ena so na qele batabata.
Ena vulaikatakata, ena biuta kina o tagane eso tale na qele me taqomaka na yaloka mai na katakata ni siga. Ia ena veimataka lailai, ena kelia tani eso na qele qori me sosomitaki.
Ena vulaibotabota ni sa mate vinaka na draunikau ena qara, ena qai kelia tani o tagane e levu na qele me rawa ni cilava na katakata ni siga na yaloka kei na qele e ceburaka. Oti, ena buluta tale na qara ena qele qori me rawa ni katakata vinaka na yaloka ena bogi.
E veisiga ena kelia qai ceburaka tiko na mallefowl tagane e rauta ni 850 na kilokaramu na qele me sivia e lima na aua. Na ituvatuva dei qori e malumu vinaka kina na qele, qai vakarawarawataka nodra lako mai tuba na luve ni mallefowl ni sa kavoro na yaloka.
Sarava nona kelia tani na manumanuvuka na malleefowl na qele ena vanua e maroroi kina na yaloka
Cava o nanuma? E buli se bula vakaidewadewa nona raica na mallefowl me veirauti na katakata ni vanua e biu kina na yaloka?
a Ena qai kavoro na yaloka ni oti e vitu se walu na macawa. Ena saga gona na mallefowl tagane me veirauti tiko ga na katakata ni vanua e biu kina na yaloka me yacova na Epereli.
Rawa ni o Wilika Tale ga
BULA VAKAIDEWADEWA SE BULI?
Taba ni Lulu
Na ibulibuli ni taba ni lulu e rawa ni vakatotomuri kina na buli ni misini ni cagi.
BULA VAKAIDEWADEWA SE BULI?
Na Dokoulu ni Sulasula—Bula Vakaidewadewa se Buli?
Rawa vakacava vua na manumanu vuka qo me dokoulu i wai, qai sivia tale vaka20 na idre ni vuravura na kena totolo?
BULA VAKAIDEWADEWA SE BULI?
Vakayagataka Vinaka na Kaukaua na Veika Bula—Bula Vakaidewadewa se Buli?
Era vakayagataka vinaka na veika bula na kaukaua e tu vei ira. Vakacava qori e dusia e dua na ka me baleta na itekitekivu ni bula?
IVAKAVUVULI YAGA VAKAIVOLATABU
E Buli na Lomalagi kei na Vuravura?
Levu era taura cala na itukutuku ni iVolatabu me baleta na bulibuli se ra nanuma ni itukuni ga. E rawa ni vakabauti na ka e tukuni ena iVolatabu?