Nira cakacaka saumi eso na itubutubu, era lai biuta kina na luvedra era se bera ni vuli ena vanua ni veimei. Eso na vanua e dau caka tale ga kina na vuli. Vakacava ena vinaka qori vei luvemu?

•  Taro mo vakasamataka

•  Ka o rawa ni cakava

 Vakacava ena vakaleqa nomu veivolekati kei luvemu ke lai biu ena vanua ni veimei? E rawa. Ni oti e vica na yabaki na nona sucu e dua na gone, ena totolo na nona tobotobo qai veivolekati kina kei koya e mei koya ena veisiga. Saga gona mo vakayagataka e levu na gauna kei luvemu ena imatai ni vica na yabaki qori.—Vakarua 6:6, 7.

•    Ena bibi vei ira na itubutubu era via lai biuti luvedra ena vanua ni veimei mera vakasamataka qo, ‘Vakacava au na veivolekati tiko ga kei luvequ?’

 Ena rawa ni vakaleqa noqu veivakavulici? E rawa. E kaya na ivola na Hold On to Your Kids, “Na levu ga ni nodra veimaliwai na gone, na levu tale ga ni vukivuki era na toboka.”

•    Ena bibi vei ira na itubutubu era via lai biuti luvedra ena vanua ni veimei mera vakasamataka qo, ‘Ena dei tiko ga o luvequ ena ka au vakavulica vua?’

 Ke sa lai vuli o luvemu, vakacava ena lai yaga ena nona ka ni vuli na veika e vulica mai na vanua ni veimei? So era duavata kina. Ia eso tale era kaya ni yaga vakalailai se sega sara ga ni yaga qori vei ira na gone. Ia qo na ka e vola na nodra vuniwai ni vakasama na gone o Penelope Leach: “Kua ni o nanuma ni bibi duadua ena nodra bula na gone na nodra ‘vuli’ e koronivuli se na totolo ga ni nodra vuli na kena vinaka vei ira. Ke va qori nomu rai, o sa beca tiko na veivakavulici o cakava vei luvemu me tekivu mai na gauna e sucu kina.”

•   Ena bibi vei ira na itubutubu era via lai biuti luvedra ena vanua ni veimei mera vakasamataka qo, ‘Vakacava ena dodonu me lai biu sara ena vanua ni veimei o luvequ? Ena yaga vua?’

 Vakacava ena rawa ni dua vei kemudrau na veiwatini me sa kua ni cakacaka me veimei? Ena so na vanua erau cakacaka ruarua na itubutubu me rawa ni vinaka tiko ga kina na ivakatagedegede ni bula e vale. Na cava e bibi, na ilavo se na nomudrau veivolekati kei luvemu?

•   Ena bibi vei ira na itubutubu era via lai biuti luvedra ena vanua ni veimei mera vakasamataka, ‘Vakacava e rawa ni vakayagataki vakavuku na ilavo me kua ni cakacaka kina e dua vei keirau me veimei?’

 Ni bera ni drau vakatulewataka me lai biu o luvemudrau ena vanua ni veimei, ena bibi mo drau veitalanoataka rawa na kena vinaka kei na kena ca. Ni sa oti nomudrau veitalanoa, vakacava ke drau nanuma me sa lai biu ga ena vanua ni veimei o luvemudrau?

 E kaya na iVolatabu ni o “koya e yalomatua e vakasamataka na nona ilakolako kece.” (Vosa Vakaibalebale 14:15) Mo vakasamataka tiko na ivakavuvuli vakaivolatabu qori ni bera ni o digia na vanua ni veimei mo lai biuti luvemu kina.

 Kila eso tale na iwalewale ni veimei

•   Era digia eso na itubutubu me lai mei na luvedra ena nona vale na dauveimei. Ena rawa ni tiko kina e dua se vica na dauveimei kei na vica tale na gone.

•   So tale na itubutubu e tiko na wekadra e rawa ni veimei, se era sauma e dua me mai veimei e vale.

 Na vakatutu kece qori e tiko na kena vinaka kei na kena ca. Vakacava mo veitalanoa kei ira na itubutubu era sa tovolea oti eso na iwalewale ni veimei? E kaya na iVolatabu: “O ira na qara ivakasala era vuku.”—Vosa Vakaibalebale 13:10.

 Vakacava ke o digia me sa lai biu ga ena vanua ni veimei o luvemu? Qo na ka mo cakava ena ituvaki qori . . .

 Kila vinaka na vanua ni veimei

•   Vakacava e vakalaiseni se kilai vakalawa? Vakacava e vakaivola se vakatututaki ni vanua vinaka ni veimei?

•   Vakacava e savasava qai taqomaki vinaka?

•   Na cava e vakarautaki tu me cakava o luvemu? a

 Kilai ira vinaka na dauveimei

•   Na vuli cava e sa rawata? Vakacava e vakaivola ena nodra tuberi na gone? E kila na ka me cakava ni yaco e dua na vakacalaka?

•   Vakacava o rawa ni kila rawa na kena itukutuku o dauveimei, me vaka ke basulawa?

•   Era dauveiveisau na dauveimei ena vanua qori? Ke yaco qori, ena sega ni rawarawa vei luvemu me vakamatauni koya vei ira na dauveimei vou.

•   Ena vica na gone ena qarava e dua na dauveimei? Ke levu na gone e qarava e dua na dauveimei, ena rawa ni vakaweleweletaki o luvemu. Macala ga ni na vakatau na nona qarauni o luvemu ena nona yabaki kei na ka e rawata.

•   Vakacava ena rawa ni tukuna vakadodonu vei iko o dauveimei na nona nanuma? Se me tu vakarau me vakamacalataka vei iko na veika o via kila?