O kubuta lo nomu cudru ni kaya se cakava o watimu e dua na ka e vakacudrui iko. Ia e kidava o watimu ni dua na leqa mani tarogi iko. Sa qai vakacudrui iko ga vakalevu qori. O rawa ni lewa vinaka vakacava nomu cudru?

•  Ka mo kila

•  Ka o rawa ni cakava

• O na tauvimate ke o sega ni lewa vinaka nomu cudru. Era kaya na dauvakadidike nomu sega ni lewa vinaka nomu cudru e rawa ni vakavuna na tubu ni dra, mateniuto, lomabibi, kei na leqa ni kete. Na cudru e rawa ni vakavuna tale ga na lailai ni moce, lomaocaoca sivia, matenikuli, se mate e dua na yasa ni yago. Sa rauta me kaya na iVolatabu: “Mo biuta na cudru . . . , ni na tini ga ena leqa.”​—Same 37:8, ivakamacala e ra.

• Veivakaleqai tale ga ke o kubuta lo nomu cudru. E sega ni vinaka na ivakarau ni yalo e rawa ni vakavuna nomu cudru tiko ga. Kena ivakaraitaki, o na dau kasami qai vakalelewa. Na itovo qori ena vakavuna nomu sega ni taleitaki, qai rawa ni vakaleqa nomu vakawati.

• Vakasamataka na itovo vinaka i watimu. Vola e tolu na ka o taleitaka me baleti watimu. Ni o cudruvaka ena dua tale na gauna na ka e cakava o watimu, vakasamataka sara na itovo o taleitaka vua. E rawa ni vukei iko qori mo lewa vinaka nomu cudru.

  iVakavuvuli vakaivolatabu: “Me laurai na nomuni vakavinavinaka.”​—Kolosa 3:15.

•   Dau veivosoti. Kauaitaka na rai nei watimu. Ena uqeti iko qori mo veinanumi se vaka e kaya na iVolatabu mo “kauaitaki ira na vakaleqai.” (1 Pita 3:8) E vinaka tale ga mo taroga, ‘Dua sara ga na leqa levu e yaco meu sega ni rawa kina ni veivosoti?’

  iVakavuvuli vakaivolatabu: ‘E kena idivi e dua nona raibaleta na cala’​—Vosa Vakaibalebale 19:11.

•   Talaucaka vakamaqosa, vakayalovinaka tale ga na lomamu. Cavuta na vosa “Au” ni o talaucaka na lomamu. Kena ivakaraitaki, kua ni kaya, “O sega ni veinanumi ni o sega ni qiritaka mai na vanua o tu kina,” ia tukuna, “Au dau lomaleqa ni o bera mai, au leqataka na ka e rawa ni yaco vei iko.” O rawa ni lewa vinaka nomu cudru ke o talaucaka vakayalovinaka na lomamu.

  iVakavuvuli vakaivolatabu: “Moni vosa ena yalovinaka ena gauna kece, me vakamasima.”​—Kolosa 4:6.

•   Vakarorogo ena veidokai. Ni o sa talaucaka na lomamu, solia na gauna vei watimu me vosa qai kua ni curu takoso ni vosa tiko. Ni vosa oti o watimu, vakamacalataka vakalekaleka na ka e kaya mo raica ke donu na ka o rogoca ni tukuna. Na nomu vakarorogo wale ga e dua na veivuke levu mo lewa vinaka kina nomu cudru.

  iVakavuvuli vakaivolatabu: “Totolo ni vakarorogo . . . berabera ni vosa.”​—Jemesa 1:​19.