Vakacava e kauai tiko o watimu ena ivakarau ni nomu gunu alakaolo? Ke vaka kina, qo eso na ka mo nanuma tiko.

Ena ulutaga qo

•  Veivakaleqai na gunu sivia ena bula vakawati

•  O bobula tiko ena alakaolo?

•  Kua ni vakalecalecava

•  Ka o rawa ni cakava

 Na gunu sivia e rawa ni vakavuna e levu na tauvimate me vaka na mateniuto, vakaleqa na liva kei na kenisa. Ia sega ni koya wale ga qori, e vakavu leqa tale ga ena bula vakawati me vaka na itovo kaukaua e vale, leqa vakailavo, sega ni yalodina kei na veisere.

 E kaya na iVolatabu na vakayagataki sivia ni gunu “e kati me vaka na gata, e solia na ka gaga me vaka na gata batigaga.” (Vosa Vakaibalebale 23:32) O na kila vakacava gona ni o bobula tiko kina?

 Qo eso na taro ena vukei iko mo kila ke o sa bobula kina:

•   E dau dredre mo lewa vinaka nomu ivakarau ni gunu?

•   O dau vakasamataka tiko na gauna cava tale mo gunu kina?

•   O dau gunu tiko ga ni o kila ni rawa ni vakaleqa nomu bula kei na nomu vakawati?

•   E dau lako vakaca vei iko ke o saga mo muduka na gunu?

•   Vakacava e vakavu veiba vei kemudrau vakaveiwatini?

•   Sa qai levu tiko ga nomu gunu ni vakatauvatani ena veigauna sa oti?

•   O dau gunu lo se vunia na gunu e vale se vanua ni cakacaka?

 Ke o vakaiotaka e dua se sivia na taro qori, rairai o sa bobula tiko ena alakaolo. De dua o na kilai tale ga mo dau gunu vakasivia.

 Vakacava e kauai tiko o watimu ena ivakarau ni nomu gunu? Ke vaka kina, o na rairai saga mo raica vakamamada se soli iulubale. Se de dua o beitaki ira kina eso tale, wili kina o watimu ni o tukuna eso na vosa va qo:

•   “Ke o lomani au vinaka, au na sega ni gunu.”

•   “Au oca mai na cakacaka, au via gunu.”

•   “E levu au kila era gunu sivia sara mai vei au.”

 Ke o cavuta na vosa va qori, de dua sa bibi ga vei iko na gunu o sa sega ni kauaitaka kina nomudrau marau vata vakaveiwatini. Ia na cava e dodonu me bibi duadua?

 iVakavuvuli vakaivolatabu: “Na tagane vakawati ena lomaocaocataka . . . me vakamarautaka vakacava na watina.”​—1 Korinica 7:33.

•   Raica vakabibi na ka e kauaitaka o watimu. Ke kauai vakasivia o watimu na ivakarau ni nomu gunu, e vinaka mo cakava kina eso na veiveisau. Ia ke o sega ni cakava kina e dua na ka qai lomaleqa tiko ga kina o watimu, qori e rawa ni dusia ni sa veivakaleqai tiko na gunu ena nomudrau bula vakawati.

   iVakavuvuli vakaivolatabu: “Me kua ni dua e qara tiko ga na ka e yaga ga vua, me qara tale ga na ka e yaga vei ira tale eso.”​—1 Korinica 10:24.

•   Kila na kena dina. Me rawa ni qaqa e dua na sotia ena ivalu, ena vinakati me kila na iwalewale e vakayagataka na kena meca. E va tale ga qori na ka mo cakava mo rawa ni muduka na gunu sivia. E vinakati mo kila na dina ni veika e vakavuna, kei na sala e bacani ira kina e levu. Mo kila tale ga na ka o rawa ni cakava mo kua ni bobula kina, qai kua ni galeleta tale ena dua na gauna mai muri.

   iVakavuvuli vakaivolatabu: “Moni vakatabui kemuni tiko ga mai na gagadre vakayago, na veika e valuti kemuni tiko.”​—1 Pita 2:11.

•   Qara na veivuke. E vakarautaki e valenibula eso na veiqaravi me muduki kina na vakayagataki sivia ni alakaolo. O rawa tale ga ni taro ivakasala vua na nomu itokani matua mo kila kina eso tale na ka e vakavuna nomu gunu sivia. Ke o temaki tale, rawa ni o kere veivuke vua na nomu itokani qori.

   iVakavuvuli vakaivolatabu: “Na itokani dina e loloma ena veigauna, e tacida ena gauna ni rarawa.”​—Vosa Vakaibalebale 17:17.

 Na gunu sivia e sega ni rawa ni wali ena wiliki wale ga ni dua na ulutaga lekaleka, se nomu tukuna, “Au na gunu ga vakalailai.” Ia nanuma tiko na ka o cakava ena ivakarau ni nomu gunu ena rawa ni tara na nomu bula, ena vakaleqa tale ga nomu bula vakawati.

 Me ikuri ni vakamacala: Wilika eso na ulutaga qo mo kila kina na sala era muduka kina eso na gunu sivia.

 “Sa Sega Tale Niu Qai Tovo Voravora”

 “Au Sega ni Maduataka Tale na Noqu Bula”

 “Noqu Vale tu ga na Gaunisala”

 Sarava tale ga na vidio, ‘Au Rarawataka Sara ga Noqu iVakarau ni Bula’