E vakarota o Jisu vei ratou nona tisaipeli: ‘Dou na qai tukuni au. . . ena veivanua yawa sara kei vuravura.’ (Cakacaka 1:8) Nikua, era sa gumatua tiko na iVakadinadina i Jiova mera cakava na ilesilesi qori. Ia eso na vanua e levu kina na iwiliwili ni tamata e se bera ni vunautaki kina vakavinaka na itukutuku vinaka. Eso tale na vanua e vica ga na iVakadinadina i Jiova era tiko kina. (Maciu 9:37, 38) Cava sa caka tiko nikua me vunautaki kina vei ira e levu na itukutuku vinaka?

 Me rawa ni muri na ivakaro i Jisu, e lesi ira gona na daukaulotu na Komiti ni Cakacaka ni iLawalawa Dauvakatulewa ni iVakadinadina i Jiova, ena vanua e vinakati kina na veivuke e veiyasa i vuravura. Gauna qo, era le 3,090 na daukaulotu e veiyasa i vuravura. a Levu vei ira qo era sa vuli oti ena Koronivuli ni Talatala ni Matanitu. Era yalorawarawa mera biuta nodra vale, qai toki ina dua tale na vanua. E yaga vakalevu na nodra matua, veika ra vulica, kei na kila e tu vei ira me vunautaki kina na itukutuku vinaka. Era ivakaraitaki vinakata tale ga vei ira na ka vou.

 Ratou cakacaka vata na Tabana e Qarava na Yalava, kei na Komiti ni Tabana me qaravi na ka era vinakata na daukaulotu. Kena ivakaraitaki, na vanua mera tiko kina, nodra qaravi vakavuniwai, kei na ilavo lailai me baleta nodra ka ni bula e veisiga. Ena yabaki vakacakacaka ni 2020, e vakayagataka na iVakadinadina i Jiova e $27 na milioni na ilavo ni Merika mera qaravi kina na daukaulotu. Qori e rawa kina vei ira na daukaulotu mera vakayagataka vakalevu nodra gauna, kei na igu ena cakacaka vakaitalatala. Era vakayaloqaqataki ira tale ga na tacida ena ivavakoso era lesi kina.

 Era veivuke vakacava na daukaulotu ena cakacaka vakavunau? E kaya o Frank Madsen, e lewe ni Komiti ni Tabana e Malawi: “Era vukei ira na ivavakoso ena nodra yaloqaqa, kei na iwalewale ni vunau mera tara kina eso na yalava dredre, me vaka na itikotiko vakabai kei na vanua e vosataka e dua tale na vosa. Era uqeti ira eso tale nira saga mera vulica na vosa vou, kei na itovo vakavanua. Era vakaraitaki vinaka tale ga vei ira na itabagone mera saga na veiqaravi vakatabakidua. Eda vakavinavinakataki Jiova ni vakarautaki ira mai na daukaulotu.”

 E kaya e dua tale na lewe ni Komiti ni Tabana: “Era vakaraitaka sara ga na daukaulotu na noda duavata na tamata i Jiova e veiyasa i vuravura. Era raica mada ga o ira na sega ni tiko ena dina, ni sega ni tawasei keda na ivakarau vakavanua. Ia e vakaduavatataki keda vakamataveitacini na ivakavuvuli vakaivolatabu.”

 Era veivuke vakacava na daukaulotu vei ira na dautukutuku? O Paulo mai Timor Leste e vakavinavinakataki ira na daukaulotu era lesi ina nona ivavakoso. E kaya: “Dua na ka na katakata ni draki ena vanua au tiko kina. Ia era gumatua ga ni vunau na daukaulotu dina ga nira lako mai ina vanua batabata. Era sega vakadua ni calata na soqoni ni cakacaka vakavunau. Au dau raici ira nira caka veisikovi lesu ena sigalevu ni katakata tu na siga, ena yakavi tale ga. Era vukea e levu mera mai kila na ka dina, wili kina o au. Na nodra gugumatua era vakayagataka kina nodra bula mera qaravi Jiova. Qori e uqeti keimami ena ivavakoso me keimami gugumatua tale ga.”

 O Ketti e dua na painia tudei mai Malawi. E kaya na sala e vukei ratou kina vakavuvale e dua na veiwatini daukaulotu: “O au duadua ga au tiko ena dina ena noqu vuvale, ena gauna rau lesi mai kina ina neitou ivavakoso na veiwatini qo. Dua na ka nodrau vukei au, rau volekati keitou tale ga vakavuvale. E vukei ratou na luvequ na nodrau ivakaraitaki. Ratou kila kina ni na vakainaki, qai marautaki na bula nida qaravi Jiova. Ratou sa painia tudei sara e tolu na luvequ yalewa, o watiqu tale ga sa dau tiko ena soqoni.”

 Era qaravi vakailavo vakacava na daukaulotu? Qori na noda cau ena cakacaka e vuravura raraba. Levu na cau qori e caka ena donate.pr418.com. E vakavinavinakataki vakalevu na nomuni lomasavu ni cau.