E sivia e 60 na pasede na cakacaka ni vakadewa e sega ni caka ena valenivolavola ni tabana, ia e caka ena valenivolavola ni vakadewa tu yawa (RTO). E yaga vakacava qori? Na iyaya ni vakadewa cava e vinakati mera qarava vinaka kina na daunivakadewa na nodra itavi? E vakavinakataka vakacava nodra ivakarau ni vakadewa na vanua era tiko kina?

 Era tiko ena RTO na daunivakadewa era vosataka na vosa ni vanua ya. E kaya o Karin e daunivakadewa ena vosa vakaLow German: “Gauna keitou toki kina na daunivakadewa ina RTO e Cuauhtémoc, Chihuahua e Mexico, keitou vosataka ga vakalevu na vosa qori ena cakacaka vakaitalatala, ena gauna tale ga keitou lai volivoli kina. Keitou veimaliwai vakalevu kei ira na tamata era vosa vakaLow German. Keitou rogoca kina eso na vosa vovou, kei na ivosavosa keitou sega ni rogoca tu ena dua na gauna balavu.”

 E kaya o James e dua na daunivakadewa ena vosa vakaFrafra e Ghana, ni so na gauna e dau vakanananu lesu e Peceli. Ia e kaya: “Au taleitaka noqu veiqaravi tiko ena RTO. E uqeti au vakalevu niu cakacaka vakavunau ena noqu vosa, kei na nodra tataleitaki na lewenivanua.”

 Era digitaka vakacava na tacida na vanua me tiko kina na RTO? E kaya o Joseph e veiqaravi ena Tabana ni Tarataravaki e Veiyasa i Vuravura e Warwick, Niu Yoka mai Merika: “Dua na dredre oya ni so na vanua e sega kina na livaliva, na wai kei na internet me rawa ni vakau kina na ka me vakadewataki. Ni vaqarai gona na vanua me tara kina na RTO, ena vakasamataki e vica vata na vanua e vosataki kina vakalevu na vosa ni vanua ya.”

 Ena biu na RTO ena dua na Vale ni Soqoni Lelevu, Vale ni Soqoni, se vale ni daukaulotu me rawa ni totolo qai vakabula ilavo. Era na gole kina e veisiga na daunivakadewa mera lai cakacaka. Ke sega ni tiko e dua na vale va qori, e rawa nira sauma na tacida na rumu se ofisi mera tiko ra qai cakacaka kina na daunivakadewa. Ke vinakati me veisau e rawa ni volitaki na vanua qori, qai vakayagataki na ilavo ena vanua e vinakati kina vakalevu.

 Ena yabaki vakacakacaka ni 2020, e vakayagataki e 13 na milioni na dola na ilavo ni Merika mera caka kina na RTO. E vinakati me vakarautaki vei ira na timi ni vakadewa ena RTO na kompiuta, na kena porokaramu, iyaya ni katokatoni, internet, livaliva kei na wai. Kena ivakaraitaki, na kompiuta me vakayagataka e dua na tacida e rauta ni $750 na ilavo ni Merika na kena isau. Dua na kompiuta ena biu kina na kena porokaramu, kei na Watchtower Translation System na porokaramu ena vukei ira na daunivakadewa mera tuvanaka vinaka nodra cakacaka, rawa tale ga nira raica kina na ka me vakadewataki.

 E vakarautaki tale ga vei ira na iyaya ni katokatoni me rawa nira katokatoni ga ena nodra ofisi. E yaga dina qori baleta gauna e veitauvi kina na COVID-19 era kauta na iyaya qori ena nodra vale me rawa nira tomana tiko ga na katoni ni vidio kei na ivola.

 Era veivuke tale ga na tacida ena ivavakoso ena kena rogoci tale na ka sa vakadewataki, kei na vakavinakataki ni RTO. E kaya o Cirstin, e daunivakadewa ena vosa vaka-Aferika ena RTO e Cape Town, mai Sauca Aferika: “Levu na dautukutuku kei na painia tudei e rawa sara ga nira vakayagataka eke na nodra taledi.”

 Era marautaka vakalevu o ira na bole cakacaka nodra vakaitavi. E kaya e dua na tacida yalewa e veivuke tiko ena dua na RTO ni vakayaloqaqataki koya nona dau lai veivuke. Eso tale ga na tacida era marau nira vakaitavi ena katokatoni. E kaya o Juana e daunivakadewa ena vosa vakaTotonac e Veracruz, mai Mexico: “Ni tiko na RTO ena vanua e vosataki kina vakalevu na vosa qo, e rawarawa sara vei ira na mataveitacini mera vakaitavi ena katokatoni.”

 Vakacava e yaga na RTO ena kena vakavinakataki na ivakarau ni vakadewa? Io, e vica vata na milioni na dauwiliwili era duavata ena tikina qori. E kaya o Cédric e daunivakadewa ena vosa vaKongo ena Democratic Republic of Congo: “Eso na tacida era kaya ni rui dredre na ivakarau ni vakadewa ni sega ni tautauvata kei na vosa era vakayagataka e veisiga. Ia qo era kaya ni sa rawarawa sara na vakadewataki ni ivola ena vosa vaKongo.”

 E tautauvata tale ga qori na ka e kaya o Andile, e daunivakadewa ena vosa vakaXhosa e Sauca Aferika: “Levu era kaya vei keimami ni sa vinaka cake sara na ivakarau ni vakadewa. O ira mada ga na gone era dau wilika tu e liu Na Vale ni Vakatawa vakavalagi era sa wilika tiko nikua ena vosa vakaXhosa. Era taleitaka tale ga vakalevu na vakavoutaki ni New World Translation ni rui matata qai rawarawa na kena wiliki.”

 E rawa ga ni vakarautaki, vakavinakataki ra qai veiqaravi na tacida ena RTO ena ilavo e cautaki ena cakacaka e vuravura raraba kei na cau ena donate.pr418.com.