E tu vakarau na iLawalawa Dauvakatulewa me vakayagataka na cau ena tarataravaki me rawa ni tokoni kina na cakacaka vakavunau. Kena ivakaraitaki, ena yabaki vakacakacaka ni 2023, e vakadonui vakalawa ena valenivolavola ni tabana ni iVakadinadina i Jiova me vakayagataka e sivia e 500 na milioni na dola me volia, tara, qai vakavinakataka na Vale ni Soqoni kei na Vale ni Soqoni Lelevu e veiyasa i vuravura. a Na ilavo qori e ikuri ni ilavo e vakayagataka na ivavakoso kece e vuravura ena vakavinakataki ni Vale ni Soqoni.

 Kena ikuri, e vakayagataki tale ga na cau me tara qai vakavinakataki kina na valenivolavola ni tabana. Na vuna? Ni tuvanaka qai tokona na cakacaka vakavunau e vuravura raraba. E vakarawarawataki tale ga na veiqaravi kina me rawa ni vakayagataki na cau ena tarataravaki, kei na vakavinakataki ni Vale ni Soqoni kei na Vale ni Soqoni Lelevu. Ia e se saulevu tiko ga na vakavinakataki, veisautaki se na tokitaki ni valenivolavola ni tabana. Na cava e bibi kina na cakacaka qori? Na sala cava e tokona kina na valenivolavola ni tabana na cakacaka ena yalava? Meda raica mada.

 E levu na valenivolavola ni tabana sa sivia e 30 se 40 na yabaki na kena dede! O Nicholas e veiqaravi tiko ena Tabana ni Tarataravaki e Veiyasa i Vuravura (Worldwide Design/Construction Department), e kaya: “Na vale mada ga e maroroi vinaka ena rawa ni madra qai vuca ni toso na gauna. Ia ena rawa ni dede qai yaga ke vakavinakataki tiko ga.”

 E vinakati tale ga na veisau e Peceli me rawa ni toso vata kei na veiveisau ena isoqosoqo. E tubu na iwiliwili ni dautukutuku ni sa tara e levu na valenivolavola ni tabana e veiyasa i vuravura. E levu gona na bolecakacaka era sa veivuke tiko ena valenivolavola. Sa lailai kina na itikotiko e Peceli!

 E bibi tale ga na qaqarauni nida bula tu qo ena iotioti ni veisiga, eda sotava tale ga e levu na leqa tubukoso. (Luke 21:11) Ni muri na iwalewale vou ni tarataravaki ena sega ni veivakaleqai vei ira na vakavinakataka na Vale ni Soqoni. E rawa tale ga ni vakayagataki me qaravi kina na ka ni vakacoko, qai tomani tiko ga na vunau ena yalava ni oti na leqa tubukoso.

 Ena veidusimaki ni iLawalawa Dauvakatulewa, e tara e 43 na valenivolavola ni tabana ena yabaki vakacakacaka ni 2023. Kena ibalebale, e rauta ni veimama na Peceli e veiyasa i vuravura e caka tiko kina na tarataravaki. Qo eso na kena ivakaraitaki.

 Angola. O Matt e lewe ni Komiti ni Tabana e Angola, e kaya: “Keimami vakadinadinataka ni sa vakayacori tiko ena sala veivakurabuitaki na parofisai ena Akeai 2:7. Na loma ga ni tini na yabaki e tubu ina 60 na pasede na iwiliwili ni dautukutuku! E vinakati gona e levu mera veiqaravi e Peceli me rawa ni tokoni kina na tubu qori. Ia e sega ni rawa nira sureti kece ni sa lailai na vanua e Peceli. Era cakacaka kina vakaukaua e levu na lewenivuvale e Peceli, era ovataimi tale ga.”

 Ratou lesi eso na tacida me ratou raica na sala e rawa ni vakalevutaki kina na valenivolavola ni tabana. Ratou mani nanuma me vakavinakataki ga na kena sa tiko rawa. Oti nodratou vakadidike ratou qai liaca ni sega ni ganita me vakayagataki kina na cau. Ratou mani vakatututaka me voli qai vakavinakataki ga e dua na vale e tu voleka i kea. E kaya o Matt: “Gauna me vakaraitaki kina vei ratou na Komiti ni Tabana, keitou leqataka de na sega sara ni veiganiti. Ia qo keitou raica ni ganita vinaka sara ga na vuvale. E vakalougatataka o Jiova na vakatulewa qo.”

 De dua ena vinakati me vakalevutaki tale na valenivolavola ni tabana e Angola ena dua na gauna mai muri. Ia ena rawarawa nodra cakava qori ni sa tiko e Peceli na itikotiko vou, na vale e rawarawa ni veisautaki (modular housing), kei na vale e redetaki me rawa ni tokoni tiko ga na tubu vakasakiti ena yalava.

 Japani. E voleka ni 40 na yabaki sa oti na kena tara na valenivolavola ni tabana, qai sega ni vakavinakataki tu e dua na gauna balavu. Dua na ka nodra cakacaka vakaukaua na tacida me vakavinakataki, ia e sega ni taucoko sara ni sa makawa toka. Ya na vuna e vakayacori tiko kina e dua na ripea levu ena gauna qo.

 Ena veiyabaki sa sivi e levu tale ga na veiveisau e Peceli. Ni bera na 2015, e dau vakarautaki na kedra kakana na lewenivuvale e Peceli. E mani tara e dua na vanua lailai ena nodra rumu mera vakasaqa kina. Kena ibalebale, sa rawa nira dui vakasaqara ga na kedra kakana. O Kumiko e dua na tacida goneyalewa e veiqaravi tiko ena valenivolavola ni tabana e Japani, e kaya: “Na itaratara ni valenikuro qo e vaka ga au tiko mai neitou vale. E uqeti au tale ga meu dau tokona na ituvatuva vou e Peceli.”

 Na inaki bibi ni cakacaka e vakayacori tiko ena valenivolavola ni tabana e Japani, ya me tokona na cakacaka vakavunau e vuravura raraba. (Maciu 28:19, 20) Na valenivolavola e Japani e dau tabaka tale ga na iVolatabu taucoko. Qori na vuna e okati tale ga ena tarataravaki qo na biu ni misini ni koti pepa, kei na misini e dau kumuna na benu ni pepa me taqomaki ira na cakacaka ena tabaivola. E voleka ni dua na milioni na dola na isau ni misini kei na kena biu. Ia e vakadeitaka ni rawa ni tabaka tiko ga na valenivolavola ni tabana na kakana vakayalo, qai vakau e veiyasa i vuravura.

 Era saga na tacida me tabaki tiko ga na iVolatabu ena gauna ni tarataravaki. O Trey e lewe ni Komiti ni Tabana e Japani, e kaya: “E sevutaka na isoqosoqo e levu na vakadewa ni iVolatabu ena gauna ni tarataravaki, qai levu era vinakata na iVolatabu e veiyasa i vuravura. Era cakacaka vata gona e levu na tabana kei ira na dautaravale me tuvanaki na gauna me biu kina na misini vou, kei na gauna me tabaki kina na ivola.” E voleka ni 220,000 na iVolatabu e tabaki e veivula mai na Maji ina Okosita 2023, na gauna sara ga e caka tiko kina na tarataravaki ena vanua ni tabaivola. E vakaoti na kena tara qai lailai na ilavo e vakayagataki kina.

 Na vakabula livaliva e tiki bibi tale ga ni vakavinakataki vale. Kena ivakaraitaki, ena biu na sola vou, qori ena vakabula e rauta ni $120,000 na isau ni livaliva e veiyabaki. Ena biu tale ga na katubaleka iloilo ena vakalailaitaka na vakayagataki ni livaliva, qai vakabula e $10,000 e dau saumi e veiyabaki. E saulevu na iyaya e vakayagataki ena vakabula livaliva, ia e bula kina e sivia ni 3.5 na milioni na dola. E sega tale ga ni vakacacana vakalevu na veika bula.

 Na veiveisau ena rua na valenivolavola ni tabana qori e vakaraitaka na levu ni cakacaka e vinakati ena itikotiko e Peceli me rawa ni tokona na vunau ena yalava. Ia e se bera ni oti na cakacaka. O Aaron e veiqaravi tiko ena Tabana ni Tarataravaki e Veiyasa i Vuravura (Worldwide Design/Construction Department), e kaya: “E levu na cakacaka era sa cakava na tacida, ia e se vo tale tu e levu na ka me caka.” Ena vakayacori gona vakacava? E tomana: “E levu na ilavo e cautaki me vakayacori kina na cakacaka qori. Keitou vakavinavinakataka tale ga na nodra soli ira vakarawarawa na bolecakacaka ena veigauna sa oti, kei ira na tu vakarau mera veivuke tale ena dua na gauna mai muri. Nodra veitokoni vakayago kei na nodra veivuke vakailavo na mataveitacini e vakaraitaka ni vakalougatataka tiko o Jiova na cakacaka qo.”—Same 110:3.

 E tokoni ena cau na tarataravaki kei na vakavinakataki ni Peceli, levu na cau qori e caka ena donate.pr418.com. Vinaka vakalevu na nomuni lomasavu ena cau.