E vinakata o Jiova mera kilai koya kei na nona Matanitu vakalomalagi na tamata kece, se mani vakacava na kedra ituvaki. (1 Timoci 2:3, 4) Qori na vuna keimami vakarautaka kina na iVolatabu, kei na ivola vakaivolatabu mera wilika na tamata kece wili kina o ira na galu. E vakarautaka gona na isoqosoqo ni iVakadinadina i Jiova e vica vata na udolu na vidio vagalu a me baleti ira, qai vakadewataki ena sivia na 100 na vosa! Ia e vakarautaki qai veisoliyaki vakacava? Na veiveisau cava e vakayacori ni toso na gauna?

 Era vakadewataka na tabana ni vakadewa e veiyasa i vuravura na ivola, kei vidio ena vosa vagalu. Ni bera na vakadewa, era na dikeva vinaka na ivola kei na vidio. Oti era na qai saga me vakadewataki donu ena vosa vagalu. Ni vakadewataki oti sa na qai katoni na kena vidio. Nikua, era sa veiqaravi tiko ena vosa vagalu e 60 na timi ni vakadewa, e 40 tale na timi era veiqaravi vagauna.

 Ena gauna sa oti, e saulevu na vakarautaki ni vidio ena vosa vagalu. Nikua, e saulevu toka na itaba kei na so tale na iyaya ni katokatoni. E vinakati tale ga me vakarautaki na rumu me katoni kina na vidio, eso na gauna e dau vakavinakataki eso na vale me caka kina na katokatoni. E dau vakayagataki e sivia e $30,000 b me vakarautaki kina na vanua ni katokatoni, kei na iyaya mera vakayagataka na timi ni vakadewa.

 Me rawa ni vakayagataki vinaka na cau, e saga na isoqosoqo me vakavinakataka qai vakarawarawataka na vakadewa. E vakarautaki eso na iyaya vovou e yaga, qai sau lailai. E sega ni vakarautaki e dua na rumu ni katokatoni, ia era na boroya drokadroka na daunivakadewa na lalaga ena nodra rumu qai katoni kina na vidio. Ke vinakati e vica vata mera vakadewa vagalu ena dua na vidio, e rawa nira katona yadua ga mai nodra vale. E sega ni vinakati mera gole ena dua na vanua ni katokatoni.

 E vakarautaka tale ga na isoqosoqo e dua na porokaramu me vukei ira na daunivakadewa ena vosa vagalu. Qori me vakatotolotaka na cakacaka. Era vakavinavinakataka na tacida na porokaramu qori. E kaya e dua na tacida o Alexander: “Dua na ka na levu ni vidio ena vosa vagalu. Au marautaka dina, au dau sarava e veisiga.”

 Gauna qo, e dua na timi ni vakadewa ena vosa vagalu ena vakayagataki e rauta ni $5,000 me voli kina na iyaya ni vakadewa. Me rawa ni vakarautaki kina na vidio ena vosa vagalu ena levu tale na vosa.

 Ni vakarautaki oti e dua na vidio ena vosa vagalu, ena vakau mera lai sarava na galu. Na veigauna sa oti, e dau vakarautaki na kaseti ni vidio (cassette) kei na DVD. Ia e saulevu qai taura na gauna na kena vakarautaki, e levu tale ga na cakacaka e caka kina. Ena vakau na katokatoni qori ina dua na kabani me ratou lai vakarautaka e levu tale na kena kaseti ni vidio, se DVD. Oti sa na qai vakau ina veivavakoso. Ena 2013, e vakayagataki e sivia e $2,000,000 me vakarautaki kina na vidio ni vosa vagalu.

 Dua na ka nodra vakavinavinakataka na tacida era galu na sasaga e cakava qo na isoqosoqo. Ia e dau dredre na vakayagataki ni vidio, ni vakayagataki kina e levu na kaseti ni vidio se DVD. Kena ivakaraitaki, ena rawa ni vakarautaki e levu na DVD me katoni ga kina e dua na ivola ena iVolatabu. E kaya o Gilnei e dua na tacida mai Brazil: “Ni bera ni keimami wilika e dua na tikinivolatabu keimami na vaqara mada i liu na kena kaseti. E sega sara ga ni rawarawa.” E kaya e dua na tacida yalewa o Rafayane, e dau sarava na vidio vagalu: “E dredre meu vuli vakataki au. E taura na gauna na vaqarai tiko ni tikinivolatabu se idusidusi ni noda ivola.” Nira gole na tacida ena cakacaka vakavunau era na kauta na DVD kei na kaseti ni vidio, me rawa nira sarava na tataleitaki ena nodra tivi. Eso era kauta sara ga na nodra tivi. Toso na gauna, sa vakarautaki na misini lailai me saravi kina na DVD, levu na tacida era dau kauta qori ena cakacaka vakavunau. Dua na tacida tagane o Bobby, e tiko mai Merika. E kaya: “Ke o sa wilika oti e dua na tikinivolatabu qai via wilika tale e dua, ena vinakati mo veisautaka na DVD. Qori ena taura e levu na gauna, e vakadredretaka tale ga na neimami vakayagataka na tikinivolatabu ena neimami veivosaki.”

 Ena 2013, e sevutaka na isoqosoqo i Jiova na porokaramu na JW Library Sign Language. Qori e vakarawarawataka na download, kei na saravi ni vidio ni vosa vagalu ena talevoni se tablet. A sevutaki i liu na JW Library Sign Language ena vosa vagalu ni Merika. Ena 2017, e qai sevutaki ena so tale na vosa. Dua na ka nodra marau na mataveitacini e veiyasa i vuravura. E kaya e dua na tacida mai Brazil o Juscelin: “Au sega sara ga ni namaka! E laurai ga kina na levu ni nona lomani keimami na galu na iLawalawa Dauvakatulewa, kei na nona vinakata me keimami matua vakayalo me vakai ira ga na vo ni mataveitacini. Dua na ka na levu ni noqu marau, e uqeti au tale ga meu vulica vakalevu na iVolatabu.”

 Gauna qo, keimami vakarautaka na vidio ena vosa vagalu kece e biu ena iyaya vakalivaliva qai rawa ni download ena neimami website, kei na JW Library Sign Language. E rawa ni vakadewataki, katoni qai veisoliyaki na vidio ena vica ga na siga. I liu, e dau caka qori me vica na vula se yabaki. Ia na gauna qo sa sevutaki vata ga na vidio ena levu na vosa vagalu, kei na noda ivola vakaivolatabu.

 Qo na ka era kaya eso na tacida era vosa vagalu. Dua na tacida yalewa o Klízia, e kaya: “E sega tale ni dua na isoqosoqo e kauaitaki ira na galu me vakarautaka na kakana vakayalo, qai vakarawarawataka na kena saravi. Na isoqosoqo ga i Jiova e cakava qori.” E kaya o Vladimir: “Na vakarautaki ni vidio ena vosa vagalu e laurai ga kina ni o Jiova e sega ni dauveivakaduiduitaki.”

 E dau volai ena vidio ni vosa vagalu: “Na vidio qo e dua na tiki ni cakacaka ni vuli iVolatabu ena vuravura raraba e tokoni ena cau.” E vakavinavinakataki vakalevu na nomuni cau, e levu qori e caka ena donate.pr418.com. E vakarautaki rawa kina na iVolatabu kei na ivola vakaivolatabu vei ira na tamata kece, okati kina na vosa vagalu.