E veiyabaki era na sureti na veiqaravi vakatabakidua e veiyasa i vuravura mera lai vuli ena Koronivuli e Kiliati e dau caka ena Watchtower Educational Center e Patterson, mai Niu Yoka. a Era vulica kina na gonevuli na sala me vuavuaivinaka kina nodra itavi era lesi kina ena isoqosoqo i Jiova. E vukei ira tale ga ena sala mera veitokoni me dei na ivavakoso, kei na valenivolavola ni tabana e veiyasa i vuravura.

 Era vuli e Kiliati na dui matatamata. Kena ivakaraitaki, era vuli ena 2019 na ika147 ni kalasi, ra qai tiko kina e le 56 na gonevuli mai na 29 na veivanua. O ira qo era veiqaravi vakatabakidua e Peceli, ivakatawa ni tabacakacaka, daukaulotu se painia lavotaki.

 Ni bera na vuli sa dau caka rawa na vakavakarau. Kena ivakaraitaki, na Tabana e Qarava na Veilakoyaki ena iTikotiko Liu (WHQ Travel), ena volia nodra tikite na gonevuli. Vei ira na ika147 ni kalasi e Kiliati e rauta ni $1,075 na ilavo ni Merika nodra ivodovodo na gonevuli yadua nira gole qai lesu mai Patterson. O ira na gonevuli mai na Yatu Solomoni era vuka vaka va ra qai yaco i Patterson, era qai vuka vakatolu nira lesu tale i nodra vale. E sivia e 35,400 na kilomita na yawa ni vanua qori, na isau tale ga ni nodra tikite na gonevuli yadua e $2,300 na ilavo ni Merika. Na tabana ni WHQ Travel ena vakaraica tiko ena kompiuta na tikite e sau lailai me rawa ni vakabula ilavo. Ke mani laurai e dua na tikite ena qai porokaramutaki na kompiuta me vakaraica tiko na tikite qori e veimacawa se veivula ke sa lutu sobu sara na kena isau. Ratou na vakayagataka tale ga eso na tikite e solia wale na kabani ni waqavuka.

 E levu na gonevuli ena vinakati nodra visa mera gole i Merika. Ena vinakati gona vei ratou na Tabana ni Lawa ena iTikotiko Liu me ratou vakarautaka na nodra visa. E rauta ni $510 na ilavo ni Merika na isau ni nodra visa na gonevuli yadua kei na kena rejisita.

 E yaga vakacava vei keda na ka era vulica na gonevuli e Kiliati? O Hendra Gunawan e dua na qase ni vavakoso ena Cevaicake kei Esia, rau lewena tale ga na ivavakoso qori e dua na veiwatini rau vuli mai Kiliati. E kaya o Hendra: “E liu e sega ni dua na painia tudei ena neitou ivavakoso. Ia na nodrau gugumatua kei na nodrau yalo gu na veiwatini qo, e uqeti ira e levu mera painia tale ga. Toso na gauna, e sureti e dua na tacida yalewa ena neitou ivavakoso me lai vuli ena Koronivuli ni iTalatala ni Matanitu!”

 O Sergio Panjaitan e dau cakacaka vakalevu kei ratou na gonevuli mai Kiliati ratou tiko e Peceli ena Cevaicake kei Esia. E kaya: “E sega ni yaga ga vei ratou na ka ratou vulica mai Kiliati, ia e yaga tale ga vei keimami. Levu na ka ratou vulica mai kina! Ratou sega ni nanuma ni ratou uasivi ira eso tale, ia ratou wasea na ka ratou vulica. E veivakayaloqaqataki dina.”

 E sauma vakacava na isoqosoqo na vuli vakalou qo? Ena nomuni cau moni tokona kina na cakacaka e veiyasa i vuravura, e levu na cau qori e biu ena donate.pr418.com. Vinaka vakalevu na nomuni veitokoni ni rawa nira vuli kina na gonevuli e veiyasa i vuravura.