Era dauveivuke na iVakadinadina i Jiova ena sivia na 200 na vanua. Ia rauta ni 35 na veivanua qori era rawa ni sauma ga vakataki ira na tacida na ka era vinakata ena nodra cau. Era na qaravi gona vakacava na tacida ena vanua era sega soti ni rawa ka?

 E dau raica na iLawalawa Dauvakatulewa ni iVakadinadina i Jiova na veika era vinakata na tacida e veiyasa i vuravura, me e rawa nira qaravi Jiova qai vunautaka na itukutuku vinaka. E dau tuvanaki vinaka na ka vakailavo kei na sala e vakayagataki kina. Ke sivia na cau e ciqoma na valenivolavola ni tabana, ena vakayagataki eso na cau ena vanua e sega soti ni rawa ka. Qori e muri kina na ka era cakava na lotu vaKarisito ena imatai ni senitiuri, oya mera veivukei “me tautauvata kina” na ka e tu vei ira. (2 Korinica 8:14) Era cautaka gona e levu na ka era taukena me levu kina na ka e lailai vei ira eso tale na lotu vakarisito.

 Cava era kaya na tacida era ciqoma na cau ena so tale na valenivolavola ni tabana? Kena ivakaraitaki e Tanzania, e levu vei ira e kea era bula ga ena rua na dola ena dua na siga. E vakayagataki kina na cau qori me vakavinakataka na Vale ni Soqoni era dau vakayagataka na ivavakoso o Mafinga. Qo na ka era vola: “Ni tekivu na tarataravaki, e tubu na kedra iwiliwili na dau tiko ena soqoni! Keimami vakavinavinakataki Jiova kei ira na mataveitacini e veiyasa i vuravura ena nodra lomasavu. Rawa ni keimami marautaka kina e dua na vanua vinaka ni sokalou.”

 Ena vuku ni matedewa na COVID-19, eso na tacida e Sri Lanka era sotava na leqa ni kakana, wili kina o Imara Fernando kei na luvena tagane lailai o Enosh. Ia rau vukei ena nodra cau eso na tacida ena so tale na vanua. Qo na ka rau vola ena nodrau kad: “Keirau vakavinavinakataki ira na tacida era vakaraitaka na loloma ena gauna dredre qo. Keirau marau ni keirau lewena na vuvale qo, keirau masulaki ira tale ga na mataveitacini ni na tokoni ira tiko ga o Jiova ena iotioti ni veisiga qo.”

 Se vanua cava ga era tu kina na tacida, era vinakata mera cautaka na ka era taukena. Kena ivakaraitaki o Enosh, e vakarautaka e dua na kato lailai me cau kina me rawa ni vukei ira eso tale na vuvale. A cakava tale ga qori o Guadalupe Álvarez e tiko e Mexico, qai so vei ira ekea e lailai sara na kedra isausau ni cakacaka qai tu tu yadua mera veisaumi. Ia e cau rawa tiko ena ilavo lailai e rawata. E vola: “Au vakavinavinakataki Jiova ena nona loloma kei na nona yalovinaka. Au kila ni na kumuni noqu cau kei na nodra eso tale me rawa ni yaga vei ira eso tale na tacida era vinakata tu na veivuke.”

 Dua na ka nodra marau na tacida ena valenivolavola ni tabana ena nodra cau mera vukei na tacida ena so tale na vanua. E kaya o Anthony Carvalho, e lewe ni Komiti ni Tabana e Brazil: “Vica vata na yabaki nodra veivuke tu vakailavo na tacida ena so tale na vanua me tokoni kina na cakacaka eke. E rawati kina e Brazil e dua na tubu levu, ia qo sa vinaka na ka ilavo rawa ni keimami vukei ira na tacida ena so tale na vanua. Dua na ka neimami kauai ena cakacaka vakavunau e veiyasa i vuravura, kei na sala keimami rawa ni vukei ira kina na tacida ena cakacaka vakaitalatala.”

 Eda na tokoni ira vakacava na tacida era vinakata tu na veivuke? Eda na sega ni vakau ilavo ina valenivolavola ni tabana ena dua tale na vanua. Ia eda na cau ena cakacaka e vuravura raraba. Rawa nida cakava qori nida cau ena kato e tiko ena vale ni soqoni e volai kina “Cakacaka e Vuravura Raraba,” se ina donate.pr418.com. E marautaki vakalevu na cau va qori.