Dua na gauna marautaki dina vei ira na iVakadinadina i Jiova na yabaki qo ni sevutaki kina na iWasewase 1 ni drama, Na iTukutuku Vinaka i Jisu. E vica vata na milioni era sa sarava oti, ia qori e dua ga vei ira na imatai ni 18 na iwasewase! Era veivuke vakacava na tacida me caka kina na drama qori? Sala cava o tokoni ira kina?

 E levu na iyaloyalo ni iTukutuku Vinaka, e caka ena valenivolavola ni tabana e Ositerelia, qai rauta ni le 50 ina 80 era vakaitavi kina. a E vakarautaki na kedra ivakasigalevu, vakayakavi, kei na so tale na kakana. Sa qai dau tuvanaki rawa tu na ka kece mera kania. E kaya o Esther e veiqaravi ena Tabana ni Kakana: “E voli na kakana ena duidui sitoa, me rawa ni bulabula tiko ga e sau vinaka tale ga. Keitou dau veiveisautaka na isaqasaqa ni kakana me kua ni dua na ka e maumau.” E rauta ni va na dola na ilavo ni Merika e vakayagataki e veisiga me isau ni kena kakana e dua na tamata.

 E bibi tale ga na nodra taqomaki o ira na vakaitavi kina, sega ni kakana wale ga. Na vuna? E dau totoka na draki e Ositerelia, ia eso na gauna e veivakaleqai tale na katakata sivia ni siga. Me rawa nira taqomaki mai kina, era vakarautaka na dauveivuke na valelaca kei na so na vanua ni vakacagicagi. E vakarautaki tale ga na kirimu e taqomaka na yago mai na siga, na iviu kei na wai. E kaya o Kevin e veiqaravi ena Tabana ni Audio/Video: “E levu na tacida era veivuke tiko qo era dau mai veivuke e Peceli me vica ga na siga. Era qarava na itavi qori ena yalomalumalumu, era marautaka tale ga. Na nodra veitokoni e vakayacori vinaka kina na ka kece qo.”

 Eso na iyaloyalo e sega ni taucoko sara na kena irairai ni tabaki e valenivolavola ni tabana, i tuba se na rumu ni katokatoni. Sa qai dau veiveisau na vanua e caka kina na veitaba. Me rawa ni tabaki na iyaloyalo ena gauna vakaivolatabu, era dau gole na dauveitaba kei ira na vakaitavi kina ena vanua yawa e sega kina na wa ni livaliva, gaunisala simede, kei na vale ena gauna qo. E tawani vinaka na nodra isulu, iyaya ni drama kei na so tale na ka. Sa qai vakau me lai maroroi tu ena vanua ni veitaba. Ni bera ni tekivu na veitaba, ena raica na tacida e ivukevuke ena tabana qo me tu vinaka na idini livaliva (generator), wai ni gunu savasava kei na vale ni vakacegu. O ira kece na vakaitavi era vakaicili vei ira na tacida dauveikauaitaki era tu e kea, eso era tiko ena valeqiqi, otela kei na so na vale lalai.

 E rawa ni saulevu toka na vanua e caka kina na veitaba, kania vakalevu na gauna qai veivakaocai vei ira na vakaitavi kina. Cava gona sa qai caka? Ena 2023, e vakadonuya na iLawalawa Dauvakatulewa me voli e dua na screen levu (video wall). Na kena isau e rauta ni 2.5 na milioni na dola na ilavo ni Merika. E tabaki ena screen qori eso na vanua e vaka ga eda tu dina e kea. E laurai vinaka tale ga kina na iyaloyalo qai lakovata kei na kena rarama e vaka ga e tabaki tu i tuba na drama. Qori e sega ni lai caka kina na veitaba ena vanua e saulevu. E kaya o Darren e lewe ni Komiti ni Tabana e Ositerelia: “Na vakayagataki ni screen qo e sega ni veivakaocai vei ira na vakaitavi kina, qai levu na ka era rawa ni tabaka na dau ni veitaba. Kena ivakaraitaki, ke caka na veitaba i tuba ena lekaleka ga na kena tabaki na matanisiga ni bera ni dromu. Ia na screen levu qo, e rawa ni tabaki vakavica vata na dromu ni siga me yacova ni sa veiganiti kei na kena e vinakati.”

 E vica vata na drau na tacida era veivuke ena kena caka na drama, “iTukutuku Vinaka.” Cava era kaya ena nodra veitokoni na mataveitacini?

 O Amber e veivuke tale ga ena tabana qo. E gole me sivia e 700 na kilomita mai nona vale i Melbourne. Qo na ka e vola: “Gauna ga au sobu mai kina e raraniwaqavuka era kauaitaki au vinaka na mataveitacini e Peceli. Levu era dau sureti au me keimami lai kanavata se gunu ti. Ena vanua mada ga e caka tiko kina na drama, au vakila niu kauaitaki qai lomani. Dua na ka na veivakalougatataki au vakila kina. E yaga dina na sasaga au cakava!”

 E veiqaravi o Derek ena tabana ni caka iyaloyalo. E kaya: “Levu na veitabana era tokoni keimami ena gauna e tekivu caka kina na drama qo. Au vakavinavinakataka nodra solia na tacida nodra gauna, iyau kei na kaukaua mera veivuke ena kena vakarautaki na drama qo. Era dau veitokoni, yalorawarawa qai veikauaitaki. E vakalougatataki keimami kece o Jiova. Au vakadeitaka kina ni o Jiova e sega wale ga ni raica na itinitini ni ka keimami cakava, ia e raica tale ga na sala keimami cakava rawa kina.”

 Vinaka vakalevu na nomuni cau e rawa ni veivuke ena kena caka na drama qo, wili kina na cau ena donate.pr418.com.