Sa tini vakacaca qo na yabaki na kena vakayagataki tiko na qiqi ena cakacaka vakaitalatala. E kilai rawarawa e veiyasa i vuravura, e rairai vinaka, qai rawarawa na kena vakayagataki. O Asenata e dua na tacida yalewa e tiko mai Poladi, o na rairai duavata sara ga kei na ka e tukuna: “E rawarawa na kena vakarautaki, qai rairai vinaka. E sega ni dredre na kena veikauyaki, qai rawarawa na kena vakaduri.”

 O via kila se vakarautaki vakacava na qiqi qori?

 Ena 2001, e vakadonuya na iLawalawa Dauvakatulewa mera vakatovolea na mataveitacini e Varanise e vica na iwalewale ni vunau e matanalevu, okati kina na vakayagataki ni qiqi. Kena ivakaraitaki, mera vakatotomuria na qiqi me vaka na qiqi ni kato ni sulu, kei na qiqi e vakayagataki ena gauna ni volivoli. Me vakaraitaki qai maroroi kina na noda ivola. E mani digitaka na valenivolavola ni tabana e Varanise na kena e vinaka duadua. Sa qai vica vata na yabaki nodra vakayagataka tiko na tacida na qiqi qori.

 Era marautaka na tacida e Varanise na vuavuaivinaka ni nodra vakayagataka na iwalewale qori. Ena 2011, e vakadonuya na iLawalawa Dauvakatulewa me caka tale ga e Niu Yoka, e Merika. E vakayagataki kina na qiqi kei na teveli ni vunau. Era raica na painia era vakaitavi kina ni vinaka cake na vakayagataki ni qiqi, ni rawarawa na kena veikauyaki. Era vakatututaka tale ga na sala me vakavinakataki kina. E vakayagataki na kau ena imatai ni qiqi, ia e dredre qai bibi na kena veikauyaki ena ikabakaba. E mani caka vinaka tale me mamada ga, e sega tale ga ni lutu ke kaukaua na cagi. E ka levu vinaka qai kaukaua, e rawa mada ga ni kau ena vanua sukusukura. E tiko tale ga ena daku ni qiqi na itawatawa ni ivola.

 E levu dina na ka e rawati ena iwalewale ni vunau qo! Ena 2012, e vakadonuya na iLawalawa Dauvakatulewa me vakayagataki e veiyasa i vuravura. Era kunea na tacida e dua na kabani e rawa ni bulia e levu tale na qiqi, e kaukaua qai rawarawa na kena veikauyaki.

 Toso na gauna, e caka tale eso na veisau lalai. Kena ivakaraitaki ena 2015, e vakarautaki na iubi palasitika me taqomaka na qiqi ni tau na uca. O Dina e dua na tacida yalewa e tiko e Georgia. Dua na ka nona vakavinavinakataka qai kaya: “E vaka ga e va ‘koteniuca’ tu na qiqi me taqomaki kina na ivola.” Ena 2017, e vakarautaki eso na pousta e tiko kina na makeneta ena so tale na vosa. O Tomasz e dua na tacida tagane mai Poladi, e kaya: “Dua na cakacaka levu me veisautaki na pousta e kabi ena qiqi. Ia e rawarawa sara qo ni sa tiko kina na makeneta.” E caka eso tale na veiveisau ena iyaya e dau tara kina qiqi me rawa ni kaukaua vinaka.

 E dua ga na kabani e bulia na qiqi ni vunau qai vakauta e veiyasa i vuravura. Na isau ni dua na qiqi e rauta ni $43 na ilavo ni Merika, e sega ni wili kina na isau ni kena vakau. Me yacova mai qo, sa vakayagataki ena qiqi e sivia ni $16 na milioni na ilavo ni Merika. Sa vakau ena ivavakoso e veiyasa i vuravura e sivia ni 420,000 na qiqi.

 Me rawa ni vakayagataki vinaka na noda cau, ena otataki e levu na qiqi ena dua ga na gauna. Ke mani ca e dua na qiqi, e rawa ni otataka na ivavakoso na kena gacagaca lalai me rawa ni vakavinakataki kina. Ena sega gona ni gadrevi me otataki e dua tale na qiqi vou.

 Era marautaka na dautukutuku e veiyasa i vuravura mera vakaitavi ena vunau ena qiqi. E kaya e dua na tacida o Martina mai Ghana: “Eda dau golevi ira na lewenivanua ena cakacaka vakaitalatala. Ia au taleitaka na iwalewale qo nira sa lakovi keda sara ga mai. E ivakadinadina levu tale ga vei ira na tavali tu e gaunisala.”

 Ena dua tale na vanua e Aferika, e gole yani ina qiqi e dua na turaga qai taura eso na ivola ena nona vosa. Oti e dua na macawa e lesu vei rau na tacida ena qiqi, qai kaya: “Au sa wilika kece na ivola au taura. Au taleitaka na itukutuku era tu kina. Au vinakata sara ga meu wasea vei ira na wekaqu ena koro.” E rauta ni 500 na kilomita na yawa ni vanua e tiko kina na qiqi ina nona koro. Oti e rua na vula e lesu tale, qai kaya: “O ira kece mai na koro era sa wilika na ivola, ra qai marautaka vakalevu. Era vinakata mera iVakadinadina i Jiova, ia e tiko eso na nodra taro. Kena ivakaraitaki, era kila ni dodonu mera tabadromuci ena wai ena gauna era papitaiso kina. Ia e sega ni dua na uciwai e tu mai na koro. E dodonu me keimami gole mai ke me keimami papitaiso?” Rau tuvanaka sara na dautukutuku e dua na painia e veikilai vosa kei na turaga qo. Tekivu mai na gauna qori, sa toso vinaka sara tiko na nodrau vuli.

 Eda marau ni vakayagataki tiko na qiqi me rawa ni vunautaki kina na itukutuku vinaka “ena veiyasa i vuravura me ivakadinadina ina veimatanitu kece.” (Maciu 24:14) E saumi vakacava na kena caka? Ena nomuni cau ena cakacaka e vuravura raraba, e levu na cau qori e biu ena donate.pr418.com. Vinaka vakalevu na nomuni lomasavu.