Sa sivia qo e 130 na yabaki nodra dau soqo vata e veiyabaki na iVakadinadina i Jiova. E okati ena porokaramu ni soqo e sivia ni 40 na ivunau, ivakatagi, veitarotarogi kei na vidio. Me rawa ni yaga qai veiuqeti na soqo vei ira na vakarorogo ena vinakati mera “rogoca qai raica” vinaka. (Luke 2:20) Ia se vanua cava eda tu kina, e yaga vakacava na nomu cau vei ira na tiko ena soqo?

 Ena veivanua vakavalagi e levu na raraniqito lelevu sa tu kina na iyaya ni audio/video. Ia ke da sauma na vanua qori me caka kina na soqo, cava na vuna meda vakayagataka ga kina na noda misini ni audio/video? O David e veiqaravi ena Tabana ni Local Broadcasting Department ena itikotiko i liu (LBD), e kaya: “Eso na vanua e redetaki me caka kina na soqo e rawa ni vakayagataki na misini qori me sivia e ono na aua. Kena ivakaraitaki, e dau kacivaki ena raraniqito eso na itukutuku leleka kei na ivakatagi. E dau vakaraitaki ena vidio na poidi ni qito, itukutuku ni veivoli, se saravi tale na qito. Ia keitou vinakata mera sarava na vakarorogo na vidio balavu, mera rogoca qai kila vinaka na ka kece e tukuni ena buturara.”

 E duidui na vanua e dau caka kina na soqo, e vinakati gona me vakarautaki vakavinaka na iyaya ni audio/video. Ni sa digitaki na vanua me caka kina na soqo, ena qai raica na tabana ni LBD ni valenitabana, na vanua mera dabe kina na vakarorogo qai vakatau ena iwiliwili e rawa nira tiko kina. Era na qai tuvanaka na tacida ena tabana qori na vanua me biu kina na sipika kei na vidio, na sala mera sema kina, kei na iyaya kece e vinakati me rawa nira raica na vakarorogo qai rogoca vinaka na porokaramu.

 Ena via dredre toka na vakarautaki ni iyaya ni audio/video ena vanua ni soqo e vakadewataki kina na porokaramu ena so tale na vosa. Ke caka qori, ena vinakati vei ira na daunivakadewa mera sarava qai rogoca na porokaramu ra qai vakadewataka ena nodra vosa na vakarorogo. Eda vakavinavinakataka na iwalewale qori ni rawa ni rogoci qai saravi vata kece na vidio ke vakadewataki mada ga ena walu na vosa. E kaya o David: “E vereverea na vakarautaki ni iyaya ni audio/video ena vanua ni soqo. E vinakati tale ga mera vakavulici vinaka o ira na bole mera veivuke kina.”

 E levu na valenivolavola ni tabana sa tiko ga nodra iyaya ni audio/video era dau vakayagataka e veiyabaki. Ke va qori, era na tuvanaka na tacida na kena vakau na iyaya kece mai na vanua ni soqo ina dua tale. Kena ivakaraitaki na valenivolavola ni tabana e Merika, e vakayagataka e veiyabaki e sivia ni $200,000 a na kena vakau na iyaya ni soqo. Ia qori e sau lailai mai na kena voli tale qai maroroi eso tale na iyaya me vakayagataki ena soqo. O Steven e qarava na tabana ni audio/video ena soqo e dau caka e Kenada, e kaya: “Ratou dau saga nodratou vinaka kece neitou timi ni audio/video me ratou raica, qai maroroya vinaka na kena iyaya lalai kece ni bera ni vakau me vakayagataki ena soqo tarava.”

 Ni saumi eso na kabani meda vakayagataka na nodra iyaya ni audio/video e dau saulevu, e sega ni vinaka sara qai so na kena iyaya sa ca tu. Oya na vuna eda sa volia ga kina na noda iyaya ni audio/video. Gauna qo, na isau ni dua na screen levu e biu e loma (indoor LED video wall) e rauta ni $24,000, e lima na mita na kena balavu qai tolu na mita na kena cere. E dua na wa ni gusunivosa e rauta ni $20, qai 15 na mita na kena balavu. Ni bera ni voli e dua na iyaya, ena raica vata qori na tabana ni LBD kei na Tabana ni Volivoli qai “cakacakataka na kena isau.” (Luke 14:28) Qo eso na ka ratou na veivosakitaka, e le vica ena yaga vei ira na misini qo? E vinaka me voli na iyaya qo? E tiko e dua na vanua vinaka me maroroi kina? Vakacava e tiko na kena iyaya me taqomaki vinaka kina, era vakavulici vinaka tale ga o ira era qarava?

 Me rawa ni dede na kena vakayagataki na iyaya ni audio/video qai vakabula ilavo, e dau vakavinakataki wasoma na kena iyaya vakalivaliva. Ke vakau ina dua tale na vanua ni soqo, ena biu ena kena itawatawa e taqomaka vinaka qai sega ni vakacacani. Ena dau vakavinakataki tale ga na kena itawatawa.

 Nira gole ena noda soqo o ira na sega ni iVakadinadina i Jiova, era dau qoroya na totoka ni vidio. Kena ivakaraitaki, e dua na turaga e cakacaka ena dua na kabani ni retio kei na tivi e kilai levu e vuravura, e kaya ni totoka vakaoti na noda vakarautaka na vidio kei na veika e saravi kina. O Jonathan, e dau veivuke qai vakarautaka na iyaya ni audio/video ena soqo. E kaya: “Dua na ka nona kurabuitaka na turaga qori ni o ira na tacida era veivuke ena tabana qo era bolecakacaka ga, era sega ni kenadau kina. E kaya na neitou vakarautaka na iyaya ni audio/video e dua veimama ga na siga, ia ke nona kabani ya ena taura tiko e lima na siga.” E kaya e dua tale na manidia ena dua tale na vanua ni soqo: “Era dau vakayagataka na vanua qo e levu era kenadau ena lagasere kei na vidio, ia e duatani duadua o kemuni, oni kila vinaka na ka oni cakava qai toka ena kena ivakatagedegede e cake sara!”

 E yaga vakacava vei iko na tabana ni audio/video ni noda soqo? De dua o na duavata tale ga kei na ka e tukuna o David, e tiko mai Igiladi. E kaya: “Au sa yabaki 88 qo, qai sega vakadua niu calata na noda soqo. Ia qo sa rawarawa sara na veika au vulica ena gauna ni soqo. E matata qai vakarautaki vinaka na vidio kei na porokaramu kece. Sa bau totoka dina, vinaka vakalevu.” O Micheal e tiko mai Nigeria, e kaya: “Sa rawarawa sara qo me keimami raici koya e vunau qai sarava na vidio. Keimami vakarorogo vinaka qai sega ni vakawelei ni caka tiko na porokaramu.”

 Na usutu ni noda soqo ena yabaki qo “Tukuna na iTukutuku Vinaka!” Ni o tiko ena dua na kena soqo ni veimatanitu se soqo lavotaki, vakasamataka na ka kece e caka kina mo rawa ni rogoca qai raica na porokaramu. Oni vakavinavinakataki ena nomuni cau, eso na cau e caka ena donate.pr418.com, me rawa ni vakayacori vinaka kina na soqo. Vinaka vakalevu na nomuni lomasavu.