E vinakata o Jiova me vakavulici ira na nona tamata. E vakarautaka gona na nona isoqosoqo e vica na koronivuli mera vakavulici ena nodra ilesilesi. Dua qo na Koronivuli ni iTalatala ni Matanitu (SKE). Ena vica tiko ga na yabaki sa oti, e kauaitaka na isoqosoqo na ka me vulici kina kei na vanua e caka kina na vuli. Qori me vakarawarawataka nodra veivakavulici na qasenivuli, me vakavinakataka tale ga na vanua mera vuli kina na tacida. E yaga vakacava nomuni cau ena tikina qo?

 E vica vata na yabaki na kena vakayacori tiko na vuli vakalou ena Vale ni Soqoni, kei na Vale ni Soqo Lelevu. Ia cava na vuna e tara tale se vakavinakataki eso na vanua e caka kina na vuli? Raica mada e tolu na vuna qo.

 Vinakati vakalevu na veivuke. E kaya o Christopher Mavor, e dauveivuke ena Komiti ni Cakacaka ni iLawalawa Dauvakatulewa: “E laurai ni levu na valenivolavola ni tabana era vinakata na veivuke ena yalava. Kena ivakaraitaki, ena 2019, e vinakati ena valenivolavola ni tabana e Brazil e rauta ni le 7,600 o ira na vuli oti ena SKE mera veivuke ena yalava e qarava na valenitabana.” E kaya na valenivolavola ni tabana e Merika ni vinakati tale ga e levu na painia gugumatua mera vakavulici ira eso tale ena vunau lavotaki e matanalevu ena siti, vunau ena ikelekele ni waqa, kei na vunau e valeniveivesu. E vinakati tale ga na tacida tagane mera veiqaravi ena Tarataravaki e Qarava na Valenivolavola ni Tabana, kei na Komiti Veitaratara kei na Valenibula. Era na yaga sara ga kina o ira na tacida era vuli oti ena SKE.

 Levu era via vuli. E sega ni tukuni rawa na levu ni fomu ni vuli ena SKE era vakalewena e levu na tacida. Kena ivakaraitaki, ena loma ni dua na yabaki e ciqoma na valenivolavola ni tabana e Brazil e rauta ni 2,500 na fomu ni SKE. Ia e rawa nira vuli ga e le 950 ni sega ni levu na vanua ni vuli.

 Vale veiganiti. Ni caka na vuli ena Vale ni Soqoni se Vale ni Soqo Lelevu, era dau vakaicili na gonevuli ena nodra vale na mataveitacini. Na ituvatuva qori e ganita ga na vanua e sega ni vakayacori vakalevu kina na vuli e veiyabaki. Ia ke so na vanua e caka vakalevu kina na vuli, e sega ni vinaka mera veivakaicilitaki na mataveitacini me vica vata na vula ena dua na yabaki. E vakarautaki gona na vale mera tiko kina na gonevuli me rawa nira voleka ena vanua ni vuli, qai caka sara ga vakatabakidua me baleti ira.

 E rauta tiko ni vica vata na milioni na dola na ilavo ni Merika na isau ni kena tara e dua na vanua ni vuli, vanua mera tiko kina na qasenivuli kei na rauta ni 30 na gonevuli. E okati tale ga kina eso na ka ena veivuke ena nodra ka ni vuli, na vanua e tara kina, kei na so tale na ka.

 E dau tara na koronivuli ena vanua vakanomodi e yawa mai na siti, e rawarawa tale ga kina na sala ni veitosoyaki. Ena digitaki i liu na vanua e levu kina na dautukutuku baleta ni rawa nira veivuke ena caka, kei na vakavinakataki ni koronivuli kei na kena iyaya.

 E tiko tale ga na laibri, vanua ni vuli lesoni, kompiuta, misini dautabaivola (printer), kei na so tale na ka. E tara tale ga na vanua mera kana kina na qasenivuli, kei ira na gonevuli, vanua ni vakaukauayago kei na ka ni veivakamarautaki.

 E kauaitaki tale ga vakalevu na rumu era vuli kina. O Troy e veiqaravi tiko ena Tabana ni Tarataravaki e Veiyasa i Vuravura e Warwick, e Niu Yoka. E kaya: Keitou kere ivakasala vei ira na tacida ena Tabana e Qarava na Vuli Vakayalo me rawa ni keitou cakava na rumu ni vuli e vakarawarawataka nodra vulica na ka. Ratou sa qai solia mai na idusidusi me baleta na levu ni rumu kei na kena ituvatuva, wili kina na cina me vakayagataki, na gusunivosa kei na vidio.” Me baleta na vakarautaki ni iyaya vakalivaliva e vakayagataki ena vuli, e kaya o Zoltán e dua na qasenivuli ni SKE e Hungary: “Ni se qai tekivu, e sega na gusunivosa sa qai dau tukuni vei ira na gonevuli mera vosa i cake. Ia qo sa sega na leqa nira sa yadua sara ga na gusunivosa ena nodra desi!”

 E yaga vakacava vei ira na qasenivuli kei ira na gonevuli na vakavinakataki ni nodra vanua ni vuli? O Angela a vuli ena SKE e Palm Coast, Florida, e Merika. E kaya: “E vakilai kina na vakacegu qai tuvanaki vinaka na ka kece, wili kina na ituvatuva ni rumu ni vuli kei na vanua keimami tiko kina.” O Csaba e dua na qasenivuli ni SKE e Hungary, e marautaka nona dau kana vata kei ira na gonevuli. E kaya ni qori na gauna “era dau talaucaka kina na gonevuli na lomadra vei keimami, ra tukuna tale ga na veika era sotava. Qori e dua na sala keimami kilai ira vinaka kina. Keimami na qai wasea vei ira ena gauna ni vuli na veitikina e ganiti ira.”

 Era raica na gonevuli kei ira na qasenivuli na vakavinakataki ni koronivuli qo me ka ni veivakalougatataki mai vei Jiova na “Dauniveivakavulici Levu.” (Aisea 30:20, 21) E dua na tacida yalewa ena Yatu Filipaini e vuli ena SKE, a caka ena dua na vale e veisautaki me caka kina na vuli. E kaya: “Neimami tiko ena vuli e vaka ga ni keimami vulagi dokai nei Jiova. E vinakata me keimami marautaka neimami vulica wasoma nona Vosa.”

 E rawa ga ni tara, vakavinakataki qai maroroi vinaka na vanua ni vuli ena nomuni cau. E levu na cau qori e biu ena donate.pr418.com. Oni vakavinavinakataki vakalevu ena nomuni lomasavu.