Era dau veilomani na iVakadinadina i Jiova. (1 Pita 2:17) Levu vei keda eda duavata kei na tacida yalewa mai Kenya o Tannis. E kaya, “Au dau via kila sara ga na ka era sotava tiko na taciqu e veiyasai vuravura.” E rawa vakacava vei Tannis kei na milioni tale na iVakadinadina i Jiova mera kila na kedra itukutuku na tacida? Me tekivu mai na 2013, e sa vakarautaki qori ena noda website na jw.org, ena dua na iwasewase e vakatokai na iRogo.

 E tu ena iwasewase qori eso na irogo me baleti keda na iVakadinadina i Jiova me vaka ulutaga ni kena sevutaki na iVolatabu, cakacaka ni vakacoko, tarataravaki kei na so tale. E okati kina na kedra itukutuku na tacida era vesu ena vuku ni nodra vakabauta. E tiko tale ga kina eso na nodra ivakaraitaki veiuqeti na tacida me baleta na cakacaka vakavunau lavotaki kei na soqo ni iVakayakavi ni Turaga. O cei e vakaitavi ena vakarautaki ni irogo va qo, e vakarautaki tale ga vakacava?

 E qarava na wasewase ni iRogo na Valenivolavola ni iTukutuku, e kilai me OPI (Office of Public Information). E tiko ena itikotiko liu na tabana qo qai muria na veidusimaki ni Komiti ni Kodineita ni iLawalawa Dauvakatulewa. Era veiqaravi tiko kina e sivia na 100 na tacida—levu vei ira qori era bolecakacaka e Peceli—eso vei ira era dauvolavola, dauvakadidike, daudroini, kei na daunivakadewa. So tale era dau veitaratara kei ira na vakailesilesi vakamatanitu, o ira na vuli vinaka kei ira na daunitukutuku. Era veivuke ena OPI e sivia na 80 na Tabana Ni iTukutuku ena valenivolavola ni tabana e veiyasai vuravura.

 Rau na cakacaka vata na OPI kei na tabana ni itukutuku ena dua na vale ni tabana me vakarautaki e dua na irogo. Nira raica na tacida ke tiko e dua na itukutuku me biu ena iRogo, ena dikevi vinaka mada e liu. Ena okati kina na veitarotarogi kei na veivosaki kei ira na kenadau. Gauna sa kilai kece kina na itukutuku qori , sa na qai volai na ulutaga, caka kina eso na veiveisau, vakadodonutaki, okati kina na itaba kei na iyaloyalo, sa na qai vakau ina Komiti ni Kodineita me ratou vakadonuya.

 Cava era kaya na tacida me baleta na ulutaga e biu ena iRogo? E kaya o Cheryl, e dua na tacida yalewa mai na Yatu Filipaini, “Ni tekivu e dua na siga vou, au dau vinakata sara ga meu wilika na irogo me baleta na isoqosoqo i Jiova kei ira na nona tamata.”

 Era raica e levu na dauwiliwili na duidui ni ulutaga e biu ena iwasewase ni iRogo ena jw.org kei na nius era vakarautaka eso tale na tabana ni itukutuku. E kaya o Tatiana mai Kazakhstan: “Au dau nuitaka na irogo ena jw.org. Au kila ni tu kina na itukutuku dina qai nuitaki.” E kaya o Alma e dua na tacida yalewa mai Mexico: “E veivakayaloqaqataki dina na irogo ena noda website ni vakatauvatani kei na itukutuku ca eda dau rogoca ena nius e veisiga.”

 E sega wale ga ni dina na irogo ena noda website, e vaqaqacotaka tale ga noda vakabauta. E kaya o Bernard mai Kenya: “E vukei au na irogo ena noda website meu raici ira na taciqu mai na veiyasai vuravura, mera lewe ni noqu vuvale. Au dau cavuta sara ga na yacadra kei na ituvaki dredre era sotava ena noqu masu.” E kaya e dua na tacida yalewa o Bybron e tiko tale ga mai Kenya: “Au dau marau niu raica ni dau sevutaki na iVolatabu ena dua tale na vosa! Au kila kina ni sega ni dau veivakaduiduitaki o Jiova.”

 E veiuqeti tale ga na kedra irogo na tacida era sotava tiko na veitusaqati. E kaya o Jackline mai Kenya, “E vaqaqacotaka sara ga noqu vakabauta noqu vakasamataka nodra yaloqaqa. Au dau vulica na sala era vosota kina. Au raica ni bibi sara ga na veika lalai me vaka na masu, wili iVolatabu, kei na lagasere mada ga, qori sara ga na sala era vosota kina.”

 E kaya o Beatriz e dua na tacida yalewa mai Costa Rica me baleta na irogo ni leqa tubukoso: “Au vulica mai na irogo va qori na sala e tokoni ira kina na tacida na isoqosoqo. E dau vakarautaki totolo na veivuke qai yavutaki ena loloma. Au vakadinadinataka sara ga ni qo ga na isoqosoqo i Jiova.”

 Eda marautaka meda wilika na itukutuku butakatakata me baleti ira na tacida e veiyasai vuravura! E rawa ga qori ena nomuni cau ena cakacaka e vuravura raraba, levu vei kemuni oni cau ni oni vakayagataka na donate.pr418.com. Vinaka vakalevu na lomasavu ena cau.