Na ivakatagi e dua na isolisoli talei mai vei Jiova. E rawa ni yaga ina noda vakasama, lomada, rawa tale ga ni uqeti keda. Qori sara ga na ka e rawa ni cakava na noda sere (original song). Koya e bibi sara, ena vakavolekati keda vei Jiova.

 Tekivu mai na 2014, sa vakarautaki e sivia ni 70 na sere. Rauta ni dua na sere qori sa vakadewataki ena sivia na 500 na vosa ena gauna qo! De dua o na vakasamataka, ‘O cei e vakarautaka na sere kece qo? Cava eso na ka e caka me vakarautaki kina na sere?’

 Era vakarautaka na sere na timi ni vakatagi ni Audio/Video Services. Era muria na veidusimaki ni Komiti ni Veivakavulici ni iLawalawa Dauvakatulewa. E le 13 na tacida era tiko ena timi qori, ra qai veivuke ena kena buli na sere, tuvani, katoni, kei na so tale na ka. E vakadonuya tale ga na Komiti ni Veivakavulici mera vakaitavi na tacida era bolecakacaka mai na veiyasa i vuravura mera veivuke ena cakacaka qo. E okati kina o ira na daubuli sere, daunivakatagi kei ira na lagasere. O ira na tacida yalomalumalumu qori era sega ni vakayagataka nodra taledi mera vakacerecerei kina.

 Cava eso na ka e caka me vakarautaki kina na sere? Kena imatai, ena vakatulewataka na Komiti ni Veivakavulici na yavu vakaivolatabu ni sere, kei na ivakarau ni yalo me vakavotui mai kina. Ratou sa na qai bulia na timi ni vakatagi na sere, ratou vola tale ga na qaqana. Ena qai vakarautaki e dua na kena sabolo me katoni. Ratou na rogoca tale na Komiti ni Veivakavulici na katokatoni qori, ratou na vakatututaka tale ga eso tale na ka. Oti ratou na qai veiveisautaka na sere na timi ni vakatagi, sa na qai katoni na sere taucoko. E duidui na vanua e katoni kina na sere, wili kina na eso na vanua ena valenivolavola ni tabana kei na nodra vale na tacida e tiko kina na iyaya ni katokatoni.

 Era vakayagataka na tacida na duidui porokaramu ni kompiuta me rawa ni buli qai katoni kina na sere. E vakayagataki tale ga kina na iyaya ni vakatagi, misini me biuti ira vata na rorogo (mixing console), na gusunivosa rogolevu (amplifier), misini ni kakaburaki kei na gusunivosa. E dua mada ga na gusunivosa e rawa ni tiko na kena isau ena $100 ina sivia na $1,000 na ilavo ni Merika. Ena 2020, e vakayagataki e $116,000 na ilavo ni Merika me voli kina na iyaya ni vakatagi.

 Cava e caka me maroroi kina na cau? Na Peceli era tiko kina na timi ni vakatagi levu, sa ra dau vakayagataki ga kina e levu na bolecakacaka. Kena ikuri, era sa vakayagataka ga na tacida na prokaramu ni kompiuta e tu kina veimataqali rorogo ni vakatagi. Sa sega tale nira katoni yadua tiko na daunivakatagi.

 Era taleitaka na tacida mera vakarogo sere. E kaya o Tara e tiko mai Jamani: “Niu dau nuiqawaqawa, e vukei au na sere meu lomavakacegu. E vaka ga e mokoti au tu o Jiova niu rogoca na sere ena noqu vosa.” E kaya o Dmitry e dua na tacida tagane mai Kazakhstan: “Au taleitaka meu vakarogo sere. E veiuqeti dina, au sega tale ga ni leqataka kina e dua na ka baleta ni sega ni vaka na sere ni vuravura. E vaqaqacotaka tale ga noqu veiwekani kei Jiova.”

 Qo na ka e kaya o Delia e tiko mai Sauca Aferika me baleta na sere: “Na sere e vaqaqacotaka noqu vakabauta. Niu rarawa se sotava na ituvaki dredre, ena tiko na sere e ganita sara ga na kequ ituvaki. Eso na gauna na rorogo ga ni vakatagi e veisautaka na noqu rai!”

 Eso na sere e dau taleitaki vakalevu. E kaya o Lerato e tiko mai Sauca Aferika: “Na sere ‘Sa Voleka Sara’ kei na ‘Vuravura Vou,’ au raitayaloyalotaka kina na gauna keirau sa na veisotari tale kina kei tinaqu. Gauna kece au rogoca kina na sere qori, e vaka ga au raica tu ni cici mai vei au, qai vakarau mokoti au.”

 E yaga tale ga e dua na sere vua e dua na itabagone mai Sri Lanka. E kaya: “E cudruvi au noqu qasenivuli e matadra noqu lewenikalasi niu dua na iVakadinadina i Jiova. Dua na ka noqu rere qai sega ni kila na ka meu tukuna. Niu gole i vale, e kaya o Na meu rogoca na sere ‘Study Makes You Strong.’ Na sere qori e vukei au meu vakekeli qai vakarautaka na noqu isaunitaro vei qasenivuli. Na siga tarava au lai vosa sara vei noqu qasenivuli. E vakarogoci au, e vakavinavinakataka tale ga ni sa qai matata vua na noda vakabauta. Au vakavinavinakataka na isoqosoqo i Jiova ni vakarautaka vei keda na sere veiuqeti va qo.”

 E kau mai vei na ilavo me vakarautaki kina na sere? Na cau ena cakacaka e vuravura raraba, levu na cau qori e caka ena donate.pr418.com. Vinaka vakalevu nomuni lomasavu ena cau.