Gauna e kacivaka kina na World Health Organization ena Maji 2020, ni sa tete tiko na mate rerevaki na COVID-19, levu era sega ni tadra ni na veitauvi tiko ga e veiyasa i vuravura ni oti e dua na yabaki. E milioni na lewenivanua e tarai ira na matedewa qo, wili kina eso na iVakadinadina i Jiova. Eso era vakila na leqa vakailavo, yalolailai, eso era tauvimate ra mate tale ga. Era tuvanaka qai vakarautaka vakacava na veivuke na iVakadinadina i Jiova ena gauna dredre qo?

 Ena veidusimaki ni Komiti ni Kodineita ni iLawalawa Dauvakatulewa ni iVakadinadina i Jiova, e tauyavu e sivia ni 950 na Komiti ni Vakacoko (DRC) e veiyasa i vuravura me veivuke ena COVID-19. Eso na tacida era vakayagataka na veivuke ni matanitu, era tuvanaka tale ga na DRC eso na veivuke ena vanua lalai kei na vanua lelevu.

 Kena ivakaraitaki, mai Paraguay. E volai ena dua na niusipepa ni matedewa qo e vakavuna na leqa vakailavo, “levu gona na vuvale e Paraguay sa sega tu na kedra kakana.” Ia sa tekivu vakarautaka tiko na DRC e Paraguay na ka ni veivuke me tauri ira na tacida ena loma ni rua na macawa. Qori e okati kina na kakana, iyaya ni sasamaki kei na savasava, kei na veika mera tiko bulabula kina. E rauta ni $30 na ilavo ni Merika na isau ni yaya kece e tiko ena dua na ka ni veivuke, qai vakarautaki me rauti ira na lewenivuvale e le va.

 Ia era qaqarauni vakacava na tacida era veivuke ena COVID-19? Era dara nodra mask qai muria na lawa ni veiyawaki. Era vakadeitaka me savasava vinaka na vanua era vakarautaka tiko kina na kabani na kakana, era qaqarauni tale ga. Era na dara tale ga nodra isulu ni tataqomaki o ira kece na kauta na ka ni veivuke, me savasava nodra lori kei na vanua e biu kina na iyaya ni veivuke. Era na muria tale ga na lawa ni veiyawaki nira solia na ka ni veivuke vei ira na mataveitacini.

 Ena Janueri 2021, e vakadonuya na Komiti ni Kodineita me vakayagataki e sivia ni 25 na milioni na dola na ilavo ni Merika ena veivuke ni COVID-19. Era vakayagataka vinaka na valenivolavola ni tabana kei na DRC na cau qo, ra qai saga me voli na iyaya sau vinaka duadua. Kena ivakaraitaki mai Chile, era vinakata na tacida era tuvanaka na ka ni veivuke mera volia e 750 na kilo na kakana (lentil). Ia ena loma ni dua ga na vula e vakaruataki na kena isau! Era mani nanuma na tacida mera sa volia ga. Ia oti ga e rua na aua e kaya o dauvolivolitaki vei ratou na tacida ni dua tale na dauvolivoli sa vakasuka vua nona ota ni kakana. E qai volitaka na kakana qori vei ratou na tacida ena isau lailai sara!

 Ia na siga me ratou lai kauta mai kina na tacida na kakana, e sega ni via solia o dauvolivolitaki na kakana. E kaya ni ratou sega ni wasea vinaka tiko na kakana me vakataki ira na vo ni isoqosoqo. Oti nodratou masu, e kaya sara vua e dua na tacida nira sa dikeva oti mai ivavakoso kece kei na veika era gadreva dina, era duikaikai tale ga na tacida era vukei. Ena yaga gona vei ira na ka ni veivuke qo. Ratou vakadeitaka tale ga vua ni ilavo kece e volivoli kina na iVakadinadina i Jiova era cautaki mai. O ira tale ga na veivuke, era bolecakacaka. Dua na ka nona qoroqoro, e mani vakadonuya me vakalailaitaka na isau ni kakana, e kuria tale ga e 400 na kilo na kakana ena nodratou ota tarava na tacida.

 O Lusu e dua na yada itabaqase mai Liberia, e tiko vata kei ratou e le lima nona lewenivuvale. Ena dua na mataka ni ratou katalau qai dikeva tiko na tikinivolatabu ni veisiga, e raica sara o makubuna e yabaki vitu ni sa oti kece na kedratou kakana. E taroga sara, “Cava tou sa na qai kania qo?” E kaya sara o Lusu ni sa masulaka oti, e vakadeitaka tale ga ni na vukei ratou o Jiova. Ena yakavi tiko ga ni siga ya, e qiriti Lusu yani na qase ni vavakoso qai kaya vua me lai kauta mai eso na kakana e vakarautaki me ka ni veivuke. E kaya o Lusu: “Sa qai kila o makubuqu ni o Jiova e dau rogo masu e sauma tale ga.”

 E dua na yalewa mai na Democratic Republic of Congo, e tiko tikivi ratou e dua na vuvale iVakadinadina i Jiova. Ni raica na veivuke ni kakana e vakarautaki vei ratou na tacida qori, e kaya sara, “Oti na matedewa qo, tou sa na iVakadinadina i Jiova nira kauaitaki ira nodra lewenilotu ena gauna dredre qo. E taroga sara o watina, “Oi, o na iVakadinadina i Jiova ga ena dua na taga raisi ya?” E kaya sara o yalewa, “Sega ni va qori noqu rai, ia na taga raisi ya e ivakadinadina ni loloma dina.”

 Na nomu lomasavu ena cau e vuki totolo kina na isoqosoqo i Jiova mera vukei na tacida era vakaleqai ena gauna ni matedewa qo. Vinaka vakalevu na cau ni oni vakayagataka na iwalewale e vakamacalataki ena donate.pr418.com.