YADRA TIKO!
Vakilai e Levu na Dredre ena 2022—Cava e Kaya na iVolatabu?
Eda rogoca ena yabaki qo e levu na nius ni ivalu, leqa vakailavo, kei na vakaleqai ni veika bula. Na iVolatabu duadua ga e vakamacalataka na vuna e yaco kina na veika qori.
iBalebale ni veika e yaco ena 2022
Na veika e yaco ena yabaki qori, e vakadinadinataka nida bula ena gauna e vakatoka na iVolatabu me “iotioti ni veisiga.” (2 Timoci 3:1) Na gauna qori e tekivu mai ena 1914. Dikeva mada na tautauvata ni veika e yaco tiko qo, kei na ka sa tukuna tu mai na iVolatabu:
“iValu.”—Maciu 24:6.
“Vakilai e Urope na Rarawa ena Vuku ni iValu ena 2022.” a
Raica na ulutaga, “Valuti Ukraine o Rusia.”
“Leqa ni kakana.”—Maciu 24:7.
“Vakilai Vakalevu na Leqa ni Kakana ena 2022.” b
Raica na ulutaga, “Leqa na Kakana e Vuravura ena Vuku ni iValu e Ukraine.”
“Matedewa.”—Luke 21:11.
“Veitauvi tale na polio, tete totolo na mate na monkeypox, qai veivakaleqai tiko ga na COVID-19. E matata sara tu ga e keri na rerevaki ni veitauvi ni matedewa.” c
Raica na ulutaga, “Mate e 6 na Milioni ena COVID.”
“Veika vakadomobula.”—Luke 21:11.
“Ena 2022 e veivakaleqai vakalevu na katakata sivia ni draki, lauqa, na kama kei na waluvu. Era mate e vica vata na udolu na lewenivanua, qai vica vata na milioni e vuravura raraba e vakarusai na nodra vale.” d
Raica na ulutaga, “Sivia na Katakata ni Draki.”
“Tikoyavavala.”—Luke 21:9.
“Levu era vakaduiduile mera saqata na matanitu ena 2022 nira cudruvaka na leqa vakailavo, vakabibi na tubu ni isau ni iyaya.” e
Raica na ulutaga, “Tubu na iSau ni iYaya e Veiyasa i Vuravura.”
Cava ena yaco ena 2023?
Eda sega ni kila na ka ena yaco kina, na ka ga eda kila ni sa vakarau cakava na Matanitu ni Kalou na veiveisau lelevu e vuravura. (Taniela 2:44) Na matanitu qori ena vakaotia na ka e vakavuna tiko noda rarawa, ena vakayacora tale ga na inaki ni Kalou e vuravura.—Maciu 6:9, 10.
Keimami uqeti iko mo muria na ivakasala i Jisu Karisito, qai ‘yadrava’ na veika e yaco tiko kei na parofisai ena iVolatabu. (Marika 13:37) Veitaratara mai kei keimami ke o via kila na sala e rawa ni vukei iko kina na iVolatabu, kei na sala dou rawa ni nuidei kina vakavuvale ena veigauna se bera mai.
a Qori na ka e vakamacala kina o Jill Lawless ena tabana ni nius na AP ena ika8 ni Tiseba, 2022.
b iSoqosoqo na World Food Programme, “Leqa ni Kakana e Vuravura” (A Global Food Crises”)
c Mai na tabana ni bula na JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” e vakamacala kina o Lawrence O. Gostin, JD, ena ika22 ni Seviteba 2022.
d Ena website na Earth.Org, “What’s Behind the Record-Breaking Extreme Weather Events of Summer 2022?” e vakamacala kina o Martina Igini, ena ika24 ni Okotova 2022.
e Na isoqosoqo na Carnegie Endowment for International Peace, “Economic Anger Dominated Global Protests in 2022,” vakamacala kina o Thomas Carothers kei Benjamin Feldman, ena ika8 ni Tiseba 2022.