Wale tiko ga qo era vakamacalataka na iliuliu kei vuravura, saenitisi, kei ira na kenadau ena kompiuta na ka e rawa ni cakava e dua na porokaramu ni kompiuta e vakatokai na artificial intelligence (AI). Era kaya ni yaga, ia e rawa tale ga ni veivakaleqai.

•   “Nikua, e levu na ka e rawa ni cakava na AI, e vakavinakataka tale ga na noda bula . . . Ena gauna vata qori, e rawa ni vakaleqa na noda taqomaki. E rawa ni kauta laivi na noda dodonu, kilai na keda itukutuku, eda na sega tale ga ni nuitaka na veiliutaki vakamatanitu.”—Kamala Harris, ivukevuke ni peresitedi e Merika, Me 4, 2023.

•   Qo na ka ratou vola eso na vuniwai e veiyasa i vuravura e liutaka o Dr. Frederik Federspiel: “Na AI e rawa ni vakavinakataka na veiqaravi vakavuniwai, ia e rawa ni vakaleqa tale ga noda bula.”—tabaki ena dua na ulutaga ena Me 9, 2023, ena mekesini na BMJ Global Health. a

•   “Na AI e rawa ni vakatetei kina na itukutuku lasu. Toso na gauna, e levu e rawa nira vakayalia kina nodra cakacaka. Eso era cakacaka ena veika vakatekenoloji era leqataka ni na rawa ni vakaleqa sara ga na noda bula.”—mai na niusipepa The New York Times, Me 1, 2023.

 Ena qai tukuna ga o gauna na kena vinaka se na kena ca. Ia na cava e kaya na iVolatabu?

 E kaya na iVolatabu na vuna meda kua ni nanuma ni na vinaka tu ga na veika vovou ena tabana ni tekenoloji.

1.  1. Ke mani vinaka mada ga na noda inaki, eda na rairai sega ni namaka me yaco kina na leqa.

   •   “E tiko na sala e rairai donu vua na tamata, ia na kena itinitini na sala ga ni mate.”—Vosa Vakaibalebale 14:12.

2.  2. Eda sega ni lewa na ka era cakava eso tale, se na kena vakatanitaki na ka eda cakava.

   •   “Niu na biuta tu [na noqu cakacaka] vua na tamata ena taravi au. O cei e kila ni na tamata vuku se lialia? Ia ena lewa o koya na ka kece au rawata ena noqu igu kece kei na noqu vuku ena ruku ni matanisiga.”—Dauvunau 2:18, 19.

 E vinaka ga me dusimaki keda na Dauveibuli, ke da lomalomaruataka na vakayagataki ni tekenoloji.

 E yalataka na Dauveibuli ni na sega ni vakatara e dua, se na veika vakatekenoloji e bulia na tamata me vakarusai keda se na vuravura.

•   “Na vuravura ena tu ga me tawamudu.”—Dauvunau 1:4.

•   “O ira na yalododonu era na taukena na vuravura, era na qai bula tawamudu kina.”—Same 37:29.

 E dusimaki keda na Dauveibuli ena iVolatabu na sala meda taqomaki kina, qai vakila na vakacegu ena gauna se bera mai. Mo kila eso tale na ka e tukuna na iVolatabu, wilika na ulutaga “iDusidusi Nuitaki ena Dei Kina Nomu Veigauna se Bera Mai” kei na “iNuinui Totoka ena Veigauna se Bera Mai.”