Nida sarava, rogoca se wilika na nius nikua, eda vakadinadinataka na levu ni veicati. E laurai qori ena levu ni vosa veibeci, basulawa, itovo kaukaua kei na ivalu.

•   “Ena vuku ni nodrau veileqaleqati na vanua o Isireli kei Gaza, kei na nodra veibukani na dau vakavu tikoyavavala, e laurai ni tubu vakasauri na levu ni vosa vakacaca ena sala ni veikilai ena internet.”​—The New York Times, Noveba 15, 2023.

•   “Tekivu mai na ika7 ni Okotova, e vakadinadinataki e vuravura na kena tubu vakasauri na veicati ena levu ni vosa veibeci kei na itovo kaukaua e vu mai na veivakaduiduitaki.”​—Dennis Francis, peresitedi ni United Nations General Assembly, Noveba 3, 2023.

 E sega ni ka vou na itovo e laurai kina na veicati me vaka na vosa veibeci, basulawa kei na ivalu. Na iVolatabu e vakamacalataki ira mada ga eso ena gauna makawa era “dodoka nodra vosa tawaloloma me vaka na gasau,” ra qai vakavuna na ivalu kei na itovo kaukaua. (Same 64:3; 120:7; 140:1) Ia e kaya tale ga na iVolatabu ni tiko na ibalebale ni veicati eda raica tu nikua.

 E tukuni ena iVolatabu e rua na vuna e levu kina na veicati nikua.

1.  1. Sa parofisaitaka tu mai na ka ena yaco ena gauna qo, ya ni na “batabata na nodra loloma e levu.” (Maciu 24:12) E levu era na sega ni dauloloma, ena laurai ga vei ira na itovo e uqeta na veicati.​—2 Timoci 3:​1-5.

2.  2. Na levu ni veicati nikua, e laurai ga kina na nona itovo o Setani na Tevoro, ya nona loma ca kei na veivakalolomataki. E kaya na iVolatabu ni “lewa tiko na vunica na vuravura taucoko.”​—1 Joni 5:19; Vakatakila 12:​9, 12.

 Ia e kaya tale ga na iVolatabu ni Kalou ena vakarau vakaotia vakadua na veika kece e vakavuna na veicati. Ena kauta laivi tale ga na veika ca kece e vu mai ena itovo qori. E yalataka na iVolatabu:

•   Na Kalou “ena qusia tani na wainimata kece mai na matadra, sa na sega tale na mate, na lolosi, na tagiyaso, kei na mosi. Sa oti na veika e dau yaco e liu.”​—Vakatakila 21:4.