YADRA TIKO!
Sa Voleka na Veivakarusai Era Kaya na Saenitisi?—Cava e Kaya na iVolatabu?
Ena ika24 ni Janueri 2023, era kaya na saenitisi ni sa voleka sara na gauna ena vakarusai kina na vuravura, era vakatoka me Doomsday Clock a.
”Na ’Doomsday Clock’ e vakabalebaletaka na nona vakarau vakarusai koya ga vakataki koya na kawatamata. Ena siga Tusiti, era kaya na saenitisi ni sa voleka na gauna me yaco kina qori. Na vuna? Ni yaco tiko na ivalu e Ukraine, e lomaleqataki na veiveisau ni draki kei na ivalu vakaniukilia.”—AFP International Text Wire.
“Ena siga Tusiti era kaya na saenitisi, ni sa vo ga e 90 na sekodi me bogilevu tutu ena ‘Doomsday Clock.’ Sa voleka gona ni vakarusai koya vakataki koya na kawatamata.”—ABC News.
“Era kaya eso na saenitisi ni sa voleka sara meda vakaleqai keda ga na kawatamata ena kena ivakatagedegede e sega ni bau laurai vakadua.”—The Guardian.
Vakacava, sa voleka ni vakarusai na vuravura kei na kawatamata? E dodonu meda lomaleqataka na ka ena yaco ena veigauna se bera mai? Na cava e kaya na iVolatabu?
Cava ena yaco ena veigauna se bera mai?
E kaya na iVolatabu, “na vuravura ena tu ga me tawamudu” qai so era na “bula tawamudu kina.” (Dauvunau 1:4; Same 37:29) Koya gona, ena sega ni vakarusa na vuravura na kawatamata se me sega ni dua e bula rawa kina.
Ia e dua na icavacava e tukuni ena iVolatabu. Kena ivakaraitaki, e kaya ni “sa takali tiko yani na vuravura.”—1 Joni 2:17.
Mo kila na ka e vakabalebaletaka na iVolatabu ni tukuna ni sa voleka ni vakarusai na vuravura, wilika na ulutaga, “Sa Voleka ni Vakarusai na Vuravura? Cava na iBalebale ni Apocalypse?”
Mo kila na ka e kaya na iVolatabu me baleta na veika ena yaco e vuravura ena veigauna se bera mai, wilika na ulutaga “Gauna Cava ena Yaco Kina na iCavacava?”
Me donu tiko ga na nomu rai
Ena rawa ni vukei keda na iVolatabu me donu na noda rai se mani dredre vakacava na ituvaki e vuravura. Ena sala cava?
E tu ena iVolatabu na ivakasala yaga. (2 Timoci 3:16, 17) Kena ivakaraitaki, mo kila na sala e vukei iko kina na iVolatabu me donu nomu rai ni o sotava e levu na leqa, wilika na ulutaga “Sala Mo Qarauna Kina na Ka o Lomaleqataka ”
E vakarautaka na iVolatabu na inuinui me baleta na veigauna se bera mai. (Roma 15:4) E tukuna vakamatata na ka meda namaka ena gauna qo kei na veigauna se bera mai. Qori ena vukei keda meda nuidei, dina ga ni yaco tu e levu na veika rerevaki e veiyasai vuravura.
Mo kila e levu tale na ka ena iVolatabu, keimami sureti iko mo vulica wale na iVolatabu.
a “Era vakatoka qori na saenitisi me “Doomsday Clock.” E kena inaki mera vakaroti kina na lewenivanua ni sa voleka nira vakarusa na vuravura. Eda vakavuna ga qori na tamata. Na “Doomsday Clock,” e dua na vakatautauvata meda rawa ni kila kina na veika meda vakavinakataka me rawa nida vakabulai.”—Bulletin of the Atomic Scientists.