Na ivalu e Ukraine kei na leqa e vu mai ena veisau ni draki, e vakaleqa sara ga vakaca na vakarautaki ni kakana e veiyasa i vuravura. E sega ni veirauti kina na kedra kakana e levu vakabibi ena vanua e se qai vakatorocaketaki tiko.

•   “E dredre sara ga na vakarautaki ni kakana ena vuku ni veiveisau ni draki, na veileqaleqati, tubu ni sau ni iyaya kei na so tale.”—António Guterres, vunivola levu ni Matabose kei Vuravura, Julai 17, 2023.

•   “O Rusia sa sega ni qai via tiki tale tiko ni veidinadinati ena vakau ni witi e Ukraine. Era kaya kina na kenadau ena rawa ni vakaleqai kina vakalevu na kakana e veiyasa i vuravura. Ena rawa ni lai tubu tale ga na isau ni kakana ena vanua dravudravua, me vakai Noca Aferika kei na Tokalou e Loma.”—Atalayar.com, Julai 23, 2023.

 Dikeva na ka e kaya na iVolatabu me baleta na leqa ni kakana, kei na veigauna se bera mai.

•   E parofisaitaka o Jisu: “Era na veivaluvaluti na veivanua kei na veimatanitu, ena vakilai na leqa ni kakana.”—Maciu 24:7.

•   E tukuni ena Vakatakila e va na dauvodo ose vakaivakatakarakara. E dua na dauvodo ose qori e vakatayaloyalotaka na ivalu. E muri koya tiko e dua tale na dauvodo ose e vakatayaloyalotaka na dausiga, na gauna ena vakilai kina na leqa ni kakana, ena saulevu tale ga. “Au raica sara e dua na ose loa, o koya e vodo tiko kina e taura tu e ligana e dua na ivakarau. Au rogoca e dua na ka e vaka na domo e rogo mai . . . e kaya, ‘E dua na kilo witi me dua na dinari, e tolu na kilo varile me dua na dinari.’”—Vakatakila 6:5, 6, (ivakamacala e ra).

 Sa yaco tiko nikua na parofisai vakaivolatabu me baleta na leqa ni kakana. E vakatoka na iVolatabu na gauna qori me “iotioti ni veisiga.” (2 Timoci 3:1) Mo kila e levu tale na ka me baleta na “iotioti ni veisiga” kei na va na dauvodo ose, sarava na vidio Veisau o Vuravura me Tekivu Mai na 1914 Wilika tale ga na ulutaga ““Cava e Kilai me Baleti Ratou na Dauvodo Ose?”

•   E tiko ena iVolatabu na ivakasala yaga e rawa ni vukei keda meda vosota na veika dredre e vakilai tu nikua, wili kina na saulevu se leqa ni kakana. Mo wilika eso na ivakasala yaga vakaivolatabu raica na ulutaga “Cava mo Cakava ke Vakalailaitaki na Kemu iSau?.”

•   E vakaraitaka tale ga na iVolatabu na noda inuinui ni na veisau na ituvaki qo me vinaka. E yalataka na gauna ‘ena levu kina na covuata e vuravura,’ ena sega tale ga ni dua ena waloloi. (Same 72:16) Mo kila eso tale na ka me baleta na inuinui ena iVolatabu ena veigauna se bera mai kei na vuna mo nuitaka kina, wilika na ulutaga “iNuinui Totoka ena Veigauna se Bera Mai.”