Cava nomu rai ni o rogoca na vosa “apocalypse”? De dua o dau vakasamataka e dua na leqa levu ena tarai vuravura, ena vakarusai kina na veika bula kece. Eso era vakabauta ni sa voleka sara ga ni yaco qori, vakabibi nira rogoca se wilika ena nius eso na irogo va qo:

•   “E rawa ni yaco na ivalu vakaniukilia e nakiti, yaco vakacalaka, se vu mai na veicati.”—Bulletin of the Atomic Scientists.

•   “Ena tini na yabaki sa oti dua na ka na levu ni cagilaba, kama, dravuisiga, batabata se katakata sivia ni waitui, ualoka se waluvu e veiyasa i vuravura.”—National Geographic.

•   “Ena vica na yabaki sa oti, era vakacaca ena levu na vanua e Aferika na vodre.”—The Associated Press

 Vakacava ena vakarusai na vuravura ena veika qori? Cava e kaya na iVolatabu?

 Sega. E vakadeitaka vei keda na Vosa ni Kalou na iVolatabu, ni vuravura ena tu ga me tawamudu. (Dauvunau 1:4) Na Kalou ena sega ni vakarusa na vuravura, ia ena “vakawabokotaki ira na vakarusai vuravura tiko.”—Vakatakila 11:18.

 Ena iVolatabu e dau vakayagataki na vosa “vuravura” me dusia na kawatamata era talaidredre vua na Kalou, ra qai cakava ga na ka era vinakata. Na Kalou e vakarusai ira na talaidredre ena gauna i Noa, ena cakava tale ga qori vei ira na ‘sega ni dokai koya’ tiko.—2 Pita 2:5; 3:7.

 E tukuni ena 1 Joni 2:17, “ni sa takali tiko yani na vuravura, kei na kena gagadre.” Na tikinivolatabu qori e vakaraitaka na Kalou ena sega ni vakarusa na vuravura qo, ia ena vakarusai ira era cakava tiko ga na veika ca.

 E sega ni vakamatatataki ena iVolatabu na gauna ena yaco kina na icavacava. (Maciu 24:36) Ia e tukuna ga ni sa voleka. Qo eso na ka e parofisaitaka tu:

•   Ena yaco na veika lelevu me vaka na ivalu, leqa ni kakana, matedewa kei na uneune kaukaua “ena levu na vanua.”—Maciu 24:3, 7, 14; Luke 21:10, 11; Vakatakila 6:1-8.

•   Levu era na nanumi ira ga. Kena ivakaraitaki, era na “lomana ga na ilavo,” “sega ni dau vakavinavinaka,” qai “sega ni lewa vinaka na yalodra.”—2 Timoci 3:1-5.

 Levu era vakabauta ni salavata kei na parofisai ena iVolatabu na veika e yaco e vuravura me tekivu mai na 1914, qori e dusia ni sa voleka na icavacava. Me ikuri ni vakamacala raica na ulutaga vakavalagi, “What Does Bible Chronology Indicate About the Year 1914?” kei na “What Is the Sign of ‘the Last Days,’ or ‘End Times’?”

 Na vosa taumada vaKirisi ni “apocalypse” ena iVolatabu, e kena ibalebale na “kunei” se “kilai”ni dua na ka. E dau vakaibalebaletaki vakalevu ena kena kilai na itukutuku vuni. Na iVolatabu e vakamacalataka “na nona vakatakilai na Turaga o Jisu.” Qori na kena vakaraitaki ni tu vei Jisu na kaukaua me vakarusai ira laivi na tamata ca, qai vakaicovitaki ira na qarava na Kalou.—2 Cesalonaika 1:6, 7; 1 Pita 1:7, 13.

 Na iotioti ni ivola ena iVolatabu e vakatokai me A·po·kaʹly·psis, se Vakatakila, ni na vakaraitaka na veika ena yaco ena veigauna se bera mai. (Vakatakila 1:1) E tu tale ga kina na itukutuku vinaka kei na inuinui ena vakaceguya na kawatamata. (Vakatakila 1:3) E vakaraitaka ni Kalou ena vakaotia na veika tawadodonu qai vukica na vuravura me parataisi. Gauna ya eda na sega ni vakila tale na mosi, rarawa kei na mate.—Vakatakila 21:3, 4.

 Vakacava o via kila e levu tale na yalayala totoka qori ena iVolatabu? Era vakarautaka na iVakadinadina i Jiova na porokaramu ni veivakavulici wale ena iVolatabu. Rawa ni o veitaratara kei ira mera vukei iko.