Vakacava o dua vei ira na vica vata na milioni era vakaleqai ena leqa tubukoso? E levu tu na mataqali leqa tubukoso, qai duidui na vakacaca e kauta mai. Na cagilaba kei na covulaca e dau vakavuna na ualoka, waluvu kei na vakacaca ni cagi kaukaua. Na tau bi ni uca e vakavuna na sisi ni qele, rawa tale ga ni kama na vanua ke tibi na liva. E dau vakacaca tale ga vakalevu na dravuisiga, katakata kei na batabata sivia ni draki.

 Levu na vanua e veiyasa i vuravura e yaco veitaravi na leqa tubukoso, qai kaukaua cake tiko ga na kena vakacaca. E kaya kina na isoqosoqo na International Federation of Red Cross and Red Crescent Societies: “Na levu ni waluvu, cagilaba, kei na dravuisiga, e lai tubu kina na iwiliwili ni lewenivanua era vakaleqai. Era tokitaki tale ga e veiyabaki e vica vata na milioni na lewenivanua.”

 E dau tarai ira vakalevu na lewenivanua na leqa tubukoso. Era na rawa ni rarawataka nira vakayalia na veika era taukena, vakarusai nodra vale, se takali e dua era lomana.

 Ke o sotava na leqa tubukoso ena rawa ni vukei iko na iVolatabu. E veivakacegui qai solia vei iko na inuinui. E tu tale ga kina na ivakasala yaga sa vukei ira e levu era sotava tale ga na leqa tubukoso. (Roma 15:4) E sauma tale ga na taro bibi qo era dau via kila tu e levu: Cava e vakatara kina na Kalou me yaco na leqa tubukoso? E totogitaki au tiko?

 E kaya na iVolatabu ni sega ni vakavuna na Kalou na noda rarawa. E vakadeitaka vei keda “ni sega ni vakatovolei rawa na Kalou ena ka ca, e sega tale ga ni vakatovolea e dua o koya.” (Jemesa 1:13) Kena ibalebale, e sega ni vakavuna o koya na leqa tubukoso e yaco tu nikua.

 E volai ena iVolatabu ni Kalou e dau vakayagataka na draki me totogitaki ira kina na tamata ca. Ia e duatani sara qori mai na draki ca era yaco tu nikua, ni sega ni namaki na kena yaco, era vakaleqai tale ga kina na tamata ca kei na tamata vinaka. E sega ni va qori na ka e dau cakava na Kalou, ni dau taqomaki ira na yalododonu, e veivakasalataki rawa, qai dau vakamacalataka na vuna e veitotogitaki kina. Kena ivakaraitaki, e vakamacalataka na Kalou na vuna e luvu kina na vuravura ena siga i Noa, e veivakasalataki rawa qai taqomaki Noa kei nona vuvale.—Vakatekivu 6:13; 2 Pita 2:5.

 Mo kila na vuna e sega kina ni itotogi ni Kalou na leqa tubukoso era yaco tu nikua, raica na ulutaga, “Cava e Kaya na iVolatabu me Baleta na Leqa Tubukoso?”

 E kaya na iVolatabu ni Kalou o Jiova a e dauloloma qai dauveikauaitaki. Dikeva e vica na tikinivolatabu veivakacegui qo.

•   Aisea 63:9: “Ena gauna kece era rarawa kina e rarawa [na Kalou].”

   Kena ibalebale: Nira rarawa eso tale, e rarawa tale ga na Kalou

•   1 Pita 5:7: “Ni kauaitaki kemuni o koya.”

   Kena ibalebale: E kauaitaki iko vakalevu o Jiova.

 Nona loloma kei na nona veikauaitaki o Jiova e uqeti koya me vukei ira eso tale. E dau veivakacegui ni vakarautaka na ivakasala yaga ena iVolatabu, qai tu kina na inuinui ni na oti na leqa tubukoso ena veigauna se bera mai.—2 Korinica 1:3, 4.

 E yalataka o Jiova ena iVolatabu ni na ‘solia vei iko na inuinui ena ka mo namaka ena gauna se bera mai.’ (Jeremaia 29:11) E vinakata na Kalou meda marautaka na bula ena vuravura parataisi ena sega tale kina na leqa tubukoso.—Vakatekivu 1:28; 2:15; Aisea 32:18.

 Ena cakava qori na Kalou ni vakayagataka nona Matanitu, e kena Tui o Jisu qai veiliutaki mai lomalagi. (Maciu 6:10) E tu vei Jisu na vuku kei na kaukaua me vakaotia na leqa tubukoso. Ni se tu e vuravura e vakaraitaka ni tu vua na kaukaua me lewa na draki ca. (Marika 4:37-41) Ena laurai ena nona veiliutaki na kila kei na vuku, ena vakavulici ira na tamata mera qarava vinaka nodra itikotiko, qai taqomaka na veika bula. (Aisea 11:2) Ni veiliutaki o Jisu ena sega tale ni dua e vakaleqai ena leqa tubukoso.

 Rairai o na via kila, ‘Gauna cava ena vakayagataka kina o Jisu nona kaukaua me tarova na leqa tubukoso?’ Me saumi na taro qori raica na ulutaga, “Gauna Cava ena Veiliutaki Kina e Vuravura na Matanitu ni Kalou?”

 Na iVolatabu ena vukei iko ena ka mo cakava ni bera ni yaco na leqa tubukoso, gauna e yaco tiko kina, kei na gauna sa oti kina.

•   Ni bera ni yaco: Tu vakarau ni muria na ivakasala.

   Ka e kaya na iVolatabu: “O koya e yalomatua e raica na ca qai vunitaki koya, ia na yalowai e lako tu yani qai yacovi koya na leqa.”—Vosa Vakaibalebale 22:3.

   Kena ibalebale: Mo kila rawa tiko na leqa tubukoso e dau yaco ena vanua o tiko kina. O na kila kina na ka mo cakava mo taqomaki iko kei ratou e vale.

   Ka e yaco dina: “Keitou sa vakarau rawa tu ni bera mada ga ni yaco na kama. Sa vakarautaki tu na neitou kato (go bag), wainimate kei na neitou isulu. Dua na ka nodra taqaya na tu voleka, era veilecayaki tale ga. Ia au marau ni keitou sa vakarautaki keitou vinaka!”—Tamara, Kalifonia, Merika.

•   Gauna e yaco kina: Kauaitaka ga na veika e bibi.

   Ka e kaya na iVolatabu: “Ke levu mada ga na ka e tu vua e dua, ena sega ni vakatau na nona bula ena veika e taukena.”—Luke 12:15.

   Kena ibalebale: E bibi cake noda bula mai na ka eda taukena.

   Ka e yaco dina: “Au veilecayaki sara ga ni vakarusai neitou vale ena cagilaba o Lawin. b Ia au masuti Jiova vakawasoma. Oti qori au qai vakasamataka mai ni keitou bula vinaka tu, ia keitou vakayalia ga na veika keitou taukena.”—Leslie, Yatu Filipaini

•   Ni yaco oti: Kauaitaka ga na siga yadua.

  Ka e kaya na iVolatabu: “O koya gona, kua vakadua ni lomaocaocataka na siga nimataka, ni siga nimataka e tu vata kei na kena lomaocaoca.”—Maciu 6:34.

   Kena ibalebale: Kua ni lomaleqataka na leqa e se bera ni yaco.

   Ka e yaco dina: “Gauna e luvu kina na noqu vale ena cagilaba o Irma, au lomaocaoca sara ga ni levu na ka meu vakatulewataka. Au sa qai saga meu muria na ka e kaya na iVolatabu, ya meu kauaitaka ga na veisiga yadua. Ena veivuke i Jiova au vosota rawa kina na ituvaki au nanuma niu na sega ni taqea rawa.”—Sally, Florida, Merika.

 Me ikuri ni vakatutu yaga raica na ulutaga, “iTataqomaki ena Gauna ni Leqa Tubukoso.”