Dua na ka na levu ni ilavo e vakayagataki tiko ena ivalu.

•   “Ena yabaki sa oti e vakayagataki e veiyasa i vuravura e rauta ni $2.2 na tirilioni ena ivalu. Ni vakatauvatani kei na veiyabaki sa sivi, qori na iwiliwili ni ilavo levu duadua me vakayagataki ena ivalu.”—The Washington Post, Feperueri 13, 2024.

 Ia e vauci tiko kina eso na ka e bibi sara mai na ilavo. Kena ivakaraitaki, na ivalu e Ukraine.

•   Ira na sotia. Ena rua na yabaki sa oti, era kaya na kenadau ni rauta e le 500,000 na sotia era mate se mavoa ena ivalu.

•   Ira na lewenivanua. E kaya na Matabose kei Vuravura (UN) ni sivia e le 28,000 era mate se mavoa. Ia e kaya e dua na vakailesilesi ni UN: “E se sega ni kilai vinaka sara tiko na iwiliwili ni lewenivanua era vakayalia nodra bula ena ivalu qo.” a

 Dua na ka na levu ni veika dredre era vakila na lewenivanua ena vuku ni ivalu kei na tikoyavavala e veiyasa i vuravura.

•   Ena Seviteba 2023, era tokitaki e le 114 na milioni ena vuku ni ivalu, kei na ivalavala kaukaua e veiyasa i vuravura.

•   E le 783 na milioni era sotava na leqa ni kakana. “Qori e vu mai ena tikoyavavala, e rauta ni 70 na pasede vei ira qori era tiko ena vanua e yaco kina na ivalu kei na itovo kaukaua.”—World Food Programme.

 Vakacava ena rawa ni oti na ivalu? E rawa nida vakila na vakacegu? Vakacava ena yaco na gauna ena sega tale na via kana kei na dravudravua, da qai marautaka na veika eda rawa ni bula kina e vuravura? Cava e kaya na iVolatabu?

 E parofisaitaka na iVolatabu ni na yaco na ivalu e veiyasa i vuravura, qai vakamacalataka me vaka e dua na dauvodo ose ivakatakarakara.

•   “E tarava mai e dua tale na ose, e ose damu, o koya e vodo tiko kina e soli vua na lewa me kauta tani na sautu e vuravura mera veivakamatei kina, e qai soli vua e dua na iseleiwau levu.”—Vakatakila 6:4.

 Na dauvodo ose ivakatakarakara qori e muri koya tiko e le rua rau vakatayaloyalotaka na dausiga kei na mate e vu ena tauvimate kei na so tale na ka. (Vakatakila 6:5-8) Mo kila eso tale na parofisai vakaivolatabu qori, kei na vuna eda nuidei kina ni sa vakayacori tiko nikua, wilika na ulutaga “Cava e Kilai me Baleti Ratou na Dauvodo Ose?”

 Sa voleka na gauna ena sega ni vakayagataki tale na iyau ni vuravura ena ivalu. Ia ena sega ni rawati qori ena sasaga ni tamata. E kaya na iVolatabu:

•   Na Kalou “ena mai vakaotia .  . . na ivalu e vuravura taucoko.”—Same 46:9.

•   Ena vakaotia na Kalou na rarawa kece e vu mai ena ivalu. “Ena qusia tani tale ga na wainimata kece mai na matadra, sa na sega tale na mate, na lolosi, na tagiyaso, kei na mosi. Sa oti na veika e dau yaco e liu.”—Vakatakila 21:4.

•   E vinakata na Kalou meda vakila kece na vakacegu. “Era na tiko na noqu tamata ena vanua vinaka ni vakacegu ena itikotiko tudei kei na ivakavakacegu vinaka.”—Aisea 32:18.

 E kaya iVolatabu na ivalu kei na so tale na ka e yaco tu nikua, e vakaraitaka ni sa voleka na gauna meda vakila kina na vakacegu.

 Ena vakalesuya mai vakacava na Kalou na bula vakacegu ena gauna se bera mai? Ena cakava qori na nona Matanitu vakalomalagi. (Maciu 6:10) Mo kila na ibalebale ni Matanitu qori kei na kena yaga vei iko, sarava na vidio Na Cava na Matanitu ni Kalou?