E laurai ena veivaluvaluti e yaco tiko e Ukraine, ni levu na iliuliu ni lotu vaKarisito era uqeta tiko na ivalu. Raica mada qo na sala era tokona ruarua kina na lotu kei na ivalu:

•   “Oni vakavinavinakataki na sotia kece oni vala moni taqomaki ira na lewenivanua e Ukraine mai vei ira na meca . . . Keimami masulaki kemuni tiko, keimami na tokoni kemuni tale ga.”—Metropolitan Epiphanius I e Kyiv, tabaki ena niusipepa The Jerusalem Post, ena ika16 ni Maji, 2022.

•   “Ena Sigatabu e cakava na iliuliu ni lotu Orthodox e Rusia e dua na nodra porokaramu ni lotu na sotia ni Rusia. E uqeti ira mera taqomaka na nodra vanua, ni ‘qori na ka ga e dodonu mera cakava’ ni sa valuti Ukraine tiko o Moscow.”—tabana ni itukutuku na Reuters, ika3 ni Epereli, 2022.

 Vakacava e dodonu me vakaitavi na lotu vaKarisito ena ivalu? Cava e kaya na iVolatabu?

 E kaya na iVolatabu o ira na muri Jisu Karisito era sega ni vakaitavi ena ivalu.

•   “Daramaka tale na nomu iseleiwau ina kena taga, nira na mate ena iseleiwau o ira era vakayagataka na iseleiwau.”—Maciu 26:52.

   Ke dua e vakadonuya na ivalu, vakacava sa talairawarawa tiko ena vosa i Jisu?

•   “Au solia vei kemudou e dua na ivunau vou, mo dou veilomani, mo dou veilomani me vaka ga na noqu lomani kemudou. Na ka qo era na kila kece kina ni dou noqu tisaipeli, ke dou veilomani.”—Joni 13:34, 35.

   Ke dua e tokona na ivalu, vakacava e vakaraitaka tiko na loloma e kaya o Jisu nira na kilai kina na nona tisaipeli?

 Mo kila eso tale na ka, wilika na ulutaga vakavalagi “Erau Salavata Beka na iValu kei na iVakavuvuli vaKarisito?”

 Vakacava e dodonu mera kua ni vakaitavi na lotu vaKarisito ena ivalu e yaco tiko nikua? Io. E parofisaitaka na iVolatabu nida sa bula tu qo ena “iotioti ni veisiga.” Era tiko eso e veiyasa i vuravura era na “sega ni vulica tale na ivalu,” me salavata kei na ivakavuvuli i Jisu.—Aisea 2:2, 4, ivakamacala e ra.

•   Mo kila eso tale na ka, wilika na Vale ni Vakatawa na ulutaga “Rai ni Kalou me Baleta na iValu.”

 Sa voleka ni vakayagataka o Jiova a “na Kalou ni vakacegu,” nona matanitu vakalomalagi me vakabulai ira na lewenivanua “mai na veivakasaurarataki kei na ivalavala kaukaua.”—Filipai 4:9; Same 72:14.

•   Mo raica na sala ena vakayacori kina, sarava na vidio Na Cava na Matanitu ni Kalou?