Ena ika20 ni Noveba 2022, e mai cava kina nodra bose na iliuliu ni veimatanitu, e vakatokai na United Nations Climate Change Conference. Dina nira duavata mera veivuke vakailavo ena veivanua e vakaleqai ena veisau ni draki, ia era kaya e levu qori ena sega ni walia na vu dina ni leqa.

•   “Ena ika19 ni Noveba 2022, e kaya o António Guterres, na vunivola levu ni Matabose kei Vuravura: “Au marau nida duavata me maroroi eso na ilavo mera vukei kina o ira na vakaleqai ena veisau ni draki. Ia au kila ni levu tale na ka meda cakava . . . Na noda vuravura e tu sara tu ga ena dua na ituvaki leqataki.”

•   Ena ika20 ni Noveba 2022, e kaya o Mary Robinson, a peresitedi tu i liu e Ailadi, a komisina tale ga i liu ni Matabose kei Vuravura me Baleta na Dodonu Yadua ni Lewenivanua: “Rawa ni yaco vakasauri e dua na veisau levu ni draki, da qai vakaleqai kece kina.”

 Era leqataka vakalevu na itabagone na veika ena yaco e vuravura ena gauna se bera mai. Ia vakacava e rawa nira cakacaka vata na veimatanitu mera vakavinakataka na ka e vakavuna na veisau ni draki? Cava e kaya na iVolatabu?

 E kaya na iVolatabu se mani vacava nodra sasaga vakaukaua na veimatanitu mera walia na ka e vakavuna na veisau ni draki, ena sega tu ga ni rawa. Qo e rua na vuna:

•   “Na ka e veve e sega ni vakadodonutaki rawa.”—Dauvunau 1:15.

   Kena ibalebale: E vakaiyalayala ga na ka era rawa ni cakava na veimatanitu, ni sega ni dodonu mera liutaki ira ga. (Jeremaia 10:23) Ke ra mani duavata mada ga ra qai sasaga vakaukaua, era na sega ga ni walia na leqa e vuravura.

•   “Nira na dau lomani ira ga na tamata, era na lomana na ilavo, . . . ra na sega ni via okati ena dua na veiyalayalati.”—2 Timoci 3:2, 3.

   Kena ibalebale: E donu vinaka na ka e parofisaitaka na iVolatabu, e levu ena gauna qo era na lomani ira ga, ra qai sega ni via cakacaka vata me yaga vei ira eso tale.

 Ia e sega ni vakatau ena yalayala ni matanitu vakatamata na veika ena yaco e vuravura ena gauna se bera mai. Sa lesia tu na Kalou e dua e ganiti koya me veiliutaki e vuravura, ya o Jisu Karisito. E kaya na iVolatabu me baleti koya:

•   “Ena vakatau vua na lewa. Ena vakatokai na yacana o Daunivakasala Vuku, na Kalou Kaukaua, na Tama Tawamudu, na Turaga ni Sautu.”—Aisea 9:6, ivakamacala e ra.

 O Jisu na Tui ni Matanitu ni Kalou, se matanitu vakalomalagi. (Maciu 6:10) E tu vua na kaukaua, na vuku, e vinakata tale ga me taqomaka na vuravura kei ira na bula tiko kina. (Same 72:12, 16) Ena nona veiliutaki, ena muduki ira na “vakarusai vuravura tiko,” ena vakavoutaka tale ga na vuravura.—Vakatakila 11:18; Aisea 35:1, 7.

 Mo kila eso tale na ka ena kena wali na ka e vakavuna na veisau ni draki, wilika na ulutaga “Ka e Kaya na iVolatabu ena Veiveisau ni Draki kei na Noda Gauna se Bera Mai.”