Ena veiyabaki e dau yaco e levu na uneune. Levu na uneune qori era ka lalai ga, ia e vakavuna e levu na vakacaca, rarawa kei na mate. Eso na gauna e lai vakavuna na ualoka qai vakacacana na veibaravi, ra mate tale ga kina e levu. Vakacava sa parofisaitaka tu na iVolatabu na uneune lelevu va qori?

Ena ulutaga qo

•  E parofisaitaka na iVolatabu na uneune?

•  Na uneune e yaco tu nikua e vakayacori kina na parofisai ena iVolatabu?

•  E uqeti keda vakacava na parofisai vakaivolatabu me baleta na uneune?

•  Rai cala me baleta na parofisai vakaivolatabu kei na uneune

 A cavuta o Jisu na uneune e parofisaitaki ena iVolatabu. Qo e tolu na tikinivolatabu e tukuna me baleta na uneune:

 “Era na veivaluvaluti na veivanua kei na veimatanitu, ena vakilai na leqa ni kakana qai yaco tale ga na uneune ena levu na vanua.”—Maciu 24:7.

 “Era na veivaluvaluti na veivanua kei na veimatanitu, ena yaco na uneune ena levu na vanua, ena vakilai tale ga na leqa ni kakana.”—Marika 13:8.

 “Era na yaco e levu na uneune kaukaua ena levu na vanua, ena tatara na leqa ni kakana kei na matedewa.”—Luke 21:11.

 Sa parofisaitaka tu o Jisu ni na yaco na “uneune kaukaua,” ena “levu na vanua.” Gauna vata qori ena yaco tale ga na ivalu, leqa ni kakana, kei na matedewa. Na veika kece qori e vakaraitaka nida sa bula tu qo ena “ivakataotioti ni veika vakavuravura,” se “na iotioti ni veisiga.” (Maciu 24:3; 2 Timoci 3:1) E vakadeitaka na ituvatuva ni gauna ena iVolatabu, ni tekivu na “iotioti ni veisiga” ena 1914, e se bera tale ga ni cava na kena gauna.

 Io. Sa yaco sara tiko nikua na veika e parofisaitaka o Jisu, me vaka na uneune. Tekivu mai na 1914, sa yaco oti e sivia e 1,950 na uneune, ra qai mate kina e sivia e rua na milioni na lewenivanua. a Raica mada qo eso na kena ivakaraitaki ena veigauna sa oti.

 2004—Wasawasa vakaIdia. E yaco na uneune e rauta ni 9.1 na kena kaukaua, e lai vakavuna na ualoka ena levu na vanua. Era mate kina e rauta ni le 225,000.

 2008—Jaina. E yaco na uneune e rauta ni 7.9 na kena kaukaua, qai vakacacana na veikorokoro kei na tauni. E tukuni nira mate kina e le 90,000, ra mavoa e 375,000, qai vica vata na milioni e vakacacani na nodra vale.

 2010—Haiti. E yaco na uneune e 7.0 na kena kaukaua, vakavuna me yaco tale ga eso na uneune lalai. Era mate kina e sivia ni le 300,000, qai vica vata na milioni vakacacani na nodra vale.

 2011—Japani. E yaco na uneune e 9.0 na kena kaukaua, lai vakavuna na ualoka ra mate kina e rauta ni le 18,500, ra qai tokitaki e vica vata na udolu. E vakacacana tale ga na vanua e dau buli kina na livaliva e Fukushima, qai veivakaleqai na veika e kacabote mai kina. Me yacova mai qo, era se sega ni rawa ni lesu e rauta ni le 40,000 ina nodra itikotiko volekata na vanua e dau buli kina na livaliva, ni se veivakaleqai tiko na kena revurevu.

 Ena uqeti keda meda namaka na veika ena yaco ena veigauna se bera mai. E kaya o Jisu: “Ni dou raica ni sa yaco na veika qo, dou kila sara ni sa voleka na Matanitu ni Kalou ni Kalou.”—Luke 21:31.

 E kaya na iVolatabu ni Matanitu ni Kalou e dua dina na matanitu e tiko mai lomalagi, qai kena Tui o Jisu Karisito. Qo na matanitu a vakavulica o Jisu vei ratou na nona imuri me ratou masulaka.—Maciu 6:10.

 Ni sa na liutaka na vuravura na Matanitu ni Kalou, ena vakaotia vakadua na leqa tubukoso me vaka na uneune, ena sega tale ga ni vakaleqai keda. (Aisea 32:18) Eda na taqomaki vakayago, ena taqomaki tale ga na ivakarau ni lomada. (Aisea 65:17; Vakatakila 21:3, 4) Mo kila eso tale na ka, wilika na ulutaga “Cava ena Cakava na Matanitu ni Kalou?”