Vakacava e sa sega ni veirauti na ilavo dou bula kina ena vuku ni leqa vakailavo? Ena rawa ni vakavuna qori na matedewa, na leqa tubukoso, na tiko yavavala vakapolitiki, kei na ivalu. Ena sega tu ga ni rawarawa na ituvaki qori, ia ena rawa ni vukei iko na ka e kaya na iVolatabu mo maninitaka na ilavo dou sa bau rawata.

 iVakavuvuli vakaivolatabu: ‘Au sa vulica . . . meu lomavakacegu niu vutuniyau seu ligalala.’—Filipai 4:12.

 Ke sa sega mada ga ni levu na ilavo o rawata me vaka eliu, o se rawa tiko ga ni vulica mo bula ena ilavo o sa rawata tiko. Na totolo ga ni nomu veisau kei na nomu ciqoma na kemu ituvaki, ena yaga vei iko kei ratou e vale.

 Mo kila tale ga na veivuke e vakarautaka na matanitu se so tale na isoqosoqo ena rawa ni yaga vei kemudou. Mo vuki totolo, ni rawa ni vakaiyalayala ga na gauna ena yaga kina na ka ni veivuke qori.

 iVakavuvuli vakaivolatabu: “E seva na ka e nanumi ni sega na veivosaki, ia e vakavatukana na sasaga ni levu na daunivakasala.”—Vosa Vakaibalebale 15:22.

 Veivosakitaka kei watimu kei ratou na gone na lailai ni ilavo sa tiko. Nomudou veivosakitaka vinaka qori, ratou na tokona kina na veiveisau me caka. Ena rawa ni vakabula ilavo nomudou cakacaka vata ni dou maninitaka na ka qai sega ni vakasabusabu.

 iVakavuvuli vakaivolatabu: ‘Dabe mada mo cakacakataka na kena isau.’—Luke 14:28.

 Ni vakalailaitaki na ilavo o rawata, e bibi mo kila na sala o vakayagataka tiko kina. Koya gona, mo vakarautaka e dua na ituvatuva ni ilavo. Mo vola sara ga eliu na levu ni ilavo o namaka mo rawata ena dua vula. Oti qori, vola ena dua na lisi na nomudou sausaumi kece ni dua na vula, kei na ilavo kece dou dau vakayagataka dina ni o kila ni na veisau kece qori. Mo vola tale ga na levu ni ilavo o via maroroya me yaga ni yaco na veika tawanamaki.

 Vakatutu: Ni o vola tiko na ka kece o dau vakavolia, mo dau kauai tale ga ena so na ka lalai e lako tu kina nomu ilavo. O na kurabuitaka na ka o raica. Kena ivakaraitaki, e vakavola tiko e dua na turaga na veika e dau volia, e raica ni dua na yabaki e vakayagataka tiko e vicavata na drau ena voli drega.

 iVakavuvuli vakaivolatabu: ‘Mo vakadeitaka na veika era bibi sara.’—Filipai 1:10.

 Vakatauvatana na kemu isau kei na sala o vakayagataka kina nomu ilavo qai saga mo raica na ka me kua ni voli se me vakalailaitaki, me veirauti tiko ga kei na kemu isau. Dikeva e vica na ka qo:

•   Sala ni veitosoyaki. Ke rua na nomudou motoka, vakacava me volitaki e dua? Ke tiko nomudou motoka isaulevu, vakacava mo dou volitaka qai volia e dua e sau rawarawa? Vakacava mo dou vodo basi, basikeli, se mo dou taubale ga?

•   Ka ni veivakamarautaki. Vakacava mo kua ni vakayagataka na porokaramu ni iyaloyalo se tivi e saumi? Mo dou vakayagataka ga na kena e sau rawarawa se na kena e sega ni saumi.

•   Saumi ni bili. Mo dou veivosakitaka vakavuvale na sala me vakalailaitaki kina na vakayagataki wai, livaliva, benisini se karasini kei na gas. De dua o na nanuma ni sega soti sara ni bibi nomudou bokoca na cina se mo sili ga vakalekaleka, ia ena rawa ni vakabula ilavo.

•   Kakana. Saga mo kua ni kana e valenikana, vakasaqara ga e vale na kemu. Mo vakasamataka rawa na ka o na kania, volia, se o rawa ni vakasaqa tu vakalevu. Rawa tale ga ni dou vakayagataka na bulagi. Vola rawa tu na nomu lisi ni volivoli mo kua kina ni volivoli vakalialia. Dau volia na kakana bulabula era vua ena kena gauna, nira sau lailai. Kua ni volia na kakana kamikamica. Vakacava mo tea ga na kemu?

•   iSulu. Mo voli isulu ga ni siawa se kabasu na kena e tiko vei iko. Kua ga ni volivoli mo toso vata kei na gauna. O rawa ni voli isulu ena gauna e sau rawarawa kina, se o rawa ni lai volivoli ena secondhand. Vakacava mo kua ni vakamamacataka na nomu isulu ena misini, ia mo vakaliliga ga e tuba ni draki vinaka? Qori ena sega ni kana livaliva.

•   Veika o via volia. Ni bera ni o lai volivoli, tarogi iko mada: ‘Au na rawa ni ceguva na kena isau? E vinakati sara ga meu volia? Vakacava mo qai veisautaka tale ena dua na gauna na nomu talevoni, iyaya vakalivaliva, se motoka? Vakacava mo volitaka na iyaya o sa sega ni vakayagataka? Ni o cakava qori, ena vukei iko mo bula rawarawa ga, qai vakabula ilavo.

 Vakatutu: Ni vakalailaitaki na kemu isau, o na rawa ni muduka kina eso na ka o dau cakava e veivakaleqai se saulevu. Me vaka na kana tavako, veimauilavo, se na gunu sivia. Ni o cakava gona na veiveisau qori ena rawa ni vukei iko mo maninitaka na ilavo o vakayagataka, ena vinaka tale ga na ivakarau ni nomu bula.

 iVakavuvuli Vakaivolatabu: “Era na marau o ira na kauaitaka na nodra bula vakayalo.”—Maciu 5:3.

 Na iVolatabu e vakarautaka na ivakasala yaga qo: “E itataqomaki na vuku me vaka ga ni itataqomaki na ilavo, ia qo na yaga ni kilaka: Na vuku e vakabula na kena itaukei.” (Dauvunau 7:12) E tiko ena iVolatabu na ivakasala yaga va qori. Era vakadinadinataka e levu ni gauna era muria kina, era sega ni lomaocaocataka na nodra veika vakailavo.—Maciu 6:31, 32.