Ena Julai 2022, e yaco eso na veivanavanai vakadomobula e veiyasa i vuravura:

•   “Levu e veiyasa i vuravura era sega ni vakabauta, ra qai rarawataka nona labati o Shinzo Abe na daunipolitiki kilai levu e Japani [a Paraiminisita tu i liu]. Na vanua qori e sega ni yaco vakalevu kina na itovo voravora, e vakatabui tale ga na vakayagataki vakailoa ni dakai.”—Julai 10, 2022, niusipepa The Japan Times.

•   “Era kidroataka e levu nona vanavana e dua ena vanua ni veivoli e Copenhagen, mai Denmark. Ratou qai mate kina e le tolu.”—Julai 4, 2022, tabana ni nius na Reuters.

•   “Era vanavana eso na tagane ena tauni o Soweto e Sauca Aferika, ra qai mate kina e le 15.”—Julai 10, 2022, niusipepa The Guardian.

•   “Ena ika4 ni Julai era lauvana mate e sivia ni le 220 e Merika.”—Julai 5, 2022, tabana ni nius na CBS.

 Vakacava e rawa ni oti na itovo voravora? Cava e kaya na iVolatabu?

 E kaya na iVolatabu nida bula tu qo ena “iotioti ni veisiga.” Ena vakadomobula qai voravora nodra itovo na tamata. (2 Timoci 3:1, 3) Na itovo va qori e vakavuna mera rere tu kina e levu. (Luke 21:11) Ia e yalataka na iVolatabu na gauna ena oti kina na itovo voravora. Era na qai “tiko na tamata ena vanua vinaka ni vakacegu ena itikotiko tudei kei na ivakavakacegu vinaka.” (Aisea 32:18) Ena oti vakacava na itovo voravora?

 Na Kalou ena biuti ira tani na daucaka ca, qai vakarusa na iyaragi kece.

•   “O ira na tamata ca era na muduki tani e vuravura.”—Vosa Vakaibalebale 2:22.

•   “Ena mai vakaotia [na Kalou] na ivalu e vuravura taucoko. E musuka o koya na dakaititi qai vorolaka na moto, e vakama na qiqinivalu ena bukawaqa.”—Same 46:9.

 Ena vakaotia vakadua na Kalou na ka e vakavuna na itovo voravora, qai vakavulici ira na tamata mera veiyaloni.

•   “Era na sega ni veivakaleqai se veivakarusai ena noqu ulunivanua tabu kece, ni na robota na vuravura na kilaka me baleti Jiova me vaka e ubia na wasawasa na wai.”—Aisea 11:9.

•   “Nikua, na Kalou e vakavulici ira tiko e levu e veiyasa i vuravura mera tinia nodra itovo voravora, kei na vakayagataki ni iyaragi. Mera “tukitukia na nodra iseleiwau me batinisiviyara kei na nodra moto me isele ni sasamaki.”—Maika 4:3.

 Mo kila e levu tale na ka e yalataka na iVolatabu me baleta na vuravura ena vakilai kina na vakacegu, wilika na ulutaga “Freedom From Fear—Is It Possible?”

 Mo kila eso tale na sala ena vakaoti kina vakadua na itovo kaukaua, wilika na ulutaga “Peace on Earth at Last!”