Cava e Kaya na iVolatabu ena Leqa ni Wai e Veiyasa i Vuravura?

SARAVA/ROGOCA

Eda vinakata kece na wai savasava me rawa nida bula kina. Ia e veivakasalataki o António Guterres na vunivola levu ni Matabose kei Vuravura, “eda sotava tiko na leqa ni wai, baleta e levu na vanua e vinakati sara tu ga kina na wai.” E vica vata na bilioni e veiyasa i vuravura e sega tu mada ga na medra wainigunu.

Strdel/AFP via Getty Images

Vakacava ena rauti keda kece na wai? Se eda na sotava tu ga na leqa ni wai? Cava e kaya na iVolatabu?

Cava e yalataka na iVolatabu me baleta na wai?

E kaya ni na yaco na gauna ena sega ni vakilai na leqa ni wai. Io, sa na levu na wai savasava.

“Ena vure mai na wai ena vanua talasiga, kei na uciwai ena buca dravuisiga. Ena vuki na qele katakata mamaca me tobu ni kuta, kei na qele mamaca me waivure.”—Aisea 35:6, 7.

Na cava meda vakabauta kina na yalayala qori? Dikeva na ka e kaya na iVolatabu ena dua na sala e buli kina na vuravura.

Ka e kaya na iVolatabu me baleta na vuravura kei na italetale ni wai (water cycle)

“[Kalou] e sega ni bulia [na vuravura] me lala, e bulia ga me tawa.”—Aisea 45:18.

E bulia na Kalou na vuravura meda bula kina, e vakayagataka gona na veikabuli me levu kina na wai savasava.

“[Kalou] e vakalesuya i cake na wai, e vuki na kabu me uca, mani vakatauca mai na o, e tau vei ira na kawatamata.”—Jope 36:27, 28.

Na tikinivolatabu qori e vakamacalataka nona bulia na Kalou na italetale ni wai e dei kei na sala ni wai. E tubu na cawa mai vanua kei na wasawasa, e kumuni me o, qai tau sara me uca. E vakarautaki kina na meda wai savasava kei ira na manumanu.—Dauvunau 1:7; Emosi 5:8.

“Au na vakatauca vei kemuni na uca ena kena gauna, ena vuataka na qele na vuana, era na vuataka tale ga na vuadra na kau ni veiwere.”—Vunau ni Soro 26:4.

E yalataka na Kalou vei ira na dauteitei e Isireli makawa ni na vakarautaka wasoma na wai me bulabula kina na nodra itei. Ena vinakati gona me tau na uca ena kena gauna me rawa ni tubu vinaka na itei.

Qori tale ga na ka ena vakarau cakava na Kalou e vuravura taucoko. (Aisea 30:23) Ia ena gauna mada ga qo, e vakilai tiko vakalevu na leqa ni wai e veiyasa i vuravura kei na draki mamaca. Cava tale e kaya na iVolatabu ena wali ni leqa ni wai nikua?

Sala ena oti kina na leqa ni wai

E vakaraitaka na iVolatabu ni Kalou ena vakayagataka nona Matanitu me walia na leqa e tarai vuravura tu nikua, okati kina na leqa ni wai. (Maciu 6:9, 10) Na Matanitu ni Kalou e matanitu vakalomalagi, ena qai lewa na vuravura taucoko. (Taniela 2:44; Vakatakila 11:15) Ena vakaotia vakadua na veika e vakavuna na leqa ni wai. Qori na ka e sega ni rawa ni cakava na matanitu vakatamata.

Leqa: Na veisau ni draki e rui vakaleqa tale ga na italetale ni wai. E lai vakavuna na draki mamaca kei na waluvu, e tau bi kina na uca se tubu na iyalayala ni waitui.

iWali: Na Matanitu ni Kalou ena veisautaka na ituvaki ca kece kei vuravura me vinaka tale. E yalataka na Kalou: “Raica! Au sa vakavoutaka na ka kece.” (Vakatakila 21:5) Ena levu na wai ena veivanua mamaca, ena tubu tale ga na veika bula ena vanua e lala tu ena gauna qo. (Aisea 41:17-20) Ena ruku ni veiliutaki i Jisu Karisito ena Matanitu ni Kalou, ena qai lewa na veika kaukaua e vuravura.

Ni se bula e vuravura o Jisu, e tarova e dua na draki ca vakadomobula. Qori e vakaraitaka vakalailai na kaukaua e solia vua na Kalou. (Marika 4:39, 41) Ni Tui ni Matanitu ni Kalou o Karisito, ena oti na leqa tubukoso. Eda na sega ni rerevaka na leqa tubukoso, eda na vakila ga na vakacegu kei na sautu.

Leqa: Era benuca na uciwai, na drano kei na wai e tu e ruku ni qele (underground reservoir) o ira na daunanumi ira ga, kei ira na kabani lelevu dau kocokoco. E vakavuna me lailai kina na wai savasava.

iWali: Na Kalou ena vakasavasavataka na vuravura, ena vakavinakataka tale ga na uciwai, drano, waitui kei na qele. Sa na parataisi na vuravura. E biu vakaserekali na ka e tukuna na iVolatabu: “Ena reki na vanua talasiga kei na vanua sigasiga, kei na buca dravuisiga ena marau, ena se me vaka na senikau na sefaroni.”—Aisea 35:1.

Na cava ena yacovi ira na vakacacana tiko na vuravura, se o ira na sega ni kauaitaki ira eso tale? E yalataka na Kalou ni na “vakawabokotaki ira ... na vakarusai vuravura tiko.”—Vakatakila 11:18; Vosa Vakaibalebale 2:21, 22.

Leqa: E vakayagataki vakaveitalia na ivurevure ni wai, e lai vakasabusabutaki kina e levu na wai.

iWali: Na Matanitu ni Kalou ena ‘vakayacora e vuravura’ na loma ni Kalou, sega ni nodra inaki na dau nanumi ira ga. (Maciu 6:9, 10) Na Matanitu qori ena vakavulici ira vinaka na lewe i vuravura. E kaya na Aisea 11:9: “Ni na robota na vuravura na kilaka me baleti Jiova.” a Ni sa tiko vei ira na kila ra qai lomani Jiova vakalevu kei na veika e bulia, ena uqeti ira mera taqomaka na vuravura totoka kei na iyaubula.

Mo kila eso tale na ka ena cakava na Matanitu ni Kalou, wilika na ulutaga “Cava ena Cakava na Matanitu ni Kalou?”
Mo kila na sala ena veisautaki kina na vuravura me parataisi, wilika na Aisea wase 35.
Mo kila eso tale na nona inaki na Kalou me baleta na vuravura kei na kawatamata, sara na vidio Na Cava e Bulia Kina na Kalou na Vuravura?