Au taleitaka na ka dina niu se gone. Au vinakata kina meu yalataki au vei Jiova qai papitaiso. Niu yabaki 13, dua na ka noqu marau niu sa sauva rawa qori. Niu yabaki 14, e tarogi au o Brother Helge Linck a keu via painia, au se nanuma vinaka tu na siga ya. Gauna ya, rau painia vakatovolei (kilai na gauna qo me painia veivuke) tiko o Ta kei Na. Au sega gona ni kila e dua na ka me baleta na painia tudei. Ia nona taro o Brother Linck e uqeti au sara ga meu via vakarabailevutaka noqu qaravi Jiova.

 Ena 1974, e yaco na tikoyavavala vakapolitiki e Iciopea. E levu era vesu, yaco na veivakamatei, kei na veileqaleqati. Toso na gauna, sa sega ni rawa ni keimami vunau e veivale, keimami sa dau sota ga vakaiwasewase lailai. Rau sa vakarautaki keitou toka vakaveitacini o Ta kei Na ena so tale na veitusaqati. Rau vakavulici keitou me keitou kila na ivakavuvuli vakaivolatabu me baleta na noda tawaveitovaki na lotu vaKarisito. Keitou vulica kina ni o Jiova ena vukei keitou ena ka me keitou tukuna ke keitou vakatarogi, kei na gauna me keitou galu kina.—Maciu 10:19; 27:12, 14.

 Oti noqu vuli au cakacaka ena kabani ni waqavuka na Ethiopian Airlines. Dua na mataka niu lai cakacaka, era vakavinavinakataki au noqu itokani niu digitaki meu liutaka na tayabe ni kena vakananumi na veiliutaki ni matanitu. E totolo ga noqu vakaraitaka vei noqu supavaisa niu tawaveitovaki, e sega ni rawa gona niu vakaitavi ena soqo ya.

 Ena siga e tarava, niu cakacaka tiko au sa raica tu yani vakayawa eso na tagane e lili tu e tabadra na dakai ra qai gole ina vanua e dau tauri kina na tikite. Au nanuma de ra lai vesuka e dua e via dro i vanua tani. Ia au kidacala ni ratou sa dusi au yani! E veiciciyaki noqu vakasama, cava beka au cakava? E veisau ga vakasauri na ituvaki ena siga ya.

 Era kauti au na sotia ina dua na ofisi meu lai vakatarogi me vica vata na aua. Era tarogi au: “O cei e saumi ira na iVakadinadina i Jiova? O cakacaka tiko vei ratou na Eritrean Liberation Front? O cei e cakacaka tiko ena matanitu o Merika, o iko se o tamamu?” Sa bau dredre sara ga vei au na ituvaki qori, ia au vakila na lomavakacegu ena veivuke i Jiova.—Filipai 4:6, 7.

 Oti noqu vakatarogi era kauti au ina dua na vale e veisautaki me valeniveivesu. Au lai biu sara ena dua na rumu e 28 na mita vakarivirivi na kena raba, kei na 15 tale na goneyalewa era vesu ena vuku ni nodra vakaitavi ena veika vakapolitiki.

 Na bogi qori au dara tu ga noqu isulu ni cakacaka qai moce ena fuloa. Dua na ka noqu nanumi ratou i vale ni ratou na lomaleqataki au tiko. Ratou kila niu sa vesu, ia ratou sega ni kila na vanua au vesu kina. Au kerei Jiova me vakaraitaka vei ratou na vanua au tiko kina.

 Niu yadra mai na mataka tarava, vaka au kilai koya na tagane a yadra tiko. E kidacala ni raici au qai kaya, “Aster, cava o cakava tu i ke?” Au mani kerei koya me gole i vale me lai tukuna vei rau noqu itubutubu na vanua au tiko kina. Ena siga tiko ga ya, rau vakauta mai na kequ kakana kei na noqu isulu. Na tagane qori e tukuna vei rau na vanua au tiko kina. Io, e sauma sara ga o Jiova na noqu masu! Na ituvaki qori e vakadeitaka vei au ni tiko e yasaqu o Jiova.

 A sega ni vakadonui me tiko vei au e dua na iVolatabu, se dua na ivola vakaivolatabu. E sega tale ga ni vakatarai me sikovi au e dua mai vale, se ira na itokani. Ia e vakayaloqaqataki au o Jiova ni vakayagataki ira na goneyalewa keimami vesu vata. Au vunau vei ira e veisiga, era qoroya tale ga vakalevu na ka dina me baleta na Matanitu ni Kalou. Era dau kaya vei au: “Keimami vesu ni keimami valataka na matanitu vakatamata, ia o valataka na matanitu ni Kalou. Kua vakadua ni soro ke ra saga mada ga mera vakamatei iko!”

 Eso na gauna era na vakatarogi na kaivesu vei ira na yadra ra qai mokulaki. Dua na bogi rauta na 11 na kaloko, era kauti au ina rumu ni vakatarogi. E levu na ka era beitaki au kina niu vakatarogi tiko, ra qai kaya niu sega ni tokona na matanitu. Era kaya meu cavuta i cake na ibole ni matanitu, ia au qai bese. Rau qai mokulaki au e rua na yadra. Levu na gauna era dau kauti au na yadra meu lai vakatarogi. Gauna kece qori au na masu wasoma vei Jiova, au dau vakila sara ga nona veitokoni.

 Oti e tolu na vula, a kaya vei au e dua na yadra niu sa rawa ni lako i vale. Dua na ka noqu kurabui qai marau. Ia au rarawa vakalailai baleta niu sa wasea tiko na inuinui ni Matanitu ni Kalou vei ira na goneyalewa e valeniveivesu.

 Oti ga e vica na vula noqu sere, a gole yani i vale e dua na sotia me vesuki ratou na taciqu. Au a sega ni tiko i vale ena gauna qori, ia au vakadeitaka sara ga e keri meu sa dro ina dua tale na vanua. Dua na ka noqu rarawa niu na biuti ratou tale noqu vuvale, ia e vakayaloqaqataki au o Na meu dei qai nuitaki Jiova. Sega ni dede, au sa vodo waqavuka meu gole i Merika. Ena yakavi tiko ga ya, e gole yani i vale eso na sotia me ratou lai vesuki au tale, ia ratou sega ni kunei au. Ratou mani gole i raraniwaqavuka, ni ratou yaco yani sa biubiu na waqavuka au vodo tiko kina.

 Niu yaco i Maryland rau kidavaki au mai o Haywood kei Joan Ward, rau daukaulotu qai vakavulici rau noqu itubutubu ena iVolatabu. Oti e lima na vula, au sa painia. Na luvedrau yalewa o Cyndi keirau qai veiqaravi vata vakapainia. Keirau marautaka vakalevu na cakacaka vakaitalatala.

 Ena vula i katakata ni 1979, au gade ena Peceli e Niu Yoka qai sotavi Wesley Parker. Au taleitaka na nona itovo, kei na nona isausau vakayalo. Ena 1981, keirau vakamau, oti keirau veiqaravi sara vakaveiwatini ena Peceli e Wallkill, e Niu Yoka. Au veiqaravi ena tabana ni savasava kei na sasamaki (Housekeeping and Dry Cleaning). Toso na gauna, au veiqaravi ena Tabana ni Kompiuta (MEPS). Noqu veiqaravi e Peceli e vukei au meu solia noqu vinaka kece vei Jiova, qai kilai ira na mataveitacini era noqu itokani dredre.

 Ia ratou tusaqati tiko vakaca na noqu vuvale e Iciopea, qai dau vakararawataki au sara ga qori. Ratou se vesu tiko na taciqu. b E dau vakarautaka o Na e veisiga na kedratou kakana, e kauta tale ga vei ratou ni sega ni vakarautaki e valeniveivesu na kakana.

 Na gauna dredre qori e vakacegui au tu ga o Jiova. Era dau tokoni au qai vakayaloqaqataki au na lewenivuvale i Peceli. (Marika 10:29, 30) Dua na siga, e kaya vei au o Brother John Booth: “Keimami marau vakalevu ni o veiqaravi tiko e Peceli. Ena sega ni rawa qo ke sega ni vakalougatataki iko o Jiova.” c Na vosa veivakacegui qori e vakadeitaka vei au ni o Jiova e vakalougatataka noqu vakatulewa meu biuti Iciopea, ena taqomaki ratou tale ga noqu vuvale.

 Ena Janueri 1989, keirau kila niu sa bukete. Keirau kidacalataka sara ga! Ia oti e vica na siga, keirau vakila na marau. Keirau vakasamataka na itavi vakaitubutubu keirau na cakava, vanua keitou na tiko kina, kei na sala me keirau tokona kina neirau vuvale ni keirau sa na biuti Peceli.

 Ena ika15 ni Epereli 1989, keirau tawana neirau iyaya ina lori qai gole i Oregon. Qori na vanua keirau nanuma tiko me tomani tale kina neirau veiqaravi vakapainia. Oti toka ga vakalailai neirau yaco yani, era kaya eso neirau itokani ni keirau na sega ni rawa ni painia. E sega ni levu na ka keirau taukena, keirau sa na varau susuga tale ga na luvei keirau. Cava gona keirau na cakava? E mani veisiko mai ena ivavakoso o Guy Pierce na ivakatawa ni tabacakacaka, kei na watina o Penny. d Rau uqeti keirau me keirau dei tiko ga ena neirau isausau. Keirau mani tekivu painia, qai nuitaka na veivuke i Jiova. (Malakai 3:10) E sucu na imatai ni luvei keirau tagane o Lemuel, oti e sucu tale na ikarua ni luvei keirau tagane o Jadon. Keirau tomana tiko ga neirau painia.

 E gauna marautaki dina ni keirau painia tiko ni rau se lalai na gone. E levu kina na gauna keirau vakamacalataka na ka dina vei ira na tu ena yalava, vei rau tale ga na gone. (Vakarua 11:19) Ia ni sucu na ikatolu ni luvei keirau tagane o Japheth, keirau vinakata me cegu mada neirau painia.—Maika 6:8.

 Keirau raica ni bibi duadua nodratou vakavulici na gone me ratou volekati Jiova, ratou bucina tale ga na veiwekani voleka kei koya. Keirau mani tuvanaka na sokalou vakavuvale me dua na ka ratou dau nanamaki kina. Me vaka ni ratou se lalai, keitou dau wilika vata na ivola Vakarorogo ki Vua na Qasenivuli Levu, kei na iTalanoa Mai na iVolatabu. Keitou dramataka tale ga eso na italanoa. Kena ivakaraitaki, na italanoa me baleti Jesepeli. Me vaka niu yalewa duadua, au na matanataki koya. Ratou dau taleitaka na gone na biligi au laivi mai na idabedabe, ratou dau qai cakava na ivukivuki ni koli! E dau vakavulici ratou na gone o Wesley ena iVolatabu.

 Keirau lomani ratou na gone qai kauaitaki ratou. Keirau dau masulaka tale ga me keitou veivolekati vakavuvale. Ni ratou tubu cake tiko, keirau vakavulici ratou ena cakacaka ni vale me vaka na sava iyaya ni kana, samaki ni nodratou rumu, sava isulu, kei na vakasaqa.

 E levu na ka ratou vulica na gone, keirau vuli tale ga kina vakaveiwatini. Eso na gauna ni kaukaua na veivosaki, tau eso na vosa e sega ni vinaka vei ratou na gone se keirau vakaveiwatini. Ena gauna va qori, keitou na vakaraitaka tiko ga na yalomalumalumu kei na veivosoti.

 Keitou dau sureti ira wasoma na mataveitacini ena ivavakoso mera gole mai vale, wili kina eso mai Peceli, daukaulotu, ivakatawa ni tabacakacaka, kei ira na veiqaravi ena vanua e gadrevi kina na veivuke. (Roma 12:13) Ni keitou dau vakamarautaki ira, keirau na sega ni vakalaivi ratou na gone me ratou lai qito ina nodratou rumu. Keitou na dabe vata tiko ga qai marautaka na veimaliwai. Eso na gauna keirau na guilecava kei Wesley na ka e talanoataki, ia ena kasa dei toka vei ratou na gone.

 Dua na ka neirau sasaga vakaveiwatini me keitou marautaka neitou qaravi Jiova. Kena ivakaraitaki, ke keitou via gade ena so na vanua keirau na tuvanaka rawa na siga qai maroroi ilavo. Keitou na sikova na valenivolavola ni tabana, tiko ena soqoni, qai vakaitavi ena cakacaka vakaitalatala. Qori e uqeti keitou me keitou raica vakabibi na isoqosoqo i Jiova, qai veivolekati vakavuvale.

 Keirau raica ni levu ena neitou yalava era vosa vakaSipeni, ia era sega ni rogoca wasoma na itukutuku vinaka. Ratou se lalai na gone, keirau mani tarogi Brother Pierce nona nanuma me baleta neitou via toki ena ivavakoso vosa vakaSipeni. E kaya ena marau, “Ke o dau qoli, o na gole ga ina vanua e tu kina na ika.” E vakayaloqaqataki keirau sara ga qori. Keitou mani toki sara ena ivavakoso vosa vakaSipeni e Woodburn e Oregon. Keirau marau nira toso vinaka vakayalo e levu na vuli iVolatabu, eso tale ga era sa papitaiso. E marautaki tale ga na tubu ni iwasewase lailai qori me dua na ivavakoso.

 Dua na gauna, sa sega ni cakacaka o Wesley keitou mani toki i Kalifonia ena nona cakacaka vou. Oti e rua na yabaki, au nanuma meu painia tale kei rau o Lemuel kei Jadon. Au marau ni keitou tiko ena Koronivuli ni Cakacaka Vakapainia ena 2007. Oti ga vakalailai qori, keitou raica ni levu era vosa vakaArapea ena neitou yalava. Oti e 13 na yabaki neitou tiko ena yalava vosa vakaSipeni, keitou mani vakatulewataka me keitou toki ina ivavakoso vosa vakaArapea. Keitou dau taleitaka na wasea na ka dina ena vunau lavotaki vei ira e levu na vosa vakaArapea era curuvanua yani, kei na so e vanua tani. Keitou tomana tiko ga neitou painia ena yalava vosa vakaArapea e San Diego e Kalifonia.

 E dua na tama qai ulunivuvale vinaka o Wesley. E doka vakalevu na isoqosoqo i Jiova. E dau donu tu ga nona rai me baleti Peceli kei na ituvatuva ena ivavakoso, e dau tukuna tu ga na veika vinaka. Keirau dau masu vata, e dau masulaki au tale ga. Ni sotavi na ituvaki dredre, e dau vakacegui au na nona masu.

 Niu keirau railesu vakaveiwatini, keirau marautaka neirau veiqaravi vakatabakidua, qaravi ni vuvale qai veivuke ena ivavakoso e vinakati vakalevu kina na veivuke. Na neirau vakaliuci Jiova keirau vakila kina nona veivakalougatataki, qai sega ni bureitaka e dua na ka. (Same 37:25) Au vakadeitaka gona ni vakatulewa vinaka duadua noqu digia meu qaravi Jiova ena lomaqu taucoko.—Same 84:10.